1 Всѧ́къ дрѹ́гъ рече́тъ: содрѹжи́хсѧ є҆мѹ̀ и҆ а҆́зъ. Но є҆́сть дрѹ́гъ и҆́менемъ то́чїю дрѹ́гъ.
2 Печа́ль не пребыва́етъ ли до сме́рти, прїѧ́тель и҆ дрѹ́гъ претворѧ́ѧйсѧ во врага̀;
3 Ѽ, лѹка́во помышле́нїе, ѿкѹ́дѹ и҆звали́лосѧ є҆сѝ покры́ти сѹ́шѹ ле́стїю;
4 Прїѧ́тель ѡ҆ весе́лїи дрѹ́жни сра́дѹетсѧ, а҆ во вре́мѧ ско́рби проти́венъ бѹ́детъ:
5 прїѧ́тель со дрѹ́гомъ трѹжда́етсѧ чре́ва ра́ди и҆ проти́вѹ бра́ни во́зметъ щи́тъ.
6 Не забѹ́ди дрѹ́га въ дѹшѝ твое́й и҆ не помина́й є҆гѡ̀ во и҆мѣ́нїи твое́мъ.
7 Всѧ́къ совѣ́тникъ возно́ситъ совѣ́тъ, но є҆́сть совѣща́ѧй ѡ҆ себѣ̀ самѣ́мъ.
8 Ѿ совѣ́тника хранѝ дѹ́шѹ твою̀ и҆ разѹмѣ́й пе́рвѣе, что̀ є҆мѹ̀ потре́ба: са́мъ бо себѣ̀ совѣщава́етъ:
9 да не когда̀ возложи́тъ на тѧ̀ жре́бїй и҆ рече́тъ тѝ: до́бръ пѹ́ть тво́й: и҆ ста́нетъ прѧ́мѡ, ви́дѣти, что̀ сбѹ́детсѧ тебѣ̀.
10 Не совѣщава́й съ подзира́ющимъ тѧ̀ и҆ ѿ зави́дѧщихъ тѝ скры́й совѣ́тъ:
11 со жено́ю ѡ҆ ревнѹ́ющей є҆́й и҆ со страшли́вымъ ѡ҆ бра́ни, съ кѹпце́мъ ѡ҆ мѣ́нѣ и҆ со кѹпѹ́ющимъ ѡ҆ прода́жи, со зави́дливымъ ѡ҆ благодаре́нїи
12 и҆ съ неми́лостивымъ ѡ҆ поми́лованїи, съ лѣни́вымъ ѡ҆ всѧ́цѣмъ дѣ́лѣ
13 и҆ съ нае́мникомъ годовы́мъ ѡ҆ соверше́нїи, съ рабо́мъ лѣни́вымъ ѡ҆ мно́зѣ дѣ́ланїи.
14 Не внемлѝ си҄мъ ѡ҆ всѧ́цѣмъ совѣща́нїи,
15 но то́кмѡ съ мѹ́жемъ благоговѣ́йнымъ пр҇нѡ бѹ́ди, є҆го́же а҆́ще позна́еши соблюда́юща за́пѡвѣди гд҇ни,
16 и҆́же дѹше́ю свое́ю по дѹшѝ твое́й, и҆ а҆́ще согрѣши́ши, споболи́тъ съ тобо́ю.
17 И҆ совѣ́тъ се́рдца ѹ҆ста́ви, нѣ́сть бо тѝ вѣ́рнѣе є҆гѡ̀:
18 дѹша́ бо мѹ́жа возвѣща́ти нѣ́когда бо́лѣе ѡ҆бы́че, не́жели се́дмь блюсти́телїе высо́цѣ сѣдѧ́щїи на стра́жи.
19 И҆ ѡ҆ всѣ́хъ си́хъ помоли́сѧ вы́шнемѹ, да ѹ҆пра́витъ во и҆́стинѣ пѹ́ть тво́й.
20 Нача́токъ всѧ́кагѡ дѣ́ла сло́во, и҆ пре́жде всѧ́кагѡ дѣ́ланїѧ совѣ́тъ.
21 Слѣ́дъ и҆змѣне́нїѧ серде́чна лицѐ. Четы́ри ча҄сти происхо́дѧтъ: добро̀ и҆ ѕло̀, живо́тъ и҆ сме́рть: и҆ ѡ҆блада́ѧй и҆́ми всегда̀ ѧ҆зы́къ є҆́сть.
22 Е҆́сть мѹ́жъ хи́тръ и҆ наказа́тель мнѡ́гимъ, а҆ свое́й дѹшѝ неключи́мь є҆́сть.
23 Е҆́сть ѹ҆мѹдрѧ́ѧйсѧ въ словесѣ́хъ ненави́димь: се́й всѧ́кїѧ пи́щи лише́нъ бѹ́детъ:
24 не дана́ бо бы́сть є҆мѹ̀ ѿ гд҇а благода́ть, ѩ҆́кѡ всѧ́кїѧ премѹ́дрости лише́нъ бы́сть.
25 Е҆́сть премѹ́дръ свое́й дѹшѝ, и҆ плоды̀ ра́зѹма є҆гѡ̀ во ѹ҆стѣ́хъ вѣ҄рны.
26 Мѹ́жъ премѹ́дръ лю́ди своѧ҄ нака́жетъ, и҆ плоды̀ ра́зѹма є҆гѡ̀ вѣ҄рны.
27 Мѹ́жъ премѹ́дръ и҆спо́лнитсѧ благослове́нїѧ, и҆ ѹ҆блажа́тъ є҆го̀ всѝ зрѧ́щїи.
28 Живо́тъ мѹ́жа въ числѣ̀ дні́й: а҆ дні́е ї҆и҃лєвы безчи́сленни.
29 Премѹ́дрый во свои́хъ лю́дехъ наслѣ́дитъ вѣ́рѹ, и҆ и҆́мѧ є҆гѡ̀ жи́во бѹ́детъ во вѣ́къ.
30 Ча́до, въ животѣ̀ твое́мъ и҆скѹсѝ дѹ́шѹ твою̀ и҆ ви́ждь, что̀ є҆́й ѕло̀ є҆́сть, и҆ не да́ждь є҆́й.
31 И҆́бо не всѧ҄ всѣ҄мъ на по́льзѹ, и҆ не всѧ́ка дѹша̀ во все́мъ благоволи́тъ.
32 Не пресыща́йсѧ во всѧ́цѣй сла́дости и҆ не разлива́йсѧ на (разли́чїе) бра́шна,
33 и҆́бо во мно́зѣхъ бра́шнахъ недѹ́гъ бѹ́детъ, и҆ пресыще́нїе прибли́житъ да́же до холе́ры:
34 пресыще́нїемъ бо мно́зи ѹ҆мро́ша, внима́ѧй же приложи́тъ житїѐ. |
