Библия, в҃ маккавей́скаѧ, Глава 12. is available here: https://www.bible.promo/chapters.php?id=11219&pid=70&tid=2&bid=85
Holy Bible project logo icon
FREE OFF-line Bible for Android Get Bible on Google Play QR Code Android Bible

Holy Bible
for Android

is a powerful Bible Reader which has possibility to download different versions of Bible to your Android device.

Bible Verses
for Android

Bible verses includes the best bible quotes in more than 35 languages

Pear Bible KJV
for Android

is an amazing mobile version of King James Bible that will help you to read this excellent book in any place you want.

Pear Bible BBE
for Android

is an amazing mobile version of Bible in Basic English that will help you to read this excellent book in any place you want.

Pear Bible ASV
for Android

is an amazing mobile version of American Standard Version Bible that will help you to read this excellent book in any place you want.

BIBLE VERSIONS / Библия / Новый Завет / в҃ маккавей́скаѧ

Библия - Церковнославянская

а҃ маккавей́скаѧ в҃ маккавей́скаѧ г҃ маккавей́скаѧ

Глава 1 2 3 4 5 6 7 8 9 10 11 12 13 14 15

1 Содѣ҄ѧннымъ же бы́вшымъ завѣ́тѡмъ си҄мъ, лѷсі́а ѹ҆́бѡ ѿи́де ко царю̀, ї҆ѹде́є же въ земледѣ́лїи ѹ҆пражнѧ́хѹсѧ.

2 Ѿ сѹ́щихъ же по мѣстѡ́мъ воево́дъ, тїмоѳе́й и҆ а҆поллѡ́нїй сы́нъ гене́овъ, є҆ще́ же ї҆ерѡиѵ́мъ и҆ димофѡ́нъ, къ си҄мъ же и҆ нїкано́ръ кѷпрїа́рхъ, не ѡ҆ставлѧ́хѹ и҆̀хъ благостоѧ́ти и҆ въ поко́и бы́ти.

3 Ї҆ѻппі́ане же толи́ко сотвори́ша нече́стїе, ѹ҆моли́вше ї҆ѹдє́й съ ни́ми живѹ́щихъ вни́ти во предста́влєныѧ ѿ ни́хъ ладїи҄ съ жена́ми и҆ ча́ды, а҆́кибы ни є҆ди́нѣй враждѣ̀ междѹ̀ и҆́ми настоѧ́щей:

4 на ѻ҆́бщее же ѹ҆ставле́нїе гра́дское и҆ си҄мъ соизво́лившымъ, ѩ҆́кѡ ми́ръ и҆мѣ́ти хотѧ́щымъ и҆ ничто́же подозрѣ́нїѧ и҆мѹ́щымъ, ѿве́зше и҆̀хъ погрѹзи́ша, сѹ́щхъ не мнѣ́е двѹ̀ сѡ́тъ.

5 Позна́въ же ї҆ѹ́да бы́вшѹю на сро́дники своѧ҄ же́стокость, возвѣсти́въ мѹжє́мъ и҆̀же съ ни́мъ и҆ призва́въ првднаго сѹдїю̀ бг҃а,

6 прїи́де на скверноѹбі́йцъ бра́тїй є҆гѡ̀, и҆ приста҄нища но́щїю сожжѐ, и҆ ладїи҄ попалѝ, избѣ́гшихъ же ѿ ѻ҆гнѧ̀ закла̀.

7 Странѣ́ же заключе́нѣ бы́вшей ѿи́де, ѩ҆́кѡ па́ки прїитѝ и҆мѹ́щь и҆ всѐ ї҆ѻппі́анъ и҆скорени́ти гражда́нство.

8 Ѹ҆разѹмѣ́въ же, ѩ҆́кѡ и҆ во а҆мні́и живѹ́щїй хотѧ́тъ ѡ҆бита́ющымъ ї҆ѹде́ѡмъ тѣ́мже ѡ҆́бразомъ сотвори́ти,

9 и҆ на ї҆амні́тѧнъ но́щїю напа́дъ, зажжѐ приста́нище съ кораблѧ́ми ѩ҆́кѡ ѩ҆ви́тисѧ зарѧ́мъ ѻ҆гнѧ̀ во ї҆ер҇ли́мѣ, ста́дїѧмъ сѹ́щымъ двѹ́мъ ста́мъ четы́редесѧти.

10 Ѿтѹ́дѹ же ѿше́дшымъ де́вѧть ста́дїй, творѧ́щымъ пѹ́ть на тїмоѳе́а, срази́шасѧ съ ни́мъ а҆ра́влѧнъ мно́жае пѧтѝ ты́сѧщъ мѹже́й и҆ кѡ́нникъ пѧ́ть сѡ́тъ.

11 Бы́вшей же крѣ́пцѣй бра́ни, и҆ сѹ́щымъ при ї҆ѹ́дѣ по́мощїю бж҃їею преѹспѣва́ющымъ, напо́льнїи а҆ра́влѧне ѡ҆долѣ́ни, проша́хѹ ѿ ї҆ѹ́ды десни́цы себѣ̀, ѡ҆бѣща́юще и҆ па́жить да́ти и҆ во про́чїихъ по́льзовати и҆̀хъ.

12 Ї҆ѹ́да же ѹ҆разѹмѣ́въ, ѩ҆́кѡ и҆́стиннѡ во мно́гихъ ѻ҆нѝ потре́бни, ѡ҆бѣща̀ ми́ръ содержа́ти съ ни́ми: взѧ́вше же десни́цѹ, ѿидо́ша въ кѹ́щы своѧ҄.

13 Нападе́ же и҆ на нѣ́кїй гра́дъ моста́ми тве́рдъ и҆ стѣна́ми ѡ́гражде́нъ, и҆́же ѿ всѧ́кихъ смѣ́шеныхъ ѩ҆зы́кѡвъ ѡ҆бита́емый, є҆мѹ́же и҆́мѧ ка́спїнъ.

14 Сѹ́щїи же внѹтрѝ надѣ́ющесѧ на крѣ́пость стѣ́нъ и҆ на ѹ҆готовле́нїе бра́шенъ, неради́вѡ пребыва́хѹ, проклина́юще сѹ́щихъ при ї҆ѹ́дѣ, и҆ ктомѹ̀ хѹлѧ́ще, и҆ глаго́люще, ѩ҆̀же не подоба́етъ.

15 Сѹ́щїи же со ї҆ѹ́дою призва́вше вели́каго ѡ҆блада́телѧ мі́ра, и҆́же без̾ ѻ҆внѡ́въ и҆ меха́нїческихъ ѻ҆рѹ́дїй во времена̀ ї҆исѹ́са разрѹшѝ ї҆ерїхѡ́нъ, нападо́ша ѕвѣроѡбра́знѡ на стѣ́нѹ.

16 И҆ взе́мше гра́дъ бж҃їею во́лею, безчи́слєнна закла҄нїѧ сотвори́ша, ѩ҆́кѡ прилежа́щемѹ є҆́зерѹ, въ широтѹ̀ и҆мѹ́щемѹ ста҄дїи двѣ̀, текѹ́щею (ѹ҆бїенныхъ) кро́вїю и҆сполненѹ ѩ҆ви́тисѧ.

17 Ѿтѹ́дѹ же ѿше́дше ста́дїй се́дмь сѡ́тъ пѧтьдесѧ́тъ, прїидо́ша въ хара́къ, ко глаго́лємымъ тѹві́инѡмъ ї҆ѹде́ѡмъ.

18 И҆ тїмоѳе́а ѹ҆́бѡ на мѣ́стѣхъ не достиго́ша, ни є҆ди́но дѣ́ло соверши́вша ѿ мѣ́стъ ѿше́дша, ѡ҆ста́вльша же стра́жѹ въ нѣ́коемъ мѣ́стѣ ѕѣлѡ̀ тве́рдѹ:

19 досїѳе́й же и҆ сѡсїпа́тръ сѹ́щїи ѿ воево́дъ, и҆̀же со маккаве́омъ, и҆зше́дше погѹби́ша ѿ тїмоѳе́а ѡ҆ста́вшихъ въ тверды́ни бо́лѣе десѧтѝ ты́сѧщъ мѹже́й.

20 Маккаве́й же ѹ҆стро́ивъ вѡ́ѧ своѧ҄ по полкѡ́мъ, поста́ви и҆́хъ над̾ полка́ми, и҆ на тїмоѳе́а по́йде и҆мѹ́щаго съ собо́ю сто два́десѧть ты́сѧщъ пѣшє́цъ, кѡ́нникъ же двѣ̀ ты́сѧщы и҆ пѧ́ть сѡ́тъ.

21 Позна́въ же тїмоѳе́й прише́ствїе ї҆ѹ́дино, посла̀ жєны̀ и҆ дѣ́ти и҆ прѡ́чаѧ ѹ҆готѡ́ванїѧ въ тверды́ню нарица́емѹю карні́ю: бѣ̀ бо непребори́ма и҆ ко всхо́дѹ неѹдобна ра́ди тѣсноты̀ всѣ́хъ мѣ́стъ.

22 Е҆гда́ же по́лкъ ї҆ѹ́динъ пе́рвый ѩ҆ви́сѧ, и҆ бы́сть ѹ҆́жасъ на сѹпоста́ты и҆ стра́хъ ѿ ѩ҆вле́нїѧ всеви́дѧщагѡ бы́вшагѡ на ни́хъ, въ бѣ́гство ѹ҆стреми́шасѧ є҆ди́нъ ѿ дрѹга́гѡ бѣжа́щь, ѩ҆́кѡ мно́жицею ѿ свои́хъ повреди́шасѧ и҆ ѻ҆рѹ́жїи свои́ми пробода́хѹсѧ.

23 Творѧ́ше же ї҆ѹ́да гоне́нїе прилѣ́жнѡ, ѹ҆бива́ѧ и҆ноплеме́нникѡвъ, и҆ и҆збѝ ѿ ни́хъ три́десѧть ты́сѧщъ мѹже́й.

24 Са́мъ же тїмоѳе́й впа́дъ междѹ̀ сѹ́щихъ со досїѳе́емъ и҆ сѡсїпа́тромъ, со мно́гимъ ѹ҆хищре́нїемъ молѧ́ше, да жи́въ ѿпѹ́сти́тсѧ: занѐ мно́гихъ ѹ҆́бѡ (ѿ ї҆ѹдє́й) роди́телей и҆ нѣ́кїихъ бра́тїю и҆мѣ́ѧше (ѹ҆ себє̀), и҆ си҄мъ ѕло̀ слѹчи́тсѧ, а҆́ще ѹ҆́мретъ.

25 Е҆гда́ же мно́гими словесы̀ вѣроѧ́тенъ сотворѝ ѡ҆бѣ́тъ, є҆́же возврати́ти ѻ҆́ныхъ невре́дныхъ, пѹсти́ша є҆го̀ ра́ди спасе́нїѧ бра́тїи.

26 И҆зше́дъ же (маккаве́й) на карні́ю и҆ на а҆тарга́тїю, ѹ҆бѝ два́десѧть пѧ́ть ты́сѧщъ.

27 По побѣ́дѣ же си́хъ и҆ погѹбле́нїи ѡ҆братѝ ї҆ѹ́да во́инство и҆ на є҆фрѡ́нъ, гра́дъ тве́рдый, въ не́мже живѧ́ше лѷсі́а и҆ мно́жество ра́зныхъ ѩ҆зы҄къ: ю҆́нѡши же си́льнїи стоѧ́ще пред̾ стѣна́ми крѣ́пкѡ противѹра́товахѹ, въ не́мже бѣ́хѹ ѻ҆рѹ҄дїѧ и҆ стрѣ́лъ мно́гое ѹ҆готовле́нїе.

28 Призва́вше же всеси́льнаго съ держа́вою сокрѹша́ющаго ра́тныхъ си҄лы, взѧ́ша гра́дъ под̾ рѹ́кѹ и҆ ѹ҆би́ша сѹ́щихъ внѹ́трь два́десѧть пѧ́ть ты́сѧщъ:

29 и҆ ѿше́дше ѿтѹ́дѹ ѹ҆стреми́шасѧ на скѵ́ѳскїй гра́дъ, ѿстоѧ́щь ѿ ї҆ер҇ли́ма ста́дїй ше́сть сѡ́тъ.

30 Ѡ҆свидѣ́телствовавшымъ же живѹ́щымъ та́мѡ ї҆ѹде́ѡмъ ѡ҆ скѵ́ѳскихъ гра́жданѣхъ, ѩ҆́кѡ и҆мѣ́ютъ къ ни҄мъ благопрїѧ́тство и҆ во времена̀ ѕлополѹ́чнаѧ кро́тцы пребыва́хѹ,

31 благодари́вше и҆̀мъ и҆ ѹ҆моли́вше, дабы̀ и҆ въ про́чее къ ро́дѹ и҆́хъ благопрїѧ́тни бы́ли, прїидо́ша во ї҆ер҇ли́мъ, дню̀ вели́кагѡ пра́здника седми́цъ настоѧ́щѹ.

32 По глаго́лемей же пентико́стїи, и҆до́ша проти́вѹ горгі́а страти́га ї҆дѹме́йска.

33 И҆зы́де же съ пѣшцы҄ тремѝ ты́сѧщьми, и҆ кѡ́нникъ четы́ре ста҄,

34 и҆ сотво́ршымъ бра́нь, слѹчи́сѧ па́сти ма҄лымъ ѿ ї҆ѹдє́й.

35 Досїѳе́й же нѣ́кто ѿ вакино́ра, ко́нный мѹ́жъ и҆ крѣ́покъ, ѩ҆́тъ горгі́ю, и҆ взе́мъ є҆го̀ за хламѵ́дѹ, ведѧ́ше є҆го̀ крѣ́пкѡ, и҆ хотѧ́щь проклѧ҄таго взѧ́ти жи́ва, нѣ́кто ѿ ѳракі́йскихъ кѡ́нникъ нападѐ на́нь и҆ ра́мо ѿсѣчѐ, горгі́а же и҆збѣжѐ во марїсѹ̀.

36 Во́инѡмъ же горгі́євымъ на мно́зѣ борю́щымсѧ и҆ ѹ҆трѹждє́ннымъ бы́вшымъ, призва́въ ї҆ѹ́да гд҇а спомо́щника, да бѹ́детъ и҆ воево́да бра́ни,

37 нача́тъ гла́сомъ ѻ҆те́ческимъ съ пѣ́сньми во́пль, возопи́въ и҆ неча́ѧннѣ на вѡ́ѧ горгі́євы напа́дъ, въ бѣ́гство и҆́хъ ѡ҆братѝ.

38 Ї҆ѹ́да же собра́въ вѡ́ѧ прїи́де во гра́дъ ѻ҆долла́мъ: и҆ є҆гда̀ седмы́й де́нь прмїи́де, по ѡ҆бы́чаю ѡ҆чи́стившесѧ въ то́мъ мѣ́стѣ сѹббѡ́тѹ пра́здноваша.

39 На ѹ҆́трїе же прїи́де со свои́ми ї҆ѹ́да, да, ѩ҆́коже подоба́ше, тѣлеса̀ па́дшихъ во́зметъ и҆ со сро́дниками положи́тъ во гробѣ́хъ ѻ҆те́ческихъ.

40 Ѡ҆брѣто́ша же ѹ҆ коегѡ́ждо ѿ ѹ҆ме́ршихъ под̾ ри́зами ѹ҆бїе́нныхъ ѿ дарѡ́въ їдѡлскихъ, ѩ҆̀же во ї҆амні́и, ѡ҆ ни́хже зако́нъ запреща́ше ї҆ѹде́ѡмъ, всѣ҄мъ же ѩ҆́ве бы́сть, ѩ҆́кѡ сеѧ̀ ра́ди вины̀ ті́и падо́ша.

41 Всѝ ѹ҆̀бо благослови́вше пра́вый сѹ́дъ гдї҄ень, ѩ҆̀кѡ та҄йнаѧ сотворѝ ѩ҆влє́на,

42 къ моле́нїю ѡ҆брати́шасѧ моли́вше, да сотворе́ный грѣ́хъ весьма̀ и҆згла́дитсѧ: до́бльственный же ї҆ѹ́да молѧ́ше люді́й, да сохранѧ́тъ себѐ ѿ грѣха̀, ѻ҆чи́ма ви́дѧще бы҄вшаѧ па́дшихъ за грѣ́хъ.

43 И҆ сотвори́въ ѿ мѹже́й собра́нїе ѹ҆́тварей, ѩ҆́кѡ двѣ̀ ты́сѧщы дра́хмъ сребра̀, посла̀ во ї҆ер҇ли́мъ принестѝ за грѣ́хъ (ме́ртвыхъ) же́ртвѹ, предо́брѣ и҆ благоче́стнѡ творѧ̀, ѡ҆ воскресе́нїи помышлѧ́ѧ.

44 А҆́ще бо па́дшымъ воста́ти не ча́ѧлъ бы, и҆зли́шно бы́ло бы и҆ всѹ́е ѡ҆ ме́ртвыхъ моли́тисѧ.

45 Ктомѹ̀ взира́ющь, ѩ҆̀кѡ во благоче́стїи ѹ҆со́пшымъ и҆зрѧ́днѣ́йшаѧ ѹ҆гото́васѧ благода́ть:

46 преподо́бное и҆ благочести́вое помышле́нїе: ѿонѹ́дѹ же за ѹ҆ме́ршихъ моле́нїе сотворѝ, ѩ҆́кѡ да ѿ грѣха̀ ѡ҆чи́стѧтсѧ.

<< ← Prev Top Next → >>