1 Живы́й во вѣ́ки созда̀ всѧ҄ ѻ҆́бще. гд҇ь є҆ди́нъ ѡ҆правди́тсѧ:
2 никто́же дово́ленъ и҆сповѣ́сти дѣ́лъ є҆гѡ̀,
3 и҆ кто̀ и҆зслѣ́дитъ вели҄чїѧ є҆гѡ̀;
4 Держа́вѹ вели́чества є҆гѡ̀ кто̀ и҆зочте́тъ; и҆ кто̀ приложи́тъ и҆сповѣ́дати мл҇ти є҆гѡ̀;
5 Не лѣ́ть ѹ҆ма́лити, нижѐ приложи́ти, и҆ не лѣ́ть и҆зслѣ́дити чѹде́съ гд҇нихъ.
6 Е҆гда̀ сконча́етъ человѣ́къ, тогда̀ начина́етъ, и҆ є҆гда̀ преста́нетъ, тогда̀ ѹ҆сѹмни́тсѧ.
7 Что̀ є҆́сть человѣ́къ; и҆ что̀ потре́ба є҆гѡ̀; что̀ бла́го є҆гѡ̀; и҆ что̀ ѕло̀ є҆гѡ̀;
8 Число̀ дні́й человѣ́кѹ мно́го лѣ́тъ сто̀: ѩ҆́кѡ ка́плѧ морскі́ѧ воды̀ и҆ зерно̀ песка̀, та́кѡ ма́ло лѣ́тъ въ де́нь вѣ́ка.
9 Сегѡ̀ ра́ди долготерпѣ̀ гд҇ь на ни́хъ и҆ и҆злїѧ̀ на нѧ̀ мл҇ть свою̀.
10 Ви́дѣ и҆ позна̀ низвраще́нїе и҆́хъ, ѩ҆́кѡ ѕло̀,
11 сегѡ̀ ра́ди ѹ҆мно́жи мл҇рдїе своѐ.
12 Ми́лость человѣ́ча на и҆́скреннѧго своего̀, мл҇ть же гд҇нѧ на всѧ́кѹ пло́ть.
13 Ѡ҆блича́ѧй и҆ наказѹ́ѧй, и҆ наѹча́ѧй и҆ ѡ҆браща́ѧй ѩ҆́кѡ па́стырь ста́до своѐ:
14 прїе́млющихъ наказа́нїе ми́лѹетъ и҆ тща́щихсѧ ѡ҆ сѹдба́хъ є҆гѡ̀.
15 Ча́до, во благи́хъ не да́ждь поро́ка, и҆ во всѧ́цѣмъ даѧ́нїи печа́ли слове́съ.
16 Не ѹ҆стѹди́тъ ли зно́ѧ роса̀; та́кѡ лѹ́чше сло́во, не́жели даѧ́нїе.
17 Не сѐ ли, сло́во па́че даѧ́нїѧ бла́га; ѻ҆боѧ́ же ѹ҆ мѹ́жа благода́тна.
18 Бѹ́й неблагода́рнѡ поно́ситъ, и҆ даѧ́нїе зави́дливагѡ и҆стаева́етъ ѻ҆́чи.
19 Пре́жде не́же возглаго́леши, ѹ҆вѣ́ждь, и҆ пре́жде недѹ́га врачѹ́йсѧ:
20 пре́жде сѹда̀ и҆спыта́й себѐ и҆ въ ча́съ посѣще́нїѧ ѡ҆брѧ́щеши ѡ҆чище́нїе:
21 пре́жде да́же въ недѹ́гъ не впаде́ши, смири́сѧ, и҆ во вре́мѧ грѣхѡ́въ покажѝ ѡ҆браще́нїе.
22 Не воспѧти́сѧ возда́ти ѡ҆бѣ́тъ благовре́меннѡ и҆ не ѡ҆жида́й да́же до сме́рти ѡ҆правда́тисѧ:
23 пре́жде да́же не помо́лишисѧ, ѹ҆гото́ви себѐ, и҆ не бѹ́ди ѩ҆́кѡ человѣ́къ и҆скѹша́ѧ гд҇а.
24 Помѧнѝ гнѣ́въ въ де́нь сконча́нїѧ и҆ вре́мѧ ме́сти во ѿвраще́нїи лица̀:
25 помѧнѝ вре́мѧ гла́да во вре́мѧ сы́тости, нищетѹ̀ и҆ ѹ҆бо́жество въ де́нь бога́тства.
26 Ѿ ѹ҆́тра до ве́чера и҆змѣнѧ́етсѧ вре́мѧ, и҆ всѧ҄ скѡ́ра сѹ́ть пред̾ гд҇емъ.
27 Человѣ́къ премѹ́дръ во все́мъ ѡ҆па́сенъ бѹ́детъ и҆ во дне́хъ грѣхѡ́въ во́нметъ ѡ҆ согрѣше́нїи.
28 Всѧ́къ разѹми́въ позна̀ премѹ́дрость, и҆ ѡ҆брѣ́тшемѹ ю҆̀ да́стъ и҆сповѣ́данїе.
29 Разѹ́мнїи въ словесѣ́хъ, и҆ ті́и ѹ҆мѹдри́шасѧ и҆ ѹ҆мно́жиша при҄тчи и҆спы҄тны. воздержа́нїе дѹшѝ.
30 Вслѣ́дъ по́хотей твои́хъ не ходѝ и҆ ѿ похотѣ́нїй свои́хъ возбранѧ́йсѧ:
31 а҆́ще да́си дѹшѝ твое́й благоволе́нїе жела́нїѧ, сотвори́тъ тѧ̀ ѡ҆бра́дованїе врагѡ́мъ твои҄мъ.
32 Не весели́сѧ ѡ҆ мно́зѣй сла́дости и҆ не свѧзѹ́йсѧ соѻбще́нїемъ є҆ѧ̀.
33 Не бѹ́ди ни́щь пи́ршествѹѧй ѿ взаи́мства, и҆ ничто́ ти бѹ́детъ въ мѣшцѣ̀. |
