1 Ѹ҆пра́ви дѣла̀ и҆́хъ рѹко́ю про҇ро́ка ст҃а́гѡ:
2 проидо́ша пѹсты́ню неѡбита́ннѹю и҆ въ непроходи́мыхъ водрѹзи́ша кѹ́щы,
3 сопроти́вишасѧ сѹпоста́тѡмъ и҆ ѿмсти́ша врагѡ́мъ:
4 возжада́ша и҆ призва́ша тебѐ, и҆ дана̀ бы́сть и҆̀мъ вода̀ ѿ ка́мене несѣко́магѡ и҆ и҆зцѣле́нїе жа́жды ѿ ка́мене же́стока.
5 И҆́миже бо нака́зани бы́ша вразѝ и҆́хъ,
6 си́ми сі́и во ѡ҆скѹдѣ́нїи сѹ́ще благодѣ́телствовани бы́ша:
7 за и҆сто́чникъ ѹ҆́бѡ пр҇нотекѹ́щїѧ рѣкѝ, кро́вїю и҆злїѧ́нною смѧте́нныѧ,
8 во ѡ҆бличе́нїе младенцеѹбі́йственнагѡ повелѣ́нїѧ, да́лъ є҆сѝ и҆̀мъ и҆з̾ѻби́лнѹ во́дѹ безнаде́жнѡ,
9 показа́въ тогда̀ жа́ждею, ка́кѡ проти́вныхъ ѹ҆мѹ́чилъ є҆сѝ.
10 Е҆гда́ бо и҆скѹше́ни бы́ша и҆ въ ми́лости нака́зани, позна́ша, ка́кѡ во гнѣ́вѣ сѹди́мїи нечести́вїи мѹ́чишасѧ:
11 си́хъ бо ѩ҆́кѡ ѻ҆ц҃ъ ѹ҆ча́щь и҆скѹси́лъ є҆сѝ, ѻ҆́нѣхъ же ѩ҆́кѡ же́стокъ цр҃ь ѡ҆сѹжда́ѧ и҆стѧза́лъ є҆сѝ.
12 Ѿстоѧ́щїи же и҆ присѹ́тствѹющїи та́кожде мѹ́чишасѧ:
13 сѹгѹ́ба бо и҆̀хъ прїѧ́тъ печа́ль и҆ стена́нїе съ па́мѧтїю минѹ́вшихъ.
14 Е҆гда́ бо слы́шахѹ свои́ми мѹчє́нїи благодѣ́йствѹемыхъ ѻ҆́ныхъ, познава́хѹ гд҇а:
15 є҆го́же бо дре́вле во ѿложе́нїи ѿве́ржена ѿреко́шасѧ смѣю́щесѧ, при концы̀ собы́тїѧ ѹ҆диви́шасѧ, неподо́бною пра́вєднымъ томи́ми жа́ждею.
16 За помышлє́нїѧ же безѹ҄мнаѧ непра́вды и҆́хъ, въ ни́хже заблѹди́вше почита́хѹ безсловє́снаѧ пресмыка҄ющаѧсѧ и҆ ѕвѣре́й хѹды́хъ, посла́лъ є҆сѝ и҆̀мъ мно́жество безслове́сныхъ живо́тныхъ во ѿмще́нїе,
17 да позна́ютъ, ѩ҆́кѡ и҆́миже кто̀ согрѣша́етъ, си́ми и҆ мѹ́читсѧ.
18 Не неможа́ше бо всеси́льнаѧ рѹка̀ твоѧ̀, ѩ҆́же сотворѝ мі́ръ ѿ без̾ѡбра́знагѡ вещества̀, посла́ти на ни́хъ мно́жество медвѣ́дей, и҆лѝ лю́тыхъ львѡ́въ,
19 и҆лѝ новосозда́нныхъ ѩ҆́рости и҆спо́лненыхъ ѕвѣре́й незна́емыхъ, и҆лѝ ѻ҆́гненнымъ ды́шѹщихъ дѹ́хомъ, и҆лѝ ѕлосмра́дный произносѧ́щихъ ды́мъ, и҆лѝ стра҄шныѧ и҆з̾ ѻ҆че́й и҆́скры и҆спѹска́ющихъ:
20 и҆́хже не то́кмѡ вре́дъ можа́ше и҆стреби́ти ѧ҆̀, но и҆ зра́къ ѹ҆страша́ющь погѹби́ти.
21 И҆ без̾ тѣ́хъ, є҆ди́нымъ дѹ́хомъ па́сти мого́ша, ѿ сѹда̀ гони́ми и҆ развѣ́ѧни ѿ дх҃а си́лы твоеѧ̀: но всѧ҄ мѣ́рою и҆ число́мъ и҆ вѣ́сомъ расположи́лъ є҆сѝ.
22 Е҆́же бо мно́гѡ мощѝ, присѹ́тствѹетъ тебѣ̀ всегда̀, и҆ держа́вѣ мы́шцы твоеѧ̀ кто̀ сопроти́витсѧ;
23 Поне́же, ѩ҆́коже стра́жикъ въ превѣ́сѣхъ, (та́кѡ) ве́сь мі́ръ пред̾ тобо́ю, и҆ ѩ҆́кѡ ка́плѧ росы̀ ѹ҆́треннїѧ, сходѧ́щїѧ на зе́млю.
24 Ми́лѹеши же всѣ́хъ, ѩ҆́кѡ всѧ҄ мо́жеши, и҆ презира́еши грѣхѝ человѣ́кѡмъ въ покаѧ́нїе.
25 Лю́биши же сѹ҄щаѧ всѧ҄, и҆ ни чесогѡ́же гнѹша́ешисѧ, ѩ҆̀же сотвори́лъ є҆сѝ: ниже́ бо ненави́дѧ что̀ ѹ҆стро́илъ є҆сѝ.
26 Ка́кѡ же пребы́ло бы что̀, а҆́ще бы ты̀ не и҆зво́лилъ є҆сѝ; и҆лѝ, є҆́же не нарѣче́но ѿ тебє̀, сохрани́лосѧ бы;
27 Щади́ши же всѧ҄, ѩ҆́кѡ твоѧ҄ сѹ́ть, влдко дш҃елю́бче! |
