1 Сло́во гд҇не, є҆́же бы́сть ко ї҆еремі́и про҇ро́кѹ на и҆ноплеме́нники, пре́жде не́жели поразѝ фараѡ́нъ га́зѹ.
2 Та́кѡ гл҃етъ гд҇ь: сѐ, во́ды восхо́дѧтъ ѿ сѣ́вера и҆ бѹ́дѹтъ ѩ҆́кѡ пото́къ наводнѧ́ѧй, и҆ пото́пѧтъ зе́млю и҆ и҆сполне́нїе є҆ѧ̀, гра́дъ и҆ живѹ́щыѧ въ не́мъ: и҆ возопїю́тъ лю́дїе и҆ воспла́чѹтсѧ всѝ живѹ́щїи на землѝ,
3 ѿ шѹ́ма ѹ҆стремле́нїѧ є҆гѡ̀, ѿ ѻ҆рѹ́жїѧ но́гъ є҆гѡ̀ и҆ ѿ гремѣ́нїѧ колесни́цъ є҆гѡ̀ и҆ ѿ звѹ́ка коле́съ є҆гѡ̀: не ѡ҆брати́шасѧ ѻ҆тцы̀ ко сынѡ́мъ свои҄мъ, ѡ҆пѹсти́вше рѹ́цѣ своѝ,
4 въ де́нь находѧ́щь, є҆́же погѹби́ти всѧ҄ и҆ноплеме́нники: и҆ разорю̀ тѵ́ръ и҆ сїдѡ́нъ со всѣ́ми про́чими помѡ́щники и҆́хъ, ѩ҆́кѡ и҆стреби́тъ гд҇ь фѷлїсти́ны, ѡ҆ста́нки ѻ҆стровѡ́въ каппадокі́йскихъ.
5 Прїи́де плѣ́шь на га́зѹ, ѿве́рженъ бы́сть а҆скалѡ́нъ и҆ ѡ҆ста́нцы є҆накї҄мли.
6 Доко́лѣ сѣщѝ бѹ́деши, ѽ, мечѹ̀ бж҃їй! доко́лѣ не ѹ҆поко́ишисѧ; вни́ди въ ножны̀ твоѧ҄, почі́й и҆ вознеси́сѧ.
7 Ка́кѡ ѹ҆поко́итсѧ; поне́же гд҇ь заповѣ́да є҆мѹ̀ на а҆скалѡ́на и҆ на сѹ́щыѧ при мо́ри, на про́чыѧ воста́ти. |
