1 И҆ по си́хъ слы́шахъ гла́съ ве́лїй наро́да мно́га на небесѝ, глаго́лющагѡ: а҆ллилѹ́їа: сп҇нїе и҆ сла́ва, и҆ чт҇ь и҆ си́ла гд҇ѹ на́шемѹ,
2 ѩ҆́кѡ и҆́стинни и҆ пра҄ви сѹди҄ є҆гѡ̀: ѩ҆́кѡ сѹди́лъ є҆́сть любодѣ́йцѹ вели́кѹ, ѩ҆́же посмрадѝ {растлѝ} зе́млю любодѣѧ́нїемъ свои́мъ, и҆ ѿмсти́лъ кро́вь рабѡ́въ свои́хъ ѿ рѹкѝ є҆ѧ̀.
3 И҆ второ́е рѣ́ша: а҆ллилѹ́їа. И҆ ды́мъ є҆ѧ̀ восхожда́ше во вѣ́ки вѣкѡ́въ.
4 И҆ падо́ша два́десѧть и҆ четы́ри ста́рцы и҆ четы́ри живѡ́тна и҆ поклони́шасѧ бг҃ови сѣдѧ́щемѹ на пр҇то́лѣ, глаго́люще: а҆ми́нь, а҆ллилѹ́їа.
5 И҆ гла́съ и҆зы́де ѿ пр҇то́ла гл҃ющь: по́йте бг҃ѹ на́шемѹ, всѝ рабѝ є҆гѡ̀ и҆ боѧ́щїисѧ є҆гѡ̀, и҆ ма́лїи и҆ вели́цыи.
6 И҆ слы́шахъ ѩ҆́кѡ гла́съ наро́да мно́га, и҆ ѩ҆́кѡ гла́съ во́дъ мно́гихъ, и҆ ѩ҆́кѡ гла́съ громѡ́въ крѣ́пкихъ, глаго́лющихъ: а҆ллилѹ́їа, ѩ҆́кѡ воцр҃и́сѧ гд҇ь бг҃ъ вседержи́тель:
7 ра́дѹимсѧ и҆ весели́мсѧ, и҆ дади́мъ сла́вѹ є҆мѹ̀: ѩ҆́кѡ прїи́де бра́къ а҆́гнчїй, и҆ жена̀ є҆гѡ̀ ѹ҆гото́вила є҆́сть себѐ.
8 И҆ дано̀ бы́сть є҆́й ѡ҆блещи́сѧ въ вѷссо́нъ чи́стъ и҆ свѣ́телъ: вѷссо́нъ бо ѡ҆правда҄нїѧ ст҃ы́хъ є҆́сть.
9 И҆ глаго́ла мѝ: напишѝ: бл҃же́ни зва́ннїи на ве́черю бра́ка а҆́гнча. И҆ глаго́ла мѝ: сїѧ҄ словеса̀ и҆́стинна бж҃їѧ сѹ́ть.
10 И҆ па́дъ пред̾ нога́ма є҆гѡ̀, поклони́хсѧ є҆мѹ̀: и҆ глаго́ла мѝ: ви́ждь, нѝ: клевре́тъ тѝ є҆́смь и҆ бра́тїй твои́хъ и҆мѹ́щихъ свидѣ́телство ї҆и҃сово: бг҃ѹ поклони́сѧ: свидѣ́телство бо ї҆и҃сово є҆́сть дх҃ъ про҇ро́чествїѧ.
11 И҆ ви́дѣхъ не́бо ѿве́рсто, и҆ сѐ, ко́нь бѣ́лъ, и҆ сѣдѧ́й на не́мъ вѣ́ренъ и҆ и҆́стиненъ, и҆ правосѹ́дный и҆ во́инственный:
12 ѻ҆́чи же є҆мѹ̀ (є҆ста̀) ѩ҆́кѡ пла́мень ѻ҆́гненъ, и҆ на главѣ̀ є҆гѡ̀ вѣнцы̀ мно́зи: и҆мы́й и҆́мѧ напи́сано, є҆́же никто́же вѣ́сть, то́кмѡ ѻ҆́нъ са́мъ:
13 и҆ ѡ҆блече́нъ въ ри́зѹ червле́нѹ кро́вїю. И҆ нарица́етсѧ и҆́мѧ є҆гѡ̀ сло́во бж҃їе.
14 И҆ вѡ́инства нб҇наѧ и҆дѧ́хѹ в̾слѣ́дъ є҆гѡ̀ на ко́нехъ бѣ́лыхъ, ѡ҆блече́ни въ вѷссо́нъ бѣ́лъ и҆ чи́стъ.
15 И҆ и҆з̾ ѹ҆́стъ є҆гѡ̀ и҆зы́де ѻ҆рѹ́жїе ѻ҆стро̀, да тѣ́мъ и҆збїе́тъ ѩ҆зы́ки: и҆ то́й ѹ҆пасе́тъ ѧ҆̀ жезло́мъ желѣ́знымъ, и҆ то́й пере́тъ точи́ло вїна̀ ѩ҆́рости и҆ гнѣ́ва бж҃їѧ вседержи́телева.
16 И҆ и҆́мать на ри́зѣ и҆ на стегнѣ̀ свое́мъ и҆́мѧ напи́сано: цр҃ь царє́мъ и҆ гд҇ь господє́мъ.
17 И҆ ви́дѣхъ є҆ди́наго а҆́гг҃ла стоѧ́ща на со́лнцѣ: и҆ возопѝ гла́сомъ ве́лїимъ, глаго́лѧ всѣ́мъ пти́цамъ парѧ́щымъ посредѣ̀ небесѐ: прїиди́те и҆ собери́тесѧ на ве́черю вели́кѹю бж҃їю,
18 да снѣ́сте плѡ́ти царе́й и҆ плѡ́ти крѣ́пкихъ и҆ плѡ́ти ты́сѧщникѡвъ, и҆ плѡ́ти ко́ней и҆ сѣдѧ́щихъ на ни́хъ, и҆ плѡ́ти всѣ́хъ свобо́дныхъ и҆ рабѡ́въ, и҆ ма́лыхъ и҆ вели́кихъ.
19 И҆ ви́дѣхъ ѕвѣ́рѧ и҆ цари҄ зємны҄ѧ и҆ вѡ́и и҆́хъ сѡ́браны сотвори́ти бра́нь съ сѣдѧ́щимъ на конѝ и҆ съ вѡ́инствы є҆гѡ̀.
20 И҆ ѩ҆́тъ бы́сть ѕвѣ́рь и҆ съ ни́мъ лжи́вый проро́къ, сотвори́вый зна́мєнїѧ пред̾ ни́мъ, и҆́миже прельстѝ прїе́мшыѧ начерта́нїе ѕвѣри́но и҆ покланѧ́ющыѧсѧ ї҆кѡ́нѣ є҆гѡ̀: жи҄ва вве́ржєна бы́ста ѻ҆́ба въ є҆́зеро ѻ҆́гненное горѧ́щее жѹ́пеломъ:
21 а҆ про́чїи ѹ҆бїе́ни бы́ша ѻ҆рѹ́жїемъ сѣдѧ́щагѡ на конѝ, и҆зше́дшимъ и҆з̾ ѹ҆́стъ є҆гѡ̀: и҆ всѧ҄ пти҄цы насы́тишасѧ ѿ пло́тей и҆́хъ. |
