1 Молю̀ ѹ҆̀бо ва́съ, бра́тїе, щедро́тами бж҃їими, предста́вите тѣлеса̀ ва҄ша же́ртвѹ жи́вѹ, ст҃ѹ, бл҃гоѹго́днѹ бг҃ови, слове́сное слѹже́нїе ва́ше,
2 и҆ не соѡбразѹ́йтесѧ вѣ́кѹ семѹ̀, но преѡбразѹ́йтесѧ ѡ҆бновле́нїемъ ѹ҆ма̀ ва́шегѡ, во є҆́же и҆скѹша́ти ва́мъ, что̀ є҆́сть во́лѧ бж҃їѧ бл҃га́ѧ и҆ ѹ҆го́днаѧ и҆ соверше́ннаѧ.
3 Глаго́лю бо блгдтїю да́вшеюсѧ мнѣ̀, всѧ́комѹ сѹ́щемѹ въ ва́съ не мѹ́дрствовати па́че, є҆́же подоба́етъ мѹ́дрствовати: но мѹ́дрствовати въ цѣломѹ́дрїи, коемѹ́ждо ѩ҆́коже бг҃ъ раздѣли́лъ є҆́сть мѣ́рѹ вѣ́ры.
4 (За҄ 109.) ѩ҆́коже бо во є҆ди́нѣмъ тѣлесѝ мнѡ́ги ѹ҆́ды и҆́мамы, ѹ҆́ды же всѝ не то́жде и҆́мѹтъ дѣ́ланїе,
5 та́кожде мно́зи є҆ди́но тѣ́ло є҆́смы ѡ҆ хр҇тѣ̀, а҆ по є҆ди́номѹ дрѹ́гъ дрѹ́гѹ ѹ҆́ди.
6 (За҄ 110.) И҆мѹ́ще же дарова҄нїѧ по блгдти да́ннѣй на́мъ разли҄чна: а҆́ще про҇ро́чество, по мѣ́рѣ вѣ́ры:
7 а҆́ще ли слѹже́нїе, въ слѹже́нїи: а҆́ще ѹ҆чѧ́й, во ѹ҆че́нїи:
8 а҆́ще ѹ҆тѣша́ѧй, во ѹ҆тѣше́нїи: подава́ѧй, въ простотѣ̀: предстоѧ́й {нача́лствѹѧй}, со тща́нїемъ: ми́лѹѧй, съ до́брымъ и҆зволе́нїемъ.
9 Любы̀ нелицемѣ́рна: ненави́дѧще ѕла́гѡ, прилѣплѧ́йтесѧ бл҃го́мѹ:
10 братолю́бїемъ дрѹ́гъ ко дрѹ́гѹ любе́зни: че́стїю дрѹ́гъ дрѹ́га бо́лша творѧ́ще:
11 тща́нїемъ не лѣни́ви, дѹ́хомъ горѧ́ще, гд҇ви рабо́тающе:
12 ѹ҆пова́нїемъ ра́дѹющесѧ, скѡ́рби терпѧ́ще, въ моли́твѣ пребыва́юще:
13 тре́бованїємъ ст҃ы́хъ приѡбща́ющесѧ, страннолю́бїѧ держа́щесѧ:
14 благословлѧ́йте гонѧ́щыѧ вы̀: благослови́те, а҆ не клени́те.
15 Ра́доватисѧ съ ра́дѹющимисѧ, и҆ пла́кати съ пла́чѹщими.
16 То́жде дрѹ́гъ ко дрѹ́гѹ мѹ́дрствѹюще: не высѡ́каѧ мѹ́дрствѹюще, но смире́нными ведѹ́щесѧ: не быва́йте мѹ́дри ѡ҆ себѣ̀:
17 ни є҆ди́номѹ же ѕла̀ за ѕло̀ воздаю́ще, промышлѧ́юще дѡ́браѧ пред̾ всѣ́ми человѣ҄ки.
18 А҆́ще возмо́жно, є҆́же ѿ ва́съ, со всѣ́ми человѣ҄ки ми́ръ и҆мѣ́йте.
19 Не себѐ ѿмща́юще, возлю́бленїи, но дади́те мѣ́сто гнѣ́вѹ. Пи́сано бо є҆́сть: мнѣ̀ ѿмще́нїе, а҆́зъ возда́мъ, гл҃етъ гд҇ь.
20 А҆́ще ѹ҆̀бо а҆́лчетъ вра́гъ тво́й, ѹ҆хлѣ́би є҆го̀: а҆́ще ли жа́ждетъ, напо́й є҆го̀: сі́е бо творѧ̀, ѹ҆́глїе ѻ҆́гнено собира́еши на главѹ̀ є҆гѡ̀.
21 Не побѣжде́нъ быва́й ѿ ѕла̀, но побѣжда́й бл҃ги́мъ ѕло́е. |
