1 Поги́бнетъ самарі́а, ѩ҆́кѡ сопроти́висѧ и҆ бг҃ѹ своемѹ̀: ѻ҆рѹ́жїемъ падѹ́тъ са́ми, и҆ младе́нцы и҆́хъ разбїю́тсѧ, и҆ во ѹ҆тро́бѣ и҆мѹ́щыѧ и҆́хъ разсѧ́дѹтсѧ.
2 Ѡ҆брати́сѧ, ї҆и҃лю, ко гд҇ѹ бг҃ѹ твоемѹ̀, занѐ и҆знемо́глъ є҆сѝ въ непра́вдахъ твои́хъ.
3 Возми́те съ собо́ю словеса̀ и҆ ѡ҆брати́тесѧ ко гд҇ѹ бг҃ѹ ва́шемѹ, рцы́те є҆мѹ̀: (мо́жеши всѧ́къ ѿврещѝ грѣ́хъ:) ѩ҆́кѡ да не прїи́мете непра́вды, но да прїи́мете блага҄ѧ, и҆ воздади́мъ пло́дъ ѹ҆сте́нъ на́шихъ.
4 А҆ссѹ́ръ не спасе́тъ на́съ, на ко́ни не взы́демъ, ксемѹ̀ не рече́мъ:
5 бо́зи на́ши, дѣла́мъ рѹ́къ на́шихъ: ѩ҆́кѡ въ тебѣ̀ поми́лѹетсѧ сирота̀. И҆зцѣлю̀ селє́нїѧ и҆́хъ, возлюблю̀ ѧ҆̀ ѩ҆вле́ннѡ, ѩ҆́кѡ ѿврати́сѧ гнѣ́въ мо́й ѿ ни́хъ.
6 Бѹ́дѹ ѩ҆́коже роса̀ ї҆и҃лю, процвѣте́тъ ѩ҆́кѡ крі́нъ и҆ простре́тъ коре́нїе своѐ ѩ҆́коже лїва́нъ.
7 По́йдѹтъ вѣ҄тви є҆гѡ̀, и҆ бѹ́детъ ѩ҆́коже ма́слина плодови́та, и҆ ѡ҆бонѧ́нїе є҆гѡ̀ а҆́ки лїва́на:
8 ѡ҆братѧ́тсѧ и҆ сѧ́дѹтъ под̾ кро́вомъ є҆гѡ̀, поживѹ́тъ и҆ ѹ҆твердѧ́тсѧ пшени́цею, и҆ процвѣте́тъ ѩ҆́кѡ вїногра́дъ па́мѧть є҆гѡ̀, ѩ҆́коже вїно̀ лїва́ново.
9 Е҆фре́мови что̀ є҆мѹ̀ є҆щѐ и҆ кѹмі́рѡмъ; а҆́зъ смири́хъ є҆го̀, а҆́зъ и҆ ѹ҆крѣплю̀ є҆го̀: а҆́ки сме́рчїе ѹ҆чаще́ное, ѿ менє̀ ѡ҆брѣ́тесѧ пло́дъ тво́й.
10 Кто̀ премѹ́дръ и҆ ѹ҆разѹмѣ́етъ сїѧ҄; и҆ смы́сленъ, и҆ ѹ҆вѣ́сть сїѧ҄; ѩ҆́кѡ пра҄вы пѹтїѐ гд҇ни, и҆ првднїи по́йдѹтъ въ ни́хъ, а҆ нечести́вїи и҆знемо́гѹтъ въ ни́хъ. |
