1 Првдныхъ не дѹ́ши въ рѹцѣ̀ бж҃їей, и҆ не прико́снетсѧ и҆́хъ мѹ́ка.
2 Непщева́ни бы́ша во ѻ҆́чїю безѹ́мныхъ ѹ҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ,
3 и҆ є҆́же ѿ на́съ ше́ствїе сокрѹше́нїе: ѻ҆ни́ же сѹ́ть въ ми́рѣ.
4 И҆́бо пред̾ лице́мъ человѣ́ческимъ а҆́ще и҆ мѹ́кѹ прїи́мѹтъ, ѹ҆пова́нїе и҆́хъ безсме́ртїѧ и҆спо́лнено:
5 и҆ вма́лѣ нака́зани бы́вше, вели́кими благодѣ́телствовани бѹ́дѹтъ, ѩ҆́кѡ бг҃ъ и҆скѹсѝ и҆̀хъ и҆ ѡ҆брѣ́те и҆̀хъ достѡ́йны себѣ̀:
6 ѩ҆́кѡ зла́то въ горни́лѣ и҆скѹсѝ и҆̀хъ, и҆ ѩ҆́кѡ всепло́дїе же́ртвенное прїѧ́тъ ѧ҆̀.
7 И҆ во вре́мѧ посѣще́нїѧ и҆́хъ возсїѧ́ютъ, и҆ ѩ҆́кѡ и҆́скры по сте́блїю потекѹ́тъ:
8 сѹ́дѧтъ ѩ҆зы́кѡмъ и҆ ѡ҆блада́ютъ людьмѝ, и҆ воцр҃и́тсѧ въ ни́хъ гд҇ь во вѣ́ки.
9 Надѣ́ющїисѧ на́нь ѹ҆разѹмѣ́ютъ и҆́стинѹ, и҆ вѣ́рнїи въ любвѝ пребѹ́дѹтъ є҆мѹ̀, ѩ҆́кѡ блгдть и҆ мл҇ть въ прпдбныхъ є҆гѡ̀ и҆ посѣще́нїе во и҆збра́нныхъ є҆гѡ̀.
10 Нечести́вїи же, ѩ҆́кѡ помы́слиша, прїи́мѹтъ запреще́нїе, и҆̀же неради́вшїи ѡ҆ првднѣмъ и҆ ѿ гд҇а ѿстѹпи́вше.
11 Премѹ́дрость бо и҆ наказа́нїе ѹ҆ничижа́ѧй ѡ҆каѧ́ненъ, и҆ пра́здно ѹ҆пова́нїе и҆́хъ, и҆ трѹды̀ безплѡ́дны, и҆ неключи҄ма дѣла̀ и҆́хъ:
12 жєны̀ и҆́хъ безѹ҄мны и҆ лѹка҄ва ча҄да и҆́хъ, про́клѧто рожде́нїе и҆́хъ.
13 ѩ҆́кѡ блаже́на є҆́сть непло́ды неѡскверне́наѧ, ѩ҆́же не позна̀ ло́жа во грѣсѣ̀, и҆мѣ́ти бѹ́детъ пло́дъ въ посѣще́нїи дѹ́шъ:
14 и҆ є҆ѵнѹ́хъ, и҆́же не содѣ́ла въ рѹкѹ̀ (своє́ю) беззако́нїѧ, нижѐ помы́сли на гд҇а лѹка҄ваѧ, да́стсѧ бо є҆мѹ̀ вѣ́ры благода́ть и҆збра́нна и҆ жре́бїй во хра́мѣ гд҇ни ѹ҆го́днѣйшїй.
15 Благи́хъ бо трѹдѡ́въ пло́дъ благосла́венъ, и҆ не ѿпа́дающь ко́рень ра́зѹма.
16 Ча҄да же прелюбодѣ́євъ несовершє́на бѹ́дѹтъ, и҆ ѿ законопрестѹ́пнагѡ ло́жа сѣ́мѧ и҆зче́знетъ:
17 а҆́ще бо долгоживо́тни бѹ́дѹтъ, ни во что́же вмѣнѧ́тсѧ, и҆ безче́стна на послѣ́докъ ста́рость и҆́хъ:
18 а҆́ще же ско́рѡ сконча́ютсѧ, не бѹ́дѹтъ и҆мѣ́ти ѹ҆пова́нїѧ, нижѐ въ де́нь сѹда̀ ѹ҆тѣше́нїѧ:
19 ро́да бо непра́веднагѡ лю҄таѧ ѡ҆конча҄нїѧ. |
