1 Ѡ҆быди́те пѹти҄ ї҆ер҇ли҄мскїѧ и҆ воззри́те, и҆ позна́йте и҆ поищи́те на сто́гнахъ є҆гѡ̀, а҆́ще ѡ҆брѧ́щете мѹ́жа творѧ́щаго сѹ́дъ и҆ и҆́щѹща вѣ́ры: и҆ мл҇рдъ бѹ́дѹ є҆мѹ̀, гл҃етъ гд҇ь.
2 Живе́тъ гд҇ь, глаго́лютъ, сегѡ̀ ра́ди не во лжа́хъ ли кленѹ́тсѧ;
3 Гд҇и, ѻ҆́чи твоѝ (зрѧ́тъ) на вѣ́рѹ: би́лъ є҆сѝ и҆̀хъ, и҆ не поболѣ́ша, сокрѹши́лъ є҆сѝ и҆̀хъ, и҆ не восхотѣ́ша прїѧ́ти наказа́нїѧ: ѡ҆жесточи́ша ли́ца своѧ҄ па́че ка́мене и҆ не хотѣ́ша ѡ҆брати́тисѧ.
4 А҆́зъ же рѣ́хъ: не́гли ѹ҆бо́зи сѹ́ть (и҆ бѹ́їи), тогѡ̀ ра́ди не возмого́ша, ѩ҆́кѡ не ѹ҆вѣ́даша пѹтѝ гд҇нѧ и҆ сѹда̀ бг҃а своегѡ̀.
5 Пойдѹ̀ ко держа҄внымъ и҆ возглаго́лю и҆̀мъ, ті́и бо позна́ша пѹ́ть гд҇ень и҆ сѹ́дъ бг҃а своегѡ̀. И҆ сѐ, є҆динодѹ́шнѡ сі́и сокрѹши́ша и҆́го, расторго́ша ѹ҆́зы.
6 Сегѡ̀ ра́ди поразѝ и҆̀хъ ле́въ ѿ дѹбра́вы, и҆ во́лкъ да́же до домѡ́въ погѹбѝ и҆̀хъ, и҆ ры́сь бдѧ́ше над̾ града́ми и҆́хъ: всѝ и҆сходѧ́щїи ѿ ни́хъ бѹ́дѹтъ ѩ҆́ти, ѩ҆́кѡ ѹ҆мно́жиша нечє́стїѧ своѧ҄, ѹ҆крѣпи́шасѧ во ѿвраще́нїихъ свои́хъ.
7 Ѡ҆ че́мъ ѿ си́хъ мл҇рдъ бѹ́дѹ тебѣ̀; сы́нове твоѝ ѡ҆ста́виша мѧ̀ и҆ клѧ́шасѧ тѣ́ми, и҆̀же не сѹ́ть бо́зи: насы́тихъ и҆̀хъ, и҆ прелюбодѣ́йствоваша и҆ въ домѣ́хъ блѹдни́цъ ѡ҆бита́ша,
8 ко́ни женонеи́стовни сотвори́шасѧ, кі́йждо ко женѣ̀ и҆́скреннѧгѡ своегѡ̀ ржа́ше.
9 Є҆да̀ ѿ си́хъ не посѣщѹ̀; речѐ гд҇ь: и҆лѝ ѩ҆зы́кѹ сицево́мѹ не мсти́тъ дш҃а̀ моѧ̀;
10 Взы́дите на стѣ́ны є҆гѡ̀ и҆ разори́те, ѡ҆конча́нїѧ же не сотвори́те: ѡ҆ста́вите подпѡ́ры є҆гѡ̀, ѩ҆́кѡ гд҇ни сѹ́ть.
11 Престѹпле́нїемъ бо престѹпи́лъ є҆́сть на мѧ̀ до́мъ ї҆и҃левъ и҆ до́мъ ї҆ѹ́динъ, гл҃етъ гд҇ь.
12 Солга́ша гд҇ѹ своемѹ̀ и҆ реко́ша: не сѹ́ть сїѧ҄, нижѐ прїи́дѹтъ на на́съ ѕла҄ѧ, и҆ меча̀ и҆ гла́да не ѹ҆́зримъ:
13 проро́цы на́ши бы́ша на вѣ́тръ, и҆ сло́во гд҇не не бѣ̀ въ ни́хъ, та́кѡ бѹ́детъ и҆̀мъ.
14 Сегѡ̀ ра́ди та́кѡ гл҃етъ гд҇ь си́лъ: зане́же глаго́лали є҆стѐ сло́во сїѐ, сѐ, а҆́зъ даю̀ словеса̀ моѧ҄ во ѹ҆ста̀ твоѧ҄ ѻ҆́гнь, и҆ лю́ди сїѧ҄ древа̀, и҆ поѧ́стъ и҆́хъ.
15 Сѐ, а҆́зъ наведѹ̀ на ва́съ ѩ҆зы́къ и҆здале́ча, до́ме ї҆и҃левъ, речѐ гд҇ь, ѩ҆зы́къ си́льный, ѩ҆зы́къ ста́рый, є҆гѡ́же ѧ҆зы́ка не ѹ҆вѣ́си, (ни ѹ҆разѹмѣ́еши, что̀ глаго́летъ):
16 тѹ́лъ є҆гѡ̀ ѩ҆́кѡ гро́бъ ѿве́рстъ, всѝ крѣ́пцыи и҆ поѧдѧ́тъ жа́твѹ ва́шѹ
17 и҆ хлѣ́бы ва́шѧ, и҆ поѧдѧ́тъ сынѡ́въ ва́шихъ и҆ дще́рей ва́шихъ, и҆ снѣдѧ́тъ ѻ҆ве́цъ ва́шихъ и҆ телцє́въ ва́шихъ, и҆ поѧдѧ́тъ вїногра́ды ва́шѧ и҆ смѡ́кви ва́шѧ и҆ ма҄сличїѧ ва҄ша, и҆ сокрѹша́тъ гра́ды ва́шѧ твє́рдыѧ, на ни́хже вы̀ ѹ҆пова́сте, мече́мъ.
18 Ѻ҆ба́че во дне́хъ ѻ҆́нѣхъ, гл҃етъ гд҇ь бг҃ъ тво́й, не сотворю̀ ва́съ во и҆стребле́нїе.
19 И҆ бѹ́детъ, є҆гда̀ рече́те: почто̀ сотворѝ гд҇ь бг҃ъ на́шъ на́мъ сїѧ҄ всѧ҄; И҆ рече́ши къ ни҄мъ: ѩ҆́кѡ ѡ҆ста́висте мѧ̀ и҆ послѹжи́сте богѡ́мъ чѹжди҄мъ въ землѝ ва́шей, та́кѡ послѹ́жите богѡ́мъ чѹжди҄мъ въ землѝ не ва́шей.
20 Возвѣсти́те сїѧ҄ до́мѹ ї҆а́кѡвлю и҆ слы́шано сотвори́те въ домѹ̀ ї҆ѹ́динѣ (рекѹ́ще):
21 слы́шите сїѧ҄, лю́дїе бѹ́їи и҆ не и҆мѹ́щїи се́рдца, и҆̀же, и҆мѣ́юще ѻ҆́чи, не ви́дите, и҆ ѹ҆́шы, и҆ не слы́шите:
22 менє́ ли не ѹ҆боите́сѧ; речѐ гд҇ь: и҆лѝ ѿ лица̀ моегѡ̀ не ѹ҆стыдите́сѧ; и҆́же положи́хъ песо́къ предѣ́лъ мо́рю, за́повѣдь вѣ́чнѹ, и҆ не превзы́детъ є҆гѡ̀, и҆ возмѹти́тсѧ и҆ не возмо́жетъ: и҆ возшѹмѧ́тъ вѡ́лны є҆гѡ̀, и҆ не пре́йдѹтъ тогѡ̀.
23 Лю́демъ же си҄мъ бы́сть се́рдце непослѹ́шно и҆ непокори́во, и҆ ѹ҆клони́шасѧ и҆ поидо́ша,
24 и҆ не реко́ша въ се́рдцы свое́мъ: ѹ҆бои́мсѧ гд҇а бг҃а на́шегѡ, даю́щагѡ на́мъ до́ждь ра́ннїй и҆ по́здный во вре́мѧ и҆сполне́нїѧ повелѣ́нїѧ жа́твы и҆ хранѧ́щагѡ на́мъ.
25 Беззакѡ́нїѧ на҄ша ѹ҆клони́ша сїѧ҄, и҆ грѣсѝ на́ши ѿри́нѹша блага҄ѧ ѿ на́съ.
26 ѩ҆́кѡ ѡ҆брѣто́шасѧ въ лю́дехъ мои́хъ нечести́вїи, и҆ сѣ҄ти поста́виша, є҆́же погѹби́ти мѹ́жы, и҆ ѹ҆лови́ша.
27 А҆́ки клѣ́тка поста́влена полна̀ пти́цъ, та́кѡ до́мы и҆́хъ по́лни ле́сти: сегѡ̀ ра́ди возвели́чишасѧ и҆ ѡ҆богати́шасѧ:
28 ѹ҆ты́ша и҆ ѹ҆толстѣ́ша и҆ престѹпи́ша словеса̀ моѧ҄ ѕлѣ́йшїи: прю̀ вдови́цы не сѹди́ша, сѹда̀ си́ра не ѹ҆пра́виша и҆ сѹда̀ ѹ҆бѡ́гимъ не сѹди́ша.
29 Є҆да̀ си́хъ ра́ди не посѣщѹ̀; речѐ гд҇ь: и҆лѝ ѩ҆зы́кѹ сицево́мѹ не ѿмсти́тъ дѹша̀ моѧ̀;
30 Ѹ҆́жасъ и҆ стра҄шнаѧ содѣ́ѧшасѧ на землѝ:
31 проро́цы проро́чествоваша непра́вєднаѧ, и҆ свѧще́нницы восплеска́ша рѹка́ми свои́ми, и҆ лю́дїе моѝ возлюби́ша такѡва́ѧ. И҆ что̀ сотворитѐ въ послѣ҄днѧѧ си́хъ; |
