1 Тщє́тны надє́жды и҆ лжи҄вы (сѹ́ть) неразѹ́мивѹ мѹ́жѹ, и҆ сѡ́нїѧ вперѧ́ютъ безѹ́мныхъ.
2 ѩ҆́коже є҆́млѧйсѧ за стѣ́нь и҆ гонѧ́й вѣ́тры, та́кожде є҆́млѧй вѣ́рѹ снѡ́мъ:
3 сїѐ по семѹ̀ видѣ́нїе снѡ́въ, прѧ́мѡ лицѹ̀ подо́бїе лица̀.
4 Ѿ нечи́стагѡ что̀ ѡ҆чи́ститсѧ, и҆ ѿ лжи́вагѡ ка́ѧ и҆́стина;
5 Волшє́бства и҆ ѡ҆баѧ҄нїѧ и҆ сѡ́нїѧ сѹ́єтна сѹ́ть, и҆ ѩ҆́коже ражда́ющїѧ се́рдцѹ мечта҄нїѧ быва́ютъ:
6 а҆́ще не ѿ вы́шнѧгѡ пѡ́слана бѹ́дѹтъ на посѣще́нїе, не вда́ждь въ нѧ̀ се́рдца твоегѡ̀:
7 мно́гихъ бо прельсти́ша сѡ́нїѧ, и҆ ѿпадо́ша надѣ́ющесѧ на нѧ̀.
8 Без̾ лжѝ соверши́тсѧ зако́нъ, и҆ премѹ́дрость во ѹ҆стѣ́хъ вѣ́рныхъ соверше́нїе.
9 Мѹ́жъ ѹ҆че́ный ѹ҆вѣ́да мно́гѡ, и҆ многоискѹ́сный повѣ́сть ра́зѹмъ.
10 И҆́же не и҆скѹси́сѧ, ма́лѡ вѣ́сть: ѡ҆бходѧ́й же страны҄ ѹ҆мно́житъ хи́трость.
11 Мно́гѡ ви́дѣхъ во ѡ҆бхожде́нїи мое́мъ, и҆ вѧ҄щшаѧ слове́съ мои́хъ ра́зѹмъ мо́й:
12 мно́гащи да́же до сме́рти бѣ́дствовахъ, и҆ спасе́нъ бы́хъ си́хъ ра́ди.
13 Дѹ́хъ боѧ́щихсѧ гд҇а поживе́тъ, наде́жда бо и҆́хъ на сп҃са́ющаго ѧ҆̀.
14 Боѧ́йсѧ гд҇а ни чегѡ̀ ѹ҆бои́тсѧ и҆ не ѹ҆страши́тсѧ, то́й бо наде́жда є҆мѹ̀.
15 Боѧ́щемѹсѧ гд҇а блаже́нна дѹша̀: чи́мъ ѡ҆держи́тсѧ, и҆ кто̀ є҆мѹ̀ ѹ҆твержде́нїе;
16 Ѻ҆́чи гд҇ни на лю́бѧщыѧ є҆го̀: защище́нїе си́лы и҆ ѹ҆твержде́нїе крѣ́пости, покро́въ ѿ ва́ра и҆ покро́въ въ полѹ́дне, хране́нїе ѿ претыка́нїѧ и҆ по́мощь ѿ паде́нїѧ:
17 воздвиза́ѧй дѹ́шѹ и҆ просвѣща́ѧй ѻ҆́чи, и҆зцѣле́нїе даѧ́й, живо́тъ и҆ блг҇ве́нїе.
18 И҆́же прино́ситъ же́ртвѹ ѿ непра́вды, приноше́нїе поро́чно, и҆ не сѹ́ть во благоволе́нїе да́ры беззако́нныхъ.
19 Не бл҃говоли́тъ вы́шнїй ѡ҆ приноше́нїи нечести́выхъ, ни мно́жествомъ же́ртвъ ѡ҆ч҇титъ грѣхѝ.
20 ѩ҆́кѡ жрѧ́й сы́на пред̾ ѻ҆тце́мъ є҆гѡ̀, та́кѡ приносѧ́й жє́ртвы ѿ и҆мѣ́нїѧ ѹ҆бо́гихъ.
21 Хлѣ́бъ ѹ҆бѡ́гимъ живо́тъ ѹ҆бо́гихъ, лиша́ѧй є҆гѡ̀ человѣ́къ крове́й є҆́сть.
22 Ѹ҆бива́етъ и҆́скреннѧго ѿе́млѧй є҆мѹ̀ поживле́нїе, и҆ пролива́етъ кро́вь лиша́ѧй мзды̀ нае́мника.
23 Е҆ди́нъ созида́ѧй, а҆ дрѹгі́й разорѧ́ѧй, что̀ ѹ҆спѣ́етъ бо́лѣе, то́кмѡ трѹ́дъ;
24 Е҆ди́номѹ молѧ́щѹсѧ, а҆ дрѹго́мѹ проклина́ющѹ, ко́егѡ гла́съ ѹ҆слы́шитъ влдка;
25 Ѡ҆мыва́ѧйсѧ ѿ мертвеца̀ и҆ па́ки прикаса́ѧйсѧ є҆мѹ̀, ка́ѧ по́льза є҆мѹ̀ ѿ ба́ни;
26 Та́кѡ человѣ́къ постѧ́йсѧ ѡ҆ грѣсѣ́хъ свои́хъ и҆ па́ки ходѧ́й и҆ та҄ѧжде творѧ́й, мольбѹ̀ є҆гѡ̀ кто̀ ѹ҆слы́шитъ, и҆ что̀ ѹ҆спѣ̀ смире́нїемъ свои́мъ; |
