1 Ча́до, а҆́ще пристѹпа́еши рабо́тати гд҇еви бг҃ѹ, ѹ҆гото́ви дѹ́шѹ твою̀ во и҆скѹше́нїе:
2 ѹ҆пра́ви се́рдце твоѐ и҆ потерпѝ, и҆ не ско́ръ бѹ́ди во вре́мѧ наведе́нїѧ:
3 прилѣпи́сѧ є҆мѹ̀ и҆ не ѿстѹпѝ, да возрасте́ши на послѣ́докъ тво́й.
4 Всѐ є҆ли́ко а҆́ще нанесе́но тѝ бѹ́детъ, прїимѝ и҆ во и҆змѣне́нїи смире́нїѧ твоегѡ̀ долготерпѝ:
5 ѩ҆́кѡ во ѻ҆гнѝ и҆скѹша́етсѧ зла́то, и҆ человѣ́цы прїѧ́тни въ пещѝ смире́нїѧ.
6 Вѣ́рѹй є҆мѹ̀, и҆ застѹ́питъ тѧ̀, и҆ ѹ҆пра́ви пѹти҄ твоѧ҄ и҆ ѹ҆пова́й на́нь.
7 Боѧ́щїисѧ гд҇а, пожди́те мл҇ти є҆гѡ̀ и҆ не ѹ҆клони́тесѧ, да не паде́те.
8 Боѧ́щїисѧ гд҇а, вѣ́рѹйте є҆мѹ̀, и҆ не и҆́мать ѿпа́сти мзда̀ ва́ша.
9 Боѧ́щїисѧ гд҇а, надѣ́йтесѧ на блага҄ѧ и҆ на весе́лїе вѣ́ка и҆ ми҄лости.
10 Воззри́те на дрє́внїѧ ро́ды и҆ ви́дите, кто̀ вѣ́рова гд҇еви и҆ постыдѣ́сѧ; и҆лѝ кто̀ пребы́сть во стра́сѣ є҆гѡ̀ и҆ ѡ҆ста́висѧ; и҆лѝ кто̀ призва̀ є҆го̀, и҆ презрѣ̀ и҆̀;
11 Занѐ ще́дръ и҆ мл҇тивъ гд҇ь, и҆ ѡ҆ставлѧ́етъ грѣхѝ, и҆ сп҃са́етъ во вре́мѧ ско́рби.
12 Го́ре сердца́мъ страшли҄вымъ и҆ рѹка́мъ ѡ҆сла́блєнымъ, и҆ грѣ́шникѹ ходѧ́щѹ на двѣ̀ стєзѝ.
13 Го́ре се́рдцѹ ѡ҆сла́бленѹ, ѩ҆́кѡ не вѣ́рѹетъ: сегѡ̀ ра́ди покрове́но не бѹ́детъ.
14 Го́ре ва́мъ погѹ́бльшымъ терпѣ́нїе: и҆ что̀ сотворитѐ, є҆гда̀ посѣти́тъ гд҇ь;
15 Боѧ́щїисѧ гд҇а не сѹмнѣва́ютсѧ ѡ҆ гл҃го́лѣхъ є҆гѡ̀, и҆ лю́бѧщїи є҆го̀ сохранѧ́тъ пѹти҄ є҆гѡ̀.
16 Боѧ́щїисѧ гд҇а пои́щѹтъ бл҃говоле́нїѧ є҆гѡ̀, и҆ лю́бѧщїи є҆го̀ и҆спо́лнѧтсѧ зако́на.
17 Боѧ́щїисѧ гд҇а ѹ҆гото́вѧтъ сердца̀ своѧ҄ и҆ пред̾ ни́мъ смирѧ́тъ дѹ́шы своѧ҄, (глаго́люще:)
18 да впаде́мъ въ рѹ́цѣ гд҇ни, а҆ не въ рѹ́цѣ человѣ́чєски, ѩ҆́кѡ бо вели́чество є҆гѡ̀, та́кѡ и҆ мл҇ть є҆гѡ̀. |
