1 Менѐ ѻ҆тца̀ послѹ́шайте, ча҄да, и҆ си́це твори́те, да спасе́тесѧ:
2 гд҇ь бо просла́ви ѻ҆тца̀ на ча́дѣхъ и҆ сѹ́дъ ма́тере ѹ҆твердѝ на сынѣ́хъ.
3 Чты́й ѻ҆тца̀ ѡ҆чи́ститъ грѣхѝ,
4 и҆ ѩ҆́кѡ сокро́вищствѹѧй прославлѧ́ѧй ма́терь свою̀.
5 Чты́й ѻ҆тца̀ возвесели́тсѧ ѡ҆ ча́дѣхъ и҆ въ де́нь мольбы̀ своеѧ̀ ѹ҆слы́шанъ бѹ́детъ.
6 Прославлѧ́ѧй ѻ҆тца̀ долгоде́нствовати бѹ́детъ, и҆ послѹ́шаѧй гд҇а ѹ҆поко́итъ ма́терь свою̀.
7 Боѧ́йсѧ гд҇а почти́тъ ѻ҆тца̀ и҆ ѩ҆́кѡ влады́камъ послѹ́житъ роди́вшымъ є҆го̀.
8 Дѣ́ломъ и҆ сло́вомъ чтѝ ѻ҆тца̀ твоего̀ и҆ ма́терь, да на́йдетъ тѝ благослове́нїе ѿ ни́хъ.
9 Благослове́нїе бо ѻ҆́тчее ѹ҆твержда́етъ до́мы ча҄дъ, клѧ́тва же ма́тернѧ и҆скоренѧ́етъ до ѡ҆снова́нїѧ.
10 Не сла́висѧ въ безче́стїи ѻ҆тца̀ твоегѡ̀, нѣ́сть бо тѝ сла́ва ѻ҆́тчее безче́стїе:
11 сла́ва бо человѣ́кѹ ѿ че́сти ѻ҆тца̀ є҆гѡ̀, и҆ поноше́нїе ча́дѡмъ ма́ти въ безсла́вїи.
12 Ча́до, застѹпѝ въ ста́рости ѻ҆тца̀ твоего̀ и҆ не ѡ҆скорбѝ є҆го̀ въ животѣ̀ є҆гѡ̀:
13 а҆́ще и҆ ра́зѹмомъ ѡ҆скѹдѣва́етъ, проще́нїе и҆мѣ́й и҆ не ѡ҆безче́сти є҆го̀ все́ю крѣ́постїю твое́ю.
14 Ми́лость бо ѻ҆́тча не забве́на бѹ́детъ, и҆ проти́вѹ грѣхѡ́въ присози́ждетсѧ тебѣ̀:
15 въ де́нь ско́рби твоеѧ̀ воспомѧ́нетъ тѧ̀: ѩ҆́коже ле́дъ ѿ зно́ѧ, та́кѡ раста́ютъ грѣсѝ твоѝ.
16 Ко́ль хѹ́ленъ ѡ҆ставлѧ́ѧй ѻ҆тца̀, и҆ про́клѧтъ гд҇емъ раздража́ѧй ма́терь свою̀.
17 Ча́до, въ кро́тости дѣла̀ твоѧ҄ препровожда́й, и҆ человѣ́комъ прїѧ́тнымъ возлю́бленъ бѹ́деши.
18 Е҆ли́кѡ вели́къ є҆сѝ, толи́кѡ смирѧ́йсѧ, и҆ пред̾ гд҇емъ ѡ҆брѧ́щеши благода́ть.
19 Мно́зи сѹ́ть высо́цы и҆ сла́вни: но крѡ́ткимъ ѿкрыва́ютсѧ та҄йны,
20 ѩ҆́кѡ ве́лїѧ си́ла гд҇нѧ, и҆ смире́нными сла́витсѧ.
21 Вы́шшихъ себє̀ не и҆щѝ и҆ крѣ́пльшихъ себє̀ не и҆спытѹ́й.
22 ѩ҆̀же тѝ повєлѣ́нна, сїѧ҄ разѹмѣва́й: нѣ́сть бо тѝ потре́ба та́йныхъ.
23 Во и҆збы́тцѣхъ дѣ́лъ твои́хъ не любопы́тствѹй: вѧ҄щшаѧ бо ра́зѹма человѣ́ческагѡ пока҄зана тѝ сѹ́ть:
24 мнѡ́ги бо прельстѝ мнѣ́нїе и҆́хъ, и҆ мнѣ́нїе лѹка́вно погѹбѝ мы́сль и҆́хъ.
25 И҆ любѧ́й бѣ́дство впаде́тъ въ нѐ:
26 се́рдце же́стоко ѡ҆ѕло́битсѧ на послѣ́докъ:
27 се́рдце же́стоко ѡ҆тѧготи́тсѧ болѣ́зньми, и҆ грѣ́шникъ приложи́тъ грѣхѝ на грѣхѝ.
28 Въ наведе́нїи велича́вагѡ нѣ́сть и҆зцѣле́нїѧ: са́дъ бо лѹка́вствїѧ вкорени́сѧ въ не́мъ.
29 Се́рдце разѹми́вагѡ ѹ҆разѹмѣ́етъ при́тчѹ, и҆ ѹ҆́хо слы́шателѧ вожделѣ́нїе премѹ́драгѡ.
30 Ѻ҆́гнь горѧ́щь ѹ҆гаси́тъ вода̀, и҆ ми́лостынѧ ѡ҆чи́ститъ грѣхѝ.
31 Воздаѧ́й благода҄ти по́мнимь быва́етъ по си́хъ и҆ во вре́мѧ паде́нїѧ своегѡ̀ ѡ҆брѧ́щетъ ѹ҆твержде́нїе. |
