1 И҆ повелѣ̀ гд҇ь ки́тѹ вели́комѹ пожре́ти ї҆ѡ́нѹ. И҆ бѣ̀ ї҆ѡ́на во чре́вѣ ки́товѣ трѝ дни҄ и҆ трѝ нѡ́щи.
2 И҆ помоли́сѧ ї҆ѡ́на ко гд҇ѹ бг҃ѹ своемѹ̀ ѿ чре́ва ки́това
3 и҆ речѐ: возопи́хъ въ ско́рби мое́й ко гд҇ѹ бг҃ѹ моемѹ̀, и҆ ѹ҆слы́ша мѧ̀: и҆з̾ чре́ва а҆́дова во́пль мо́й, ѹ҆слы́шалъ є҆сѝ гла́съ мо́й:
4 ѿве́рглъ мѧ̀ є҆сѝ во глѹбины҄ се́рдца морска́гѡ, и҆ рѣ́ки ѡ҆быдо́ша мѧ̀: всѧ҄ высоты̀ твоѧ҄ и҆ вѡ́лны твоѧ҄ на мнѣ̀ преидо́ша.
5 И҆ а҆́зъ рѣ́хъ: ѿри́нѹсѧ ѿ ѻ҆́чїю твое́ю є҆да̀ приложѹ̀ призрѣ́ти мѝ ко хра́мѹ ст҃о́мѹ твоемѹ̀;
6 Возлїѧ́сѧ на мѧ̀ вода̀ до дѹшѝ моеѧ̀, бе́здна ѡ҆бы́де мѧ̀ послѣ́днѧѧ, понрѐ глава̀ моѧ̀ въ разсѣ҄лины го́ръ,
7 снидо́хъ въ зе́млю, є҆ѧ́же верєѝ є҆ѧ̀ закле́пи вѣ́чнїи: и҆ да взы́детъ и҆з̾ и҆стлѣ́нїѧ живо́тъ мо́й къ тебѣ̀, гд҇и бж҃е мо́й.
8 Внегда̀ скончава́тисѧ ѿ менє̀ дѹшѝ мое́й, гд҇а помѧнѹ́хъ, и҆ да прїи́детъ къ тебѣ̀ моли́тва моѧ̀ ко хра́мѹ ст҃о́мѹ твоемѹ̀.
9 Хранѧ́щїи сѹ́єтнаѧ и҆ лѡ́жнаѧ мл҇ть свою̀ ѡ҆ста́виша
10 а҆́зъ же со гла́сомъ хвале́нїѧ и҆ и҆сповѣ́данїѧ пожрѹ̀ тебѣ̀, є҆ли҄ка ѡ҆бѣща́хъ, возда́мъ тебѣ̀ во сп҇нїе моѐ гд҇еви.
11 И҆ повелѣ̀ гд҇ь ки́тови, и҆ и҆зве́рже ї҆ѡ́нѹ на сѹ́шѹ. |
