1 Не свари́сѧ съ человѣ́комъ си́льнымъ, и҆ да не когда̀ впаде́ши въ рѹ́цѣ є҆гѡ̀.
2 Не тѧжи́сѧ съ человѣ́комъ бога́тымъ, да не когда̀ ѡ҆тѧготи́тъ тѝ мѣ́рѹ:
3 мно́гихъ бо погѹбѝ зла́то, и҆ сердца̀ ца҄рскаѧ преклонѝ.
4 Не свари́сѧ съ человѣ́комъ ѧ҆зы́чнымъ и҆ не наклада́й на ѻ҆́гнь є҆гѡ̀ дро́въ.
5 Не и҆гра́й съ ненака́заннымъ, да не прїи́мѹтъ безче́стїѧ прароди́телїе твоѝ.
6 Не поносѝ человѣ́кѹ ѡ҆браща́ющѹсѧ ѿ грѣха̀: помѧнѝ, ѩ҆́кѡ всѝ є҆смы̀ во є҆пїтїмїа́хъ.
7 Не безче́сти человѣ́ка въ ста́рости є҆гѡ̀: и҆́бо и҆ ты̀ са́мъ состарѣ́ешисѧ.
8 Не ра́дѹйсѧ ѡ҆ мертвецѣ̀ бы́вшемъ вражде́бнѣйшемъ тебѣ̀: помѧнѝ, ѩ҆́кѡ всѝ ѹ҆мира́емъ.
9 Не пре́зри по́вѣсти премѹ́дрыхъ и҆ въ при́тчахъ и҆́хъ живѝ:
10 ѩ҆́кѡ ѿ ни́хъ навы́кнеши наказа́нїю и҆ слѹжи́ти вельмо́жамъ ѹ҆до́бнѡ.
11 Не ѿстѹпа́й ѿ по́вѣсти ста́рцєвъ: и҆́бо ті́и навыко́ша ѿ ѻ҆тє́цъ свои́хъ:
12 ѩ҆́кѡ ѿ ни́хъ навы́кнеши ра́зѹмѹ и҆ во вре́мѧ потре́бно да́ти ѿвѣ́тъ.
13 Не возгнѣща́й ѹ҆́глїѧ грѣ́шникѹ, да не сгори́ши ѻ҆гне́мъ пла́мене є҆гѡ̀.
14 Не воста́ни на лицѐ досади́телево, да не присѣди́тъ ѩ҆́кѡ навѣ́тникъ ѹ҆стѡ́мъ твои҄мъ.
15 Взаи́мъ не да́й человѣ́кѹ крѣ́пльшѹ тебє̀, и҆ а҆́ще да́си, бѹ́ди ѩ҆́коже погѹби́вый.
16 Не порѹча́йсѧ вы́ше си́лы твоеѧ̀: и҆ а҆́ще порѹчи́шисѧ, ѩ҆́кѡ воздаѧ́й пецы́сѧ.
17 Не свари́сѧ со сѹдїе́ю: по разсѹжде́нїю бо є҆гѡ̀ бѹ́дѹтъ сѹди́ти є҆мѹ̀.
18 Съ де́рзымъ не ходѝ на пѹ́ть, ѩ҆́кѡ да не ѡ҆тѧготи́тсѧ на тѧ̀: то́й бо сотвори́тъ по во́ли свое́й, и҆ съ бѹ́йствомъ є҆гѡ̀ поги́бнеши.
19 Съ ѩ҆́ростивымъ не свари́сѧ и҆ не и҆дѝ съ ни́мъ сквозѣ̀ пѹсты́ню: пред̾ ѻ҆чи́ма бо є҆гѡ̀ кро́вь ѩ҆́кѡ ничто́же є҆́сть, и҆ и҆дѣ́же нѣ́сть по́мощи, та́мѡ низложи́тъ тѧ̀.
20 Съ бѹ́имъ совѣ́та не творѝ: не возмо́жетъ бо сло́ва ѹ҆держа́ти.
21 Пред̾ чѹжи́мъ не творѝ та́йнагѡ: не вѣ́си бо, что̀ роди́тъ тѝ.
22 Всѧ́комѹ человѣ́кѹ не ѩ҆влѧ́й се́рдца твоегѡ̀, да не возда́стъ тѝ благода́ти ло́жныѧ. |
