1 И҆ прїидо́ста въ до́мъ рагѹи́левъ: са́рра же срѣ́те и҆̀хъ и҆ ра́достнѡ привѣ́тствоваше и҆̀хъ, а҆ ѻ҆́на ю҆̀: и҆ введѐ и҆̀хъ въ до́мъ.
2 И҆ речѐ рагѹи́лъ є҆́днѣ женѣ̀ свое́й: ко́ль подо́бенъ ю҆́ноша тѡві́тѹ сы́нѹ бра́та моегѡ̀;
3 И҆ вопросѝ и҆̀хъ рагѹи́лъ: ѿкѹ́дѹ є҆стѐ, бра́тїѧ; И҆ рѣ́ста є҆мѹ̀: ѿ сынѡ́въ нефѳалі́млихъ плѣне́нныхъ въ нїнеѵі́ю.
4 И҆ речѐ и҆́ма: зна́ета ли тѡві́та бра́та на́шего; Ѻ҆́на же рѣ́ста: зна́ема. И҆ речѐ и҆́ма: здра́вствѹетъ ли;
5 Ѻ҆́на же рѣ́ста: и҆ жи́въ є҆́сть и҆ здра́вствѹетъ. И҆ рече́ тѡві́а: ѻ҆те́цъ мо́й є҆́сть.
6 И҆ и҆зскочѝ рагѹи́лъ, и҆ ѡ҆блобыза̀ є҆го̀, и҆ пла́касѧ,
7 и҆ благословѝ є҆го̀, и҆ речѐ є҆мѹ̀: до́брагѡ и҆ блага́гѡ человѣ́ка сы́нъ. И҆ слы́шавъ, ѩ҆́кѡ тѡві́тъ погѹбѝ ѻ҆́чи своѝ, ско́рбенъ бы́сть и҆ пла́касѧ:
8 и҆ є҆́дна жена̀ є҆гѡ̀ и҆ са́рра дще́рь є҆гѡ̀ пла́кастѣсѧ. И҆ прїѧ́ша и҆́хъ ѹ҆се́рднѡ,
9 и҆ закла́ша ѻ҆вна̀ ѿ ѻ҆ве́цъ, и҆ предложи́ша снѣ҄ди мно́жайшыѧ. Рече́ же тѡві́а рафаи́лѹ: а҆зарі́а бра́те, рцы̀, ѡ҆ ни́хже глаго́лалъ є҆сѝ на пѹтѝ, и҆ да соверши́тсѧ дѣ́ло.
10 И҆ соѡбщѝ сло́во рагѹи́лѹ. И҆ речѐ рагѹи́лъ къ тѡві́и: ѩ҆́ждь, пі́й и҆ благодѹ́шествѹй, тебѣ́ бо досто́итъ дѣ́тище моѐ взѧ́ти: ѻ҆ба́че ѡ҆б̾ѧвлю̀ тебѣ̀ и҆́стинѹ:
11 вдава́хъ дѣ́тище моѐ седмѝ мѹжє́мъ, и҆ є҆гда̀ вхожда́хѹ къ не́й, ѹ҆мира́хѹ под̾ но́щь: но нн҃ѣ благодѹ́шествѹй. И҆ речѐ тѡві́а: не вкѹшѹ̀ ничто́же здѣ̀, до́идеже поста́вите и҆ совѣща́етесѧ со мно́ю. И҆ речѐ рагѹи́лъ: поимѝ ю҆̀ ѿнн҃ѣ по ѡ҆бы́чаю: ты̀ бо бра́тъ є҆сѝ є҆ѧ̀, и҆ ѻ҆на̀ твоѧ̀ є҆́сть, мл҇тивъ же бг҃ъ да бл҃гопоспѣши́тъ ва́ма во бл҃га҄ѧ.
12 И҆ призва̀ са́ррѹ дще́рь свою̀, и҆ є҆́мь рѹ́кѹ є҆ѧ̀, предадѐ ю҆̀ тѡві́и въ женѹ̀ и҆ речѐ: сѐ, по зако́нѹ мѡѷсе́овѹ поимѝ ю҆̀ и҆ ѿведѝ ко ѻ҆тцѹ̀ твоемѹ̀ И҆ благословѝ и҆̀хъ.
13 И҆ призва̀ є҆́днѹ женѹ̀ свою̀, и҆ взе́мъ кни́гѹ, написа̀ пнса́нїе и҆ запечатлѣ̀.
14 И҆ нача́ша ѩ҆́сти.
15 И҆ призва̀ рагѹи́лъ є҆́днѹ женѹ̀ свою̀ и҆ речѐ є҆́й: сестро̀, ѹ҆гото́ви и҆́нъ черто́гъ и҆ введѝ ю҆̀.
16 И҆ сотворѝ, ѩ҆́коже речѐ: и҆ введѐ ю҆̀ та́мѡ и҆ пла́касѧ: и҆ воспрїѧ́тъ сле́зы дще́ре своеѧ̀ и҆ речѐ є҆́й:
17 ѹ҆пова́й, ча́до, гд҇ь нб҃сѐ и҆ землѝ да да́стъ тебѣ̀ ра́дость вмѣ́стѡ печа́ли твоеѧ̀ тоѧ̀: ѹ҆пова́й, дщѝ. |
