1 И҆ ви́дѣхъ и҆́но зна́менїе на небесѝ ве́лїе и҆ чѹ́дно, се́дмь а҆́гг҃лъ и҆мѹ́щихъ се́дмь ѩ҆́звъ послѣ́днихъ, занѐ въ тѣ́хъ сконча́етсѧ ѩ҆́рость бж҃їѧ.
2 И҆ ви́дѣхъ ѩ҆́кѡ мо́ре стклѧ́но смѣ́шено со ѻ҆гне́мъ, и҆ побѣди́вшыѧ ѕвѣ́рѧ и҆ ѡ҆́бразъ є҆гѡ̀, и҆ начерта́нїе є҆гѡ̀ и҆ число̀ и҆́мене є҆гѡ̀, стоѧ́щыѧ на мо́ри стклѧ́нѣмъ, и҆мѹ́щыѧ гѹ҄сли бж҃їѧ:
3 и҆ поѧ́хѹ пѣ́снь мѡѷсе́а раба̀ бж҃їѧ и҆ пѣ́снь а҆́гнчѹ, глаго́люще: вє́лїѧ и҆ ди҄вна дѣла̀ твоѧ҄, гд҇и бж҃е вседержи́телю: првдни и҆ и҆́стинни пѹтїѐ твоѝ, цр҃ю̀ ст҃ы́хъ:
4 кто̀ не ѹ҆бои́тсѧ тебє̀, гд҇и, и҆ просла́витъ и҆́мѧ твоѐ; ѩ҆́кѡ є҆ди́нъ прпдбенъ є҆сѝ, ѩ҆́кѡ всѝ ѩ҆зы́цы прїи́дѹтъ и҆ покло́нѧтсѧ пред̾ тобо́ю: ѩ҆́кѡ ѡ҆правда҄нїѧ твоѧ҄ ѩ҆ви́шасѧ.
5 И҆ по си́хъ ви́дѣхъ, и҆ сѐ, ѿве́рзесѧ хра́мъ ски́нїи свидѣ́нїѧ на небесѝ:
6 и҆ и҆зыдо́ша се́дмь а҆́гг҃лъ и҆з̾ хра́ма, и҆̀же и҆мѣ́ѧхѹ се́дмь ѩ҆́звъ, ѡ҆блече́ни въ ри҄зы льнѧ҄ны чи҄сты и҆ свѣ҄тлы, и҆ препоѧ́сани на пе́рсехъ пѡ́ѧсы златы́ми.
7 И҆ є҆ди́но ѿ четы́рехъ живо́тныхъ дадѐ седми́мъ а҆́гг҃лѡмъ се́дмь фїа҄лъ златы́хъ, и҆спо́лненыхъ ѩ҆́рости бг҃а живѹ́щагѡ во вѣ́ки вѣкѡ́въ.
8 И҆ напо́лнисѧ хра́мъ ды́ма ѿ сла́вы бж҃їѧ и҆ ѿ си́лы є҆гѡ̀, и҆ никто́же можа́ше вни́ти во хра́мъ, до́ндеже сконча́ютсѧ се́дмь ѩ҆́звъ седми́хъ а҆́гг҃лъ. |
