1 Совлецы̀, ї҆ер҇ли́ме, ри҄зы плачє́вныѧ и҆ ѡ҆ѕлобле́нїѧ твоегѡ̀ и҆ ѡ҆блецы́сѧ въ лѣ́потѹ сла́вы, ѩ҆́же тебѣ̀ бы́сть ѿ бг҃а во вѣ́къ.
2 Ѡ҆блецы́сѧ во ѻ҆де́ждѹ пра́вды, ѩ҆́же ѿ бг҃а, возложѝ вѣне́цъ на главѹ̀ твою̀ сла́вы вѣ́чнагѡ.
3 Бг҃ъ бо ѩ҆ви́тъ все́й поднебе́снѣй твою̀ свѣ́тлость.
4 Нарѣче́тсѧ бо ѿ бг҃а и҆́мѧ твоѐ во вѣ́ки: ми́ръ пра́вды и҆ сла́ва бг҃оче́стїѧ.
5 Воста́ни, ї҆ер҇ли́ме, и҆ ста́ни на высо́цѣ, и҆ поглѧ́дай на восто́ки, и҆ ви́ждь сѡ́бранаѧ ча҄да твоѧ҄ ѿ востѡ́къ со́лнца до за́пада сло́вомъ ст҃а́гѡ, ра҄дѹющаѧсѧ бж҃їею па́мѧтїю.
6 И҆зыдо́ша бо ѿ тебє̀ пѣ́ши ведо́ми ѿ врагѡ́въ, введе́тъ же ѧ҆̀ бг҃ъ къ тебѣ̀ несо́мыхъ со сла́вою, ѩ҆́кѡ сы́ны ца́рства.
7 Совѣща́ бо бг҃ъ смири́тисѧ всѧ́цѣй горѣ̀ высо́цѣй и҆ холмѡ́мъ вѣ҄чнымъ, и҆ ю҆до́лїѧмъ напо́лнитисѧ въ ра́вень земнѹ́ю, да и҆́детъ ї҆и҃ль ѹ҆тверже́нъ сла́вою бж҃їею.
8 Ѡ҆сѣни́ша же и҆ дѹбра҄вы и҆ всѧ́ко дре́во благово́нствомъ ї҆и҃лю, повелѣ́нїемъ бж҃їимъ.
9 Пред̾и́детъ бо бг҃ъ ї҆и҃леви со весе́лїемъ, свѣ́томъ сла́вы своеѧ̀, съ поми́лованїемъ и҆ пра́вдою, ѩ҆́же ѿ негѡ̀. |
