1 Не творѝ ѕла̀, и҆ не пости́гнетъ тѧ̀ ѕло̀:
2 ѿстѹпѝ ѿ непра́вды, и҆ ѹ҆клони́тсѧ ѿ тебє̀.
3 Сы́не, не сѣ́й на бразда́хъ непра҄вды и҆ не и҆́маши пожа́ти и҆̀хъ седмери́цею.
4 Не просѝ ѹ҆ гд҇а влады́чества, нижѐ ѿ царѧ̀ сѣда́лища сла́вы.
5 Не ѡ҆правда́й себѐ пред̾ бг҃омъ и҆ пред̾ царе́мъ не мѹдри́сѧ.
6 Не и҆щѝ, да бѹ́деши сѹдїѧ̀, є҆гда̀ не возмо́жеши ѿѧ́ти непра҄вды: да не когда̀ ѹ҆бои́шисѧ лица̀ си́льнагѡ и҆ положи́ши собла́знъ въ пра́вости твое́й.
7 Не согрѣша́й во мно́жествѣ гра́да и҆ не низлага́й себѐ въ наро́дѣ.
8 Не свѧжѝ два́жды грѣха̀, и҆ во є҆ди́нѣмъ бо не непови́ненъ бѹ́деши.
9 Не рцы̀: на мно́жество дарѡ́въ мои́хъ воззри́тъ, и҆ приносѧ́щѹ мѝ бг҃ѹ вы́шнемѹ, прїи́метъ.
10 Не малодѹ́шествѹй въ моли́твѣ твое́й и҆ ми́лостыню твори́ти не пре́зри.
11 Не рѹга́йсѧ человѣ́кѹ сѹ́щѹ въ го́рести дѹшѝ є҆гѡ̀: є҆́сть бо смирѧ́ѧй и҆ возносѧ́й.
12 Не ѡ҆рѝ лжѝ на бра́та твоего̀, нижѐ дрѹ́гѹ то́жде творѝ.
13 Не восхощѝ лга́ти всѧ́кїѧ лжѝ: ѹ҆чаще́нїе бо є҆ѧ̀ не на бла́го.
14 Не бѹ́ди велерѣ́чивъ во мно́жествѣ ста́рєцъ и҆ не повторѝ сло́ва въ моли́твѣ твое́й.
15 Не возненави́ди трѹ́днагѡ дѣ́ла и҆ земледѣ́лїѧ ѿ вы́шнѧгѡ со́здана.
16 Не привмѣнѧ́й себѐ ко мно́жествѹ грѣ́шникѡвъ.
17 Смирѝ дѹ́шѹ твою̀ ѕѣлѡ̀.
18 Помѧнѝ, ѩ҆́кѡ гнѣ́въ не заме́длитъ,
19 поне́же ме́сть нечести́вагѡ ѻ҆́гнь и҆ че́рвь.
20 Не и҆змѣнѝ дрѹ́га ни на что̀, ни бра́та пр҇на на зла́тѣ сѡфі́рстѣмъ.
21 Не ѿстѹпа́й ѿ жены̀ премѹ́дры и҆ бла́ги, и҆́бо благода́ть є҆ѧ̀ па́че зла́та.
22 Не ѡ҆ѕло́би раба̀ дѣ́лающа во и҆́стинѣ, нижѐ нае́мника вдаю́ща дѹ́шѹ свою̀.
23 Раба̀ разѹми́ва да лю́битъ дѹша̀ твоѧ̀, и҆ не лишѝ є҆го̀ свобо́ды.
24 Е҆́сть ли тѝ ско́тъ, призира́й є҆го̀, и҆ а҆́ще тѝ бѹ́детъ потре́бенъ, да пребѹ́детъ тѝ.
25 Сѹ́ть ли тѝ ча҄да, накажѝ ѧ҆̀ и҆ преклонѝ ѿ ю҆́ности вы́ю и҆́хъ.
26 Сѹ́ть ли тѝ дщє́ри, внима́й тѣ́лѹ и҆́хъ и҆ не ѩ҆влѧ́й весе́лагѡ къ ни҄мъ лица̀ твоегѡ̀.
27 Вы́дай дще́рь, и҆ бѹ́деши соверши́вый дѣ́ло вели́ко: и҆ мѹ́жеви разѹми́вѹ да́ждь ю҆̀.
28 Е҆́сть ли тѝ жена̀ по дѹшѝ, не и҆зженѝ є҆ѧ̀.
29 Всѣ́мъ се́рдцемъ твои́мъ прославлѧ́й ѻ҆тца̀ твоего̀ и҆ ма́тернихъ болѣ́зней не забѹ́ди:
30 помѧнѝ, ѩ҆́кѡ тѣ́ма рожде́нъ є҆сѝ, и҆ что̀ и҆́ма возда́си, ѩ҆́коже ѻ҆́на тебѣ̀;
31 Все́ю дѹше́ю твое́ю благоговѣ́й гд҇еви и҆ ї҆ерє́и є҆гѡ̀ чтѝ.
32 Все́ю си́лою (твое́ю) возлюбѝ сотво́ршаго тѧ̀ и҆ слѹжи́телей є҆гѡ̀ не ѡ҆ста́ви.
33 Бо́йсѧ гд҇а и҆ просла́ви ї҆ере́а, и҆ да́ждь ча́сть є҆мѹ̀, ѩ҆́коже заповѣ́дано тѝ:
34 нача́тки, и҆ ѡ҆ согрѣше́нїи, и҆ даѧ́нїе мы́шцей, и҆ же́ртвѹ ст҃ы́ни, и҆ нача́токъ ст҃ы́хъ.
35 И҆ ни́щемѹ прострѝ рѹ́кѹ твою̀, да соверши́тсѧ благослове́нїе твоѐ.
36 Благода́ть даѧ́нїѧ пред̾ всѧ́кимъ живы́мъ (да бѹ́детъ), и҆ над̾ мертвеце́мъ не возбранѝ благода́ти.
37 Не ѹ҆странѧ́йсѧ ѿ пла́чѹщихъ и҆ съ сѣ́тѹющими сѣ́тѹй.
38 Не лѣни́сѧ посѣща́ти болѧ́ща: си́ми бо возлю́бленъ бѹ́деши.
39 Во всѣ́хъ словесѣ́хъ твои́хъ помина́й послѣ҄днѧѧ твоѧ҄, и҆ во вѣ́ки не согрѣши́ши. |
