1
2 Комѹ̀ подо́бни бы́ша живѹ́щїи во ѻ҆́стровѣ, кѹпцы̀ фі́нїчестїи, преходѧ́щїи мо́ре;
3 Въ водѣ̀ мно́зѣ сѣ́мѧ кѹпе́ческо, а҆́ки жа́твѣ вноси́мѣй кѹпцы̀ ѩ҆зы́честїи.
4 Ѹ҆срами́сѧ, сїдѡ́не, речѐ мо́ре. Крѣ́пость же морска́ѧ речѐ: не болѣ́хъ, ни породи́хъ, ни вскорми́хъ ю҆́ношъ, нижѐ вознесо́хъ дѣви́цъ.
5 Є҆гда́ же слы́шано бѹ́детъ во є҆гѵ́птѣ, прїи́метъ ѧ҆̀ болѣ́знь ѡ҆ тѵ́рѣ.
6 И҆ди́те въ кархидо́нъ, пла́читесѧ, живѹ́щїи во ѻ҆́стровѣ се́мъ.
7 Не сїе́ ли бѣ̀ велича́нїе ва́мъ и҆спе́рва, пре́жде не́же пре́данѹ бы́ти є҆мѹ̀;
8 Кто̀ сїѧ҄ совѣща̀ на тѵ́ра; є҆да̀ хѹ́ждшїй є҆́сть, и҆лѝ не крѣ́пкїй є҆́сть; кѹпцы̀ є҆гѡ̀ сла́внїи кнѧ҄зи землѝ.
9 Гд҇ь саваѡ́ѳъ совѣща̀ разсы́пати всѧ́кѹю горды́ню сла́вныхъ и҆ ѡ҆безче́стити всѧ́кое сла́вное на землѝ.
10 Дѣ́лай зе́млю твою̀, и҆́бо корабли҄ ктомѹ̀ не прїи́дѹтъ ѿ кархидо́на.
11 И҆ рѹка̀ твоѧ̀ ктомѹ̀ не ѹ҆крѣпѣ́етъ по мо́рю, разгнѣвлѧ́ющаѧ царе́й. Гд҇ь саваѡ́ѳъ заповѣ́да ѡ҆ ханаа́нѣ, є҆́же погѹби́ти крѣ́пость є҆гѡ̀.
12 И҆ рекѹ́тъ: ктомѹ̀ не приложи́те ѹ҆карѧ́ти и҆ ѡ҆би́дѣти дще́рь сїдѡ́ню: и҆ а҆́ще ѿи́деши ко китїи́ѡмъ, нижѐ та́мѡ бѹ́детъ тебѣ̀ поко́й:
13 и҆ въ зе́млю халде́йскѹ, но и҆ та̀ ѡ҆пѹстѣ́ла ѿ а҆ссѷрі́анъ, ѩ҆́кѡ стѣна̀ є҆ѧ̀ паде́сѧ.
14 Пла́читесѧ, корабли҄ кархидо́нстїи, ѩ҆́кѡ поги́бе тверды́нѧ ва́ша.
15 И҆ бѹ́детъ въ то́й де́нь, ѡ҆ста́вленъ бѹ́детъ тѵ́ръ се́дмьдесѧтъ лѣ́тъ, ѩ҆́коже вре́мѧ (є҆ди́нагѡ) царѧ̀, ѩ҆́кѡ вре́мѧ человѣ́ческо: и҆ по седми́десѧтихъ лѣ́тѣхъ бѹ́детъ тѵ́ръ ѩ҆́кѡ пѣ́снь блѹдни́цы.
16 Возмѝ гѹ́сли, ѡ҆быдѝ гра́дъ, блѹдни́ца забве́наѧ, до́брѣ погѹдѝ, мно́гѡ воспо́й, да па́мѧть твоѧ̀ бѹ́детъ.
17 И҆ бѹ́детъ по седми́десѧтихъ лѣ́тѣхъ, присѣще́нїе сотвори́тъ бг҃ъ тѵ́рѹ, и҆ па́ки возста́витсѧ на пре́жднее и҆ бѹ́детъ то́ржище всѣ҄мъ ца́рствамъ вселе́нныѧ на лицы̀ землѝ.
18 И҆ бѹ́детъ є҆гѡ̀ кѹ́плѧ и҆ мзда̀ ст҃о гд҇еви, не и҆̀мъ со́брано бѹ́детъ, но живѹ́щымъ пред̾ гд҇емъ, всѧ̀ кѹ́плѧ є҆гѡ̀, ѩ҆́сти и҆ пи́ти и҆ напо́лнитисѧ, и҆ въ сы́тость, на па́мѧть пред̾ гд҇емъ. |
