1 Всѧ́ка премѹ́дрость ѿ гд҇а и҆ съ ни́мъ є҆́сть во вѣ́къ.
2 Песка̀ морска́го, и҆ ка҄пли дождє́вныѧ, и҆ дни҄ вѣ́ка кто̀ и҆зочте́тъ;
3 Высотѹ̀ небесѐ и҆ широтѹ̀ землѝ, и҆ бе́зднѹ и҆ премѹ́дрость кто̀ и҆зслѣ́дитъ;
4 Пре́жде всѣ́хъ созда́сѧ премдрость, и҆ ра́зѹмъ мѹ́дрости ѿ вѣ́ка.
5 И҆сто́чникъ премѹ́дрости сло́во бж҃їе въ вы́шнихъ, и҆ шє́ствїѧ є҆ѧ̀ за́пѡвѣди вѣ҄чныѧ.
6 Ко́рень премѹ́дрости комѹ̀ ѿкры́сѧ; и҆ кѡва́рства є҆ѧ̀ кто̀ разѹмѣ̀;
7 Е҆ди́нъ є҆́сть премдръ, стра́шенъ ѕѣлѡ̀, сѣдѧ́й на пр҇то́лѣ свое́мъ, гд҇ь.
8 Са́мъ созда̀ ю҆̀, и҆ ви́дѣ, и҆ сочтѐ ю҆̀,
9 и҆ и҆злїѧ̀ ю҆̀ на всѧ҄ дѣла̀ своѧ҄,
10 со всѧ́кою пло́тїю по даѧ́нїю своемѹ̀, и҆ дарова̀ ю҆̀ лю́бѧщымъ є҆го̀.
11 Стра́хъ гд҇ень сла́ва и҆ похвала̀, и҆ весе́лїе и҆ вѣне́цъ ра́дости.
12 Стра́хъ гд҇ень возвесели́тъ се́рдце и҆ да́стъ весе́лїе и҆ ра́дость и҆ долгоде́нствїе.
13 Боѧ́щемѹсѧ гд҇а бла́го бѹ́детъ на послѣ́докъ, и҆ въ де́нь сконча́нїѧ своегѡ̀ ѡ҆брѧ́щетъ благода́ть. Стра́хъ гд҇ень да́ръ ѿ гд҇а и҆ на стезѧ́хъ любле́нїѧ поставлѧ́етъ.
14 Любле́нїе гд҇а пресла́внаѧ премѹ́дрость, и҆ и҆̀мже ѩ҆влѧ́етсѧ, раздѣлѧ́етъ себѐ въ вѣ́дѣнїе є҆гѡ̀.
15 Нача́ло премѹ́дрости боѧ́тисѧ гд҇а, и҆ съ вѣ́рными въ ложеснѣ́хъ созда́сѧ и҆̀мъ: съ человѣ҄ки ѡ҆снова́нїе вѣ́ка ѹ҆гнѣздѝ и҆ съ сѣ́менемъ и҆́хъ ѹ҆вѣ́ритсѧ.
16 И҆сполне́нїе премѹ́дрости є҆́же боѧ́тисѧ гд҇а, и҆ ѹ҆пои́тъ и҆̀хъ ѿ плодѡ́въ є҆ѧ̀:
17 ве́сь до́мъ и҆́хъ и҆спо́лнитъ жела́нїй свои́хъ и҆ сосѹ́ды ѿ жи҄тъ є҆ѧ̀.
18 Вѣне́цъ мѹ́дрости стра́хъ гд҇ень, возцвѣта́ѧй ми́ръ и҆ здра́вїе и҆зцѣле́нїѧ: ѻ҆боѧ́ же сѹ́ть да́ры бж҃їи, и҆ разширѧ́етъ весе́лїе лю́бѧщымъ є҆го̀.
19 И҆ ви́дѣ и҆ сочтѐ ю҆̀: хѹдо́жество и҆ вѣ́дѣнїе ра́зѹма ѡ҆дождѝ, и҆ сла́вѹ держа́щихъ ю҆̀ вознесѐ.
20 Ко́рень премѹ́дрости є҆́же боѧ́тисѧ гд҇а, и҆ вѣ҄тви є҆ѧ̀ долгоде́нствїе.
21 Стра́хъ гд҇ень ѿрѣѧ́етъ грѣхѝ: пребыва́ѧй же въ не́мъ ѿвраща́етъ гнѣ́въ.
22 Не мо́жетъ ѩ҆́рость непра́веднаѧ ѡ҆правди́тисѧ: ѹ҆стремле́нїе бо ѩ҆́рости є҆гѡ̀ паде́нїе є҆мѹ̀.
23 До вре́мене стерпи́тъ долготерпѣли́вый, и҆ послѣдѝ возда́стъ є҆мѹ̀ весе́лїе:
24 до вре́мене скры́етъ словеса̀ своѧ҄, и҆ ѹ҆стнѣ̀ вѣ́рныхъ и҆сповѣ́дѧтъ ра́зѹмъ є҆гѡ̀.
25 Въ сокро́вищихъ премѹ́дрости при́тча вѣ́дѣнїѧ: ме́рзость же грѣ́шникѹ бг҃оче́стїе.
26 Возжелѣ́въ премѹ́дрости, соблюдѝ за́пѡвѣди, и҆ гд҇ь пода́стъ ю҆̀ тебѣ̀:
27 премѹ́дрость бо и҆ наказа́нїе стра́хъ гд҇ень, и҆ благоволе́нїе є҆гѡ̀ вѣ́ра и҆ кро́тость.
28 Не сѹмнѣва́йсѧ ѡ҆ стра́сѣ гд҇ни и҆ не пристѹпѝ къ немѹ̀ се́рдцемъ раздвое́нымъ.
29 Не лицемѣ́рствѹй пред̾ ѹ҆сты҄ человѣ́ческими и҆ ѹ҆стна́мъ твои҄мъ вонмѝ.
30 Не возноси́сѧ, да не паде́ши и҆ наведе́ши дѹшѝ твое́й безче́стїе, и҆ ѿкры́етъ гд҇ь та҄йнаѧ твоѧ҄ и҆ посредѣ̀ со́нма низложи́тъ тѧ̀: ѩ҆́кѡ не пристѹпи́лъ є҆сѝ во и҆́стинѣ ко стра́хѹ гд҇ню, и҆ се́рдце твоѐ и҆спо́лнено лѹка́вства. |
