1 Преподѡ́бнымъ же твои҄мъ превели́къ бѣ̀ свѣ́тъ: и҆́хже ѹ҆́бѡ гла́съ слы́шаше, ѡ҆́браза же не ви́дѧще, зане́же ѹ҆́бѡ и҆ ѻ҆нѝ (тогѡ́жде) не страда́хѹ, ѹ҆блажа́хѹ.
2 А҆ ѩ҆́кѡ не па́коствѹютъ пред̾ѡби́димїи, благодарѧ́хѹ, и҆ є҆́же пронести́сѧ, благода́ти молѧ́хѹ.
3 Си́хъ ра́ди сто́лпъ ѻ҆гнегорѧ́щь, вожда̀ ѹ҆́бѡ невѣ́домагѡ пѹтьше́ствїѧ, со́лнце же невреди́телное любоче́стнагѡ стра́нствованїѧ по́далъ є҆сѝ.
4 Досто́йни бо ѻ҆нѝ лиши́тисѧ свѣ́та и҆ блюсти́сѧ во тмѣ̀, и҆̀же заключе́ныхъ стрежа́хѹ сынѡ́въ твои́хъ, и҆́миже и҆мѧ́ше нетлѣ́нный зако́на свѣ́тъ вѣ́кѹ да́тисѧ.
5 Совѣ́товавшихъ же и҆́хъ ѹ҆бива́ти младе́нцы преподо́бныхъ, и҆ є҆ди́номѹ ѿложе́нѹ ча́дѹ и҆ спасе́нѹ, во ѡ҆бличе́нїе и҆́хъ ѿѧ́лъ є҆сѝ мно́жество ча҄дъ, и҆ кѹ́пнѡ погѹби́лъ є҆сѝ въ водѣ̀ ѕѣ́лнѣй.
6 Ѻ҆́наѧ бо но́щь пред̾ѹвѣ́дѣна бы́сть ѻ҆тцє́мъ на́шымъ, да тве́рдѡ вѣ́дѹще, и҆̀мже клѧ́твамъ вѣ́роваша, возблагодѹ́шествѹютъ.
7 Воспрїѧ́то же бы́сть ѿ люді́й твои́хъ спасе́нїе ѹ҆́бѡ пра́ведныхъ, врагѡ́въ же и҆стребле́нїе:
8 и҆́мже бо наказа́лъ є҆сѝ сѹпоста́ты на́шѧ, си́мъ на́съ призва́въ просла́вилъ є҆сѝ.
9 Сокрове́ннѡ бо жрѧ́хѹ преподо́бнїи ѻ҆́троцы благи́хъ, и҆ зако́нъ бж҇твенный є҆диномы́слїемъ завѣща́ша, та҄ѧжде подо́бнѡ, блага҄ѧ же и҆ бѣ́дствєннаѧ воспрїима́ти ст҃ы҄мъ, ѻ҆тцє́мъ ѹ҆жѐ предвоспѣва́ющымъ хвалѹ̀.
10 Противогласѧ́ше же несогла́сный врагѡ́въ во́пль, и҆ плаче́вный слы́шашесѧ гла́съ пла́чѹщихъ младе́нцєвъ.
11 Подо́бною же ме́стїю ра́бъ кѹ́пнѡ съ господи́номъ казне́нъ бы́сть, и҆ просты́й человѣ́къ съ царе́мъ та҄ѧжде пострада̀:
12 є҆динодѹ́шнѡ же всѝ во є҆ди́нѣмъ и҆́мени сме́ртнѣмъ ме́ртвыхъ и҆мѣ́ѧхѹ безчи́сленныхъ: ниже́ бо ко погребе́нїю живі́и бѧ́хѹ дово́лни, поне́же во є҆ди́нѣмъ мгнове́нїи честнѣ́йшїй ро́дъ и҆́хъ и҆стребле́нъ бы́сть.
13 Ѡ҆ всѣ́хъ бо не вѣ́рѹюще ра́ди чародѣѧ́нїй, а҆ ра́ди пе́рвенцєвъ и҆стребле́нїѧ, и҆сповѣ́даша люді́й сынѡ́въ бж҃їихъ бы́ти.
14 Ти́хомѹ бо молча́нїю содержа́щѹ всѧ҄, и҆ но́щи во свое́мъ тече́нїи преполовлѧ́ющейсѧ,
15 всемогѹ́щее сло́во твоѐ, (гд҇и,) съ нб҃съ ѿ пр҇то́лѡвъ цр҇кихъ же́стокъ ра́тникъ въ среди́нѹ поги́бельныѧ землѝ сни́де.
16 Ме́чь ѻ҆́стръ нелицемѣ́рное повелѣ́нїе твоѐ носѧ́й, и҆ ста́въ и҆спо́лни всѧ҄ сме́рти: и҆ небесѐ ѹ҆́бѡ каса́шесѧ, стоѧ́ше же на землѝ.
17 Тогда̀ внеза́пѹ привидѣ҄нїѧ ѹ҆́бѡ снѡ́въ лю́тѣ смѹти́ша и҆̀хъ, стра́си же наидо́ша неча́ѧнни,
18 и҆ и҆́нъ и҆на́мѡ ве́рженъ є҆́ле жи́въ, є҆ѧ́же ра́ди вины̀ ѹ҆мира́ше, ѡ҆б̾ѧвлѧ́ше:
19 сѡ́нїѧ бо, смѹти́вше и҆̀хъ, сїѐ предвозвѣсти́ша: да не вѣ́дѧще, є҆гѡ́же ра́ди ѕлѣ̀ стра́ждѹтъ, поги́бнѹтъ.
20 Прикоснѹ́сѧ же нѣ́когда и҆ пра́ведныхъ и҆скѹше́нїе сме́рти, пораже́нїе во пѹсты́ни бы́сть мно́жества: но не до́лгѡ пребы́сть гнѣ́въ.
21 Потща́всѧ бо мѹ́жъ непоро́ченъ предпобо́рствова, своеѧ̀ слѹ́жбы ѻ҆рѹ́жїе, моли́твѹ и҆ ѳѷмїа́ма ѹ҆милостивле́нїе прине́съ, сопроти́въ ста̀ гнѣ́вѹ и҆ коне́цъ положѝ бѣ́дствованїю, показа́въ, ѩ҆́кѡ тво́й є҆́сть ра́бъ.
22 Ѡ҆долѣ́ же поража́ющаго не си́лою тѣле́сною, нижѐ ѻ҆рѹ́жїѧ дѣ́йствїемъ, но сло́вомъ покорѝ наказѹ́ющаго, клѧ҄твы ѻ҆тцє́въ и҆ завѣ́ты воспомѧнѹ́въ.
23 Грома́дами бо ѹ҆жѐ па́дшымъ дрѹ́гъ на дрѹ́га мє́ртвымъ, посредѣ̀ ста́въ, пресѣчѐ гнѣ́въ и҆ раздѣлѝ къ живы҄мъ пѹ́ть.
24 На ѻ҆де́жди бо поди́ра бѣ̀ ве́сь мі́ръ, и҆ ѻ҆тцє́въ сла҄вы на и҆зваѧ́нїи четырерѧдова́гѡ ка́менїѧ, и҆ вели́чество твоѐ на дїади́мѣ главы̀ є҆гѡ̀.
25 Си҄мъ ѹ҆стѹпи́лъ и҆скоренѧ́ѧй и҆ си́хъ ѹ҆страши́сѧ: бѣ́ бо то́кмѡ и҆скѹше́нїе гнѣ́ва дово́лно. |
