1 Премѹ́дрость смире́ннагѡ вознесе́тъ главѹ̀ є҆гѡ̀ и҆ посредѣ̀ вельмо́жъ посади́тъ є҆го̀.
2 Не похвалѝ человѣ́ка во красотѣ̀ є҆гѡ̀, и҆ не бѹ́ди тѝ ме́рзокъ человѣ́къ видѣ́нїемъ свои́мъ.
3 Мала̀ є҆́сть въ перна́тыхъ пчела̀, и҆ нача́токъ сла́достей пло́дъ є҆ѧ̀.
4 Во ѡ҆дѣ́ѧнїи ри́зъ не похвали́сѧ и҆ въ де́нь сла́вы не превозноси́сѧ: ѩ҆́кѡ ди҄вна дѣла̀ гд҇нѧ и҆ та҄йна дѣла̀ є҆гѡ̀ пред̾ челѡвѣ́ки.
5 Мно́зи мѹчи́телїе сѣдо́ша на землѝ, неча́емый же ѹ҆вѧзе́сѧ вѣнце́мъ.
6 Мно́зи си́льнїи ѹ҆коре́ни бы́ша ѕѣлѡ̀, и҆ сла́внїи пре́дани бы́ша въ рѹ́ки и҆нѣ́хъ.
7 Пе́рвѣе не́же и҆спыта́еши, не порица́й, ѹ҆разѹмѣ́й пре́жде и҆ тогда̀ запреща́й.
8 Пре́жде не́же ѹ҆слы́шиши, не ѿвѣщава́й, и҆ не влага́йсѧ въ средѹ̀ бесѣ́ды.
9 Ѡ҆ ве́щи, ѩ҆́же тѝ нѣ́сть на потре́бѹ, не тѧжи́сѧ, и҆ на сѹдѣ̀ грѣ́шникѡвъ не сѣда́й.
10 Ча́до, дѣѧ҄нїѧ твоѧ҄ да не бѹ́дѹтъ ѡ҆ мно́зѣ: а҆́ще ѹ҆мно́жиши, не бѹ́деши непови́ненъ, и҆ а҆́ще сѐ го́ниши, не пости́гнеши, и҆ не ѹ҆тече́ши бѣжа́щь.
11 Е҆́сть трѹжда́ѧйсѧ и҆ потѧ́сѧ и҆ тща́сѧ, и҆ толи́кѡ па́че лиша́етсѧ.
12 Е҆́сть сла́бъ и҆ тре́бѹѧй застѹпле́нїѧ, лиша́ѧйсѧ си́лы, и҆ нището́ю и҆з̾ѻби́лѹетъ:
13 и҆ ѻ҆́чи гд҇ни призрѣ́ста є҆мѹ̀ во блага҄ѧ, и҆ воздви́же и҆̀ ѿ смире́нїѧ є҆гѡ̀, и҆ вознесѐ главѹ̀ є҆гѡ̀, и҆ диви́шасѧ ѡ҆ не́мъ мно́зи.
14 Блага҄ѧ и҆ ѕла҄ѧ, живо́тъ и҆ сме́рть, нищета̀ и҆ бога́тство ѿ гд҇а сѹ́ть.
15 Даѧ́нїе гд҇не пребыва́етъ бл҃гочести҄вымъ, и҆ бл҃говоле́нїе є҆гѡ̀ бл҃гопоспѣши́тсѧ во вѣ́къ.
16 Е҆́сть богатѧ́йсѧ ѹ҆держа́нїемъ и҆ скѹ́постїю свое́ю, и҆ сїѧ̀ ча́сть мзды̀ є҆гѡ̀,
17 внегда̀ рещѝ є҆мѹ̀: ѡ҆брѣто́хъ поко́й и҆ нн҃ѣ ѩ҆́мъ ѿ бла҄гъ мои́хъ.
18 И҆ не вѣ́сть, ко́е вре́мѧ прїи́детъ, и҆ ѡ҆ста́витъ ѧ҆̀ и҆нѣ҄мъ, и҆ ѹ҆́мретъ.
19 Сто́й въ завѣ́тѣ твое́мъ и҆ пребыва́й въ не́мъ, и҆ въ дѣ́лѣ твое́мъ ѡ҆бетша́й.
20 Не диви́сѧ дѣлѡ́мъ грѣ́шника, вѣ́рѹй же гд҇еви и҆ пребыва́й въ трѹдѣ̀ твое́мъ:
21 ѩ҆́кѡ ѹ҆до́бно є҆́сть пред̾ ѻ҆чи́ма гд҇нима внеза́пѹ ѡ҆богати́ти ни́щаго.
22 Блг҇ве́нїе гд҇не на мздѣ̀ благочести́вагѡ, и҆ въ ча́съ ско́ръ процвѣте́тъ блг҇ве́нїе є҆гѡ̀.
23 Не рцы̀: ка́ѧ мѝ потре́ба є҆́сть, и҆ ка҄ѧ ѿнн҃ѣ бѹ́дѹтъ мѝ блага҄ѧ;
24 Не рцы̀: довѡ́лна мѝ сѹ́ть, и҆ чи́мъ ѿсе́лѣ ѡ҆ѕло́бленъ бѹ́дѹ;
25 Въ де́нь благи́хъ забве́нїе ѕлы́хъ, въ де́нь же ѕлы́хъ не воспомѧнѹ́тсѧ блага҄ѧ:
26 ѩ҆́кѡ ѹ҆до́бно є҆́сть пред̾ бг҃омъ, въ де́нь сме́рти возда́ти человѣ́кѹ по дѣлѡ́мъ є҆гѡ̀.
27 Ѡ҆ѕлобле́нїе вре́мене забы́тїе твори́тъ сла́дости, и҆ въ сконча́нїи человѣ́ка ѿкры́тїе дѣ́лъ є҆гѡ̀.
28 Пре́жде сме́рти не блажѝ ни кого́же, и҆ въ ча́дѣхъ свои́хъ позна́нъ бѹ́детъ мѹ́жъ.
29 Не всѧ́каго человѣ́ка вводѝ въ до́мъ тво́й: мнѡ́ги бо сѹ́ть кѡ́зни льсти́вагѡ.
30 ѩ҆́коже рѧ́бка ѹ҆ловле́наѧ въ клѣ́тцѣ (ѡ҆бглѧ́даетъ), та́кѡ се́рдце го́рдагѡ, и҆ ѩ҆́коже соглѧ́дникъ назира́етъ паде́нїѧ:
31 до́брое бо на ѕло̀ ѡ҆браща́ѧ, подса́дѹ твори́тъ и҆ на дѡ́брыѧ дѣ́тєли возложи́тъ поро́къ.
32 Ѿ и҆́скры ѻ҆́гненныѧ ѹ҆множа́етсѧ ѹ҆́глїе, и҆ человѣ́къ грѣ́шникъ на кро́вь присѣди́тъ.
33 Блюди́сѧ ѿ ѕлодѣ́ѧ, ѕло́ бо содѣва́етъ, да не когда̀ поро́къ да́стъ тѝ во вѣ́къ.
34 Вселѝ чѹжда́го въ до́мъ тво́й, и҆ разврати́тъ тѧ̀ мѧте́жемъ и҆ чѹ́жда тѧ̀ сотвори́тъ ѿ твои́хъ тѝ. |
