1 Поми́лѹй ны̀, влдко, бж҃е всѣ́хъ, и҆ воззрѝ,
2 и҆ наложѝ стра́хъ тво́й на всѧ҄ ѩ҆зы́ки:
3 воздви́гни рѹ́кѹ твою̀ на ѩ҆зы́ки чѹ҄жды, и҆ да ѹ҆́зрѧтъ си́лѹ твою̀.
4 ѩ҆́коже пред̾ ни́ми ѡ҆ст҃и́лсѧ є҆сѝ въ на́съ, та́кожде пред̾ на́ми возвели́чисѧ на ни́хъ:
5 и҆ да позна́ютъ тѧ̀, ѩ҆́коже и҆ мы̀ позна́хомъ тѧ̀, ѩ҆́кѡ нѣ́сть бг҃а ра́звѣ тебє̀, гд҇и.
6 Ѡ҆бновѝ зна́мєнїѧ и҆ и҆змѣнѝ чѹдеса̀,
7 просла́ви рѹ́кѹ и҆ мы́шцѹ деснѹ́ю (твою̀), воздви́гни ѩ҆́рость и҆ и҆злі́й гнѣ́въ,
8 и҆змѝ сопоста́та и҆ сотрѝ врага̀,
9 поспѣшѝ вре́мѧ и҆ помѧнѝ клѧ́твѹ, и҆ да повѣ́дѧтъ вели҄чїѧ твоѧ҄.
10 Гнѣ́вомъ ѻ҆гнѧ̀ поѧде́нъ да бѹ́детъ спаса́ѧйсѧ, и҆ ѡ҆ѕлоблѧ́ющїи люді́й твои́хъ да ѡ҆брѧ́щѹтъ па́гѹбѹ.
11 Сокрѹшѝ главы҄ кнѧзе́й вра́жїихъ, глаго́лющихъ: нѣ́сть ра́звѣ на́съ.
12 Соберѝ всѧ҄ кѡлѣ́на ї҆а҄кѡвлѧ и҆ наслѣ́дствѹй и҆̀хъ ѩ҆́коже ѿ нача́ла.
13 Поми́лѹй лю́ди, гд҇и, нарѣчє́нныѧ и҆́менемъ твои́мъ, и҆ ї҆и҃лѧ, є҆го́же пе́рвенцемъ наре́клъ є҆сѝ.
14 Ѹ҆ще́дри гра́дъ ст҃ы́ни твоеѧ̀, ї҆ер҇ли́мъ, мѣ́сто поко́ища твоегѡ̀.
15 И҆спо́лни сїѡ́на взѧ́ти словеса̀ твоѧ҄, и҆ ѿ сла́вы твоеѧ̀ лю́ди твоѧ҄.
16 Да́ждь свидѣ́телство сѹ́щымъ ѿ нача́ла тва́ремъ твои҄мъ и҆ воздви́гни про҇ро́чєствїѧ сѹ҄щаѧ ѡ҆ и҆́мени твое́мъ:
17 да́ждь мздѹ̀ терпѧ́щымъ тебѐ, и҆ про҇ро́цы твоѝ да ѹ҆вѣ́рѧтсѧ.
18 Ѹ҆слы́ши, гд҇и, мольбы҄ моли́твєнникъ твои́хъ, по бл҃гослове́нїю а҆арѡ́ню ѡ҆ лю́дехъ твои́хъ,
19 и҆ ѹ҆разѹмѣ́ютъ всѝ сѹ́щїи на землѝ, ѩ҆́кѡ ты̀ гд҇ь є҆сѝ, бг҃ъ вѣкѡ́въ.
20 Всѧ́ко бра́шно ѩ҆́стъ чре́во: є҆́сть же бра́шно бра́шна добрѣ́е.
21 Горта́нь вкѹша́етъ бра҄шна ѿ ло́ва, та́кѡ се́рдце разѹми́во словеса̀ лѡ́жна.
22 Се́рдце стропти́во да́стъ печа́ль, и҆ человѣ́къ многоискѹ́сный возда́стъ є҆мѹ̀.
23 Всѧ́кагѡ мѹ́жеска по́лѹ прїи́метъ жена̀: є҆́сть же дще́рь дще́ре лѹ́чше.
24 Добро́та же́нска весели́тъ лицѐ и҆ над̾ всѐ жела́нїе человѣ́ческо пред̾ѹспѣва́етъ:
25 а҆́ще є҆́сть на ѧ҆зы́цѣ є҆ѧ̀ ми́лость и҆ кро́тость, нѣ́сть мѹ́жъ є҆ѧ̀ то́ченъ сынѡ́мъ человѣ́чєскимъ.
26 Стѧжа́вый женѹ̀ начина́етъ и҆мѣ́ти стѧжа́нїе, помо́щника по себѣ̀ и҆ столпа̀ поко́ю.
27 И҆дѣ́же нѣ́сть ѡ҆гра́ды, расхище́но бѹ́детъ и҆мѣ́нїе, и҆ и҆дѣ́же нѣ́сть жены̀, воздо́хнетъ скита́ѧсѧ:
28 кто́ бо повѣ́ритъ воѡрѹже́нѹ разбо́йникѹ преходѧ́щѹ ѿ гра́да во гра́дъ;
29 Та́кожде и҆ человѣ́кѹ не и҆мѹ́щѹ гнѣзда̀ и҆ ѡ҆бита́ющѹ, и҆дѣ́же ѡ҆бвечерѧ́етъ. |
