1
2 Пла́читесѧ ѡ҆ себѣ̀, поги́бнетъ бо и҆ дивѡ́нъ, и҆дѣ́же тре́бище ва́ше: та́мѡ взы́дете пла́катисѧ над̾ нава́ѵомъ мѡаві́тскимъ. Пла́читесѧ, на всѧ́цѣй главѣ̀ плѣ́шь, всѧ҄ мы҄шцы ѡ҆бсѣ́чєны,
3 на сто́гнахъ є҆гѡ̀ препоѧ́шитесѧ во врє́тища, и҆ воспла́читесѧ на хра́минахъ є҆гѡ̀ и҆ на ѹ҆́лицахъ є҆гѡ̀ и҆ на сто́гнахъ є҆гѡ̀, всѝ возрыда́йте съ пла́чемъ.
4 ѩ҆́кѡ возопѝ є҆севѡ́нъ и҆ є҆леала̀, да́же до ї҆ассы̀ ѹ҆слы́шасѧ гла́съ и҆́хъ: сегѡ̀ ра́ди чрє́сла мѡаві́тїды вопїю́тъ, дѹша̀ є҆ѧ̀ ѹ҆вѣ́сть.
5 Се́рдце мѡаві́тїды вопїе́тъ въ не́й да́же до сигѡ́ра: ю҆́ница бо є҆́сть трилѣ́тна. Въ возше́ствїи же лѹі́ѳа къ тебѣ̀ пла́чѹщесѧ взы́дѹтъ пѹте́мъ а҆рѡнїи́млимъ: вопїе́тъ сотре́нїе и҆ трѹ́съ.
6 Вода̀ немрі́млѧ пѹста̀ бѹ́детъ, и҆ трава̀ є҆ѧ̀ ѡ҆скѹдѣ́етъ: травы́ бо зеле́ны не бѹ́детъ.
7 Є҆да̀ и҆ си́це спасе́тсѧ; наведѹ́ бо на де́брь а҆ра́влѧнъ, и҆ во́змѹтъ ю҆̀:
8 пре́йде бо во́пль предѣ́лъ землѝ мѡаві́тскїѧ до а҆галлі́ма, и҆ пла́чь є҆ѧ̀ да́же до кла́дѧзѧ є҆лі́млѧ.
9 Вода́ бо дїмѡ́нѧ напо́лнитсѧ кро́ве: наведѹ́ бо на дїмѡ́на а҆ра́влѧны, и҆ возмѹ̀ сѣ́мѧ мѡа́вле и҆ а҆рїи́лево и҆ ѡ҆ста́нокъ а҆дами́нь. |
