1 Ра́дѹйсѧ, пѹсты́нѧ жа́ждѹщаѧ, да весели́тсѧ пѹсты́нѧ и҆ да цвѣте́тъ ѩ҆́кѡ крі́нъ.
2 И҆ процвѣте́тъ и҆ возвесели́тсѧ пѹсты́нѧ ї҆ѻрда́нова: и҆ сла́ва лїва́нова даде́сѧ є҆́й, и҆ че́сть карми́лова, и҆ ѹ҆́зрѧтъ лю́дїе моѝ сла́вѹ гд҇ню и҆ высотѹ̀ бж҃їю.
3 Ѹ҆крѣпи́тесѧ, рѹ́цѣ ѡ҆сла́блєныѧ и҆ кѡлѣ́на разсла́блєнаѧ:
4 ѹ҆тѣ́шитесѧ, малодѹ́шнїи ѹ҆мо́мъ, ѹ҆крѣпи́тесѧ, не бо́йтесѧ: сѐ, бг҃ъ на́шъ сѹ́дъ воздае́тъ и҆ возда́стъ, то́й прїи́детъ и҆ сп҃се́тъ на́съ.
5 Тогда̀ ѿве́рзѹтсѧ ѻ҆́чи слѣпы́хъ, и҆ ѹ҆́ши глѹхи́хъ ѹ҆слы́шатъ.
6 Тогда̀ ско́читъ хромы́й ѩ҆́кѡ є҆ле́нь, и҆ ѩ҆́сенъ бѹ́детъ ѧ҆зы́къ гѹгни́выхъ: ѩ҆́кѡ прото́ржесѧ вода̀ въ пѹсты́ни и҆ де́брь въ землѝ жа́ждѹщей.
7 И҆ безво́днаѧ бѹ́детъ во є҆зе́ра, и҆ на жа́ждѹщей землѝ и҆сто́чникъ водны́й бѹ́детъ: та́мѡ бѹ́детъ весе́лїе пти́цамъ, и҆ сели́тва тро́сти, и҆ лѹ́зи.
8 И҆ та́мѡ бѹ́детъ пѹ́ть чи́стъ, и҆ пѹ́ть ст҃ъ нарѣче́тсѧ: и҆ не пре́йдетъ та́мѡ нечи́стый, нижѐ бѹ́детъ та́мѡ пѹ́ть нечи́стъ: разсѣ́ѧннїи же по́йдѹтъ по немѹ̀ и҆ не заблѹ́дѧтъ.
9 И҆ не бѹ́детъ та́мѡ льва̀, ни ѿ ѕвѣре́й ѕлы́хъ не взы́детъ на́нь, нижѐ ѡ҆брѧ́щетсѧ та́мѡ, но по́йдѹтъ по немѹ̀ и҆зба́вленнїи:
10 и҆ со́браннїи гд҇емъ ѡ҆братѧ́тсѧ и҆ прїи́дѹтъ въ сїѡ́нъ съ ра́достїю, и҆ ра́дость вѣ́чнаѧ над̾ главо́ю и҆́хъ: над̾ главо́ю бо и҆́хъ хвала̀ и҆ весе́лїе, и҆ ра́дость прїи́метъ ѧ҆̀, ѿбѣжѐ болѣ́знь и҆ печа́ль и҆ воздыха́нїе. |
