1 Го́ре пи́шѹщымъ лѹка́вство: пи́шѹщїи бо лѹка́вство пи́шѹтъ,
2 ѹ҆кланѧ́юще сѹ́дъ ѹ҆бо́гихъ, восхища́юще сѹ́дъ ни́щихъ люді́й мои́хъ, ѩ҆́кѡ бы́ти и҆̀мъ вдови́цѣ въ расхище́нїе и҆ сиротѣ̀ въ разграбле́нїе.
3 И҆ что̀ сотворѧ́тъ въ де́нь посѣще́нїѧ; ско́рбь бо ва́мъ ѿдале́че прїи́детъ. И҆ къ комѹ̀ прибѣ́гнете, да помо́жетъ ва́мъ; И҆ гдѣ̀ ѡ҆ста́вите сла́вѹ ва́шѹ,
4 є҆́же не впа́сти въ плѣне́нїе; И҆ под̾ ѹ҆бїе́ными падѹ́тъ. И҆ во всѣ́хъ си́хъ не ѿврати́сѧ гнѣ́въ є҆гѡ̀, но є҆щѐ рѹка̀ є҆гѡ̀ высока̀.
5 Го́ре а҆ссѷрі́ємъ, же́злъ ѩ҆́рости моеѧ̀ и҆ гнѣ́въ є҆́сть въ рѹкѹ̀ и҆́хъ.
6 Гнѣ́въ мо́й послю̀ на ѩ҆зы́къ беззако́ненъ, и҆ свои́хъ люді́й повелю̀ сотвори́ти коры҄сти и҆ плѣне́нїе, и҆ попра́ти гра́ды и҆ положи́ти ѧ҆̀ въ пра́хъ.
7 Се́й же не та́кѡ помы́сли и҆ дѹше́ю не та́кѡ возмнѣ̀: но ѿстѹ́питъ ѹ҆́мъ є҆гѡ̀, и҆ є҆́же потреби́ти ѩ҆зы́ки не ма҄лы.
8 И҆ а҆́ще рекѹ́тъ є҆мѹ̀: ты́ ли є҆сѝ є҆ди́нъ кнѧ́зь;
9 И҆ рече́тъ: не взѧ́хъ ли страны̀, ѩ҆́же вы́ше вавѷлѡ́на и҆ хала́ни, и҆дѣ́же сто́лпъ созда́нъ, и҆ взѧ́хъ а҆раві́ю и҆ дама́скъ и҆ самарі́ю;
10 ѩ҆́коже сїѧ҄ взѧ́хъ, и҆ всѧ҄ кнѧжє́нїѧ возмѹ̀. Возрыда́йте, и҆зва҄ѧннаѧ во ї҆ер҇ли́мѣ и҆ въ самарі́и:
11 ѩ҆́коже бо сотвори́хъ самарі́и и҆ рѹкотворє́ннымъ є҆ѧ̀, та́кѡ сотворю̀ и҆ ї҆ер҇ли́мѹ и҆ кѹмі́рѡмъ є҆гѡ̀.
12 И҆ бѹ́детъ, є҆гда̀ сконча́етъ гд҇ь всѧ҄ творѧ̀ въ горѣ̀ сїѡ́ни и҆ во ї҆ер҇ли́мѣ, наведе́тъ на ѹ҆́мъ вели́кїй, на кнѧ́зѧ а҆ссѷрі́йска и҆ на высотѹ̀ сла́вы ѻ҆́чїю є҆гѡ̀.
13 Рече́ бо: крѣ́постїю рѹкѝ моеѧ̀ сотворю̀, и҆ премѹ́дростїю ра́зѹма (моегѡ̀) ѿимѹ̀ предѣ́лы ѩ҆зы́кѡвъ, и҆ си́лѹ и҆́хъ плѣню̀,
14 и҆ сотрѧсѹ̀ гра́ды населє́ныѧ, и҆ вселе́ннѹю всю̀ ѡ҆б̾имѹ̀ рѹко́ю мое́ю ѩ҆́кѡ гнѣздо̀, и҆ ѩ҆́кѡ ѡ҆ста́влєнаѧ ѩ҆́ица возмѹ̀: и҆ нѣ́сть, и҆́же ѹ҆бѣжи́тъ менє̀, и҆лѝ проти́вѹ мнѣ̀ рече́тъ, и҆ ѿве́рзетъ ѹ҆ста̀ и҆ глѹми́тъ.
15 Є҆да̀ просла́витсѧ сѣки́ра без̾ сѣкѹ́щагѡ є҆́ю; и҆лѝ вознесе́тсѧ пила̀ без̾ влекѹ́щагѡ ю҆̀; Та́кожде а҆́ще кто̀ во́зметъ же́злъ, и҆лѝ дре́во: и҆ не та́кѡ.
16 Но по́слетъ гд҇ь саваѡ́ѳъ на твою̀ че́сть безче́стїе, и҆ на твою̀ сла́вѹ ѻ҆́гнь горѧ̀ возгори́тсѧ.
17 И҆ бѹ́детъ свѣ́тъ ї҆и҃левъ во ѻ҆́гнь, и҆ ѡ҆ст҃и́тъ є҆го̀ ѻ҆гне́мъ горѧ́щимъ, и҆ поѧ́стъ ѩ҆́кѡ сѣ́но вещество̀.
18 Въ то́й де́нь ѹ҆га́снѹтъ го́ры и҆ хо́лми и҆ дѹбра҄вы, и҆ поѧ́стъ ѿ дѹшѝ да́же до пло́тей: и҆ бѹ́детъ бѣжа́й, ѩ҆́кѡ бѣжа́й ѿ пла́мене горѧ́ща:
19 и҆ ѡ҆ста́вльшїисѧ ѿ ни́хъ бѹ́дѹтъ въ число̀, и҆ ѻ҆троча̀ ма́лое напи́шетъ ѧ҆̀.
20 И҆ бѹ́детъ въ то́й де́нь, не приложи́тсѧ ктомѹ̀ ѡ҆ста́нокъ ї҆и҃левъ, и҆ спасе́ннїи ї҆а҄кѡвли не бѹ́дѹтъ ктомѹ̀ ѹ҆пова́юще на ѡ҆би́дѣвшыѧ и҆̀хъ, но бѹ́дѹтъ ѹ҆пова́юще на бг҃а ст҃а́го ї҆и҃лева и҆́стиною.
21 И҆ ѡ҆брати́тсѧ ѡ҆ста́нокъ ї҆а́кѡвль къ бг҃ѹ крѣ́пкомѹ.
22 И҆ а҆́ще бѹ́дѹтъ лю́дїе ї҆и҃лєвы ѩ҆́кѡ песо́къ морскі́й, ѡ҆ста́нокъ и҆́хъ спасе́тсѧ:
23 сло́во бо соверша́ѧ и҆ сокраща́ѧ пра́вдою, ѩ҆́кѡ сло́во сокраще́но сотвори́тъ гд҇ь во все́й вселе́ннѣй.
24 Сегѡ̀ ра́ди сїѧ҄ гл҃етъ гд҇ь саваѡ́ѳъ: не бо́йтесѧ, лю́дїе моѝ, ѿ а҆ссѷрі́анъ, живѹ́щїи въ сїѡ́нѣ, ѩ҆́кѡ жезло́мъ порази́тъ тѧ̀: ѩ҆́звѹ бо наво́дитъ на тѧ̀, є҆́же ви́дѣти пѹ́ть є҆гѵ́пта.
25 Є҆ще́ бо ма́лѡ, и҆ преста́нетъ гнѣ́въ, ѩ҆́рость же моѧ̀ на совѣ́тъ и҆́хъ:
26 и҆ воздви́гнетъ бг҃ъ си́лъ на нѧ̀ ѩ҆́звѹ, ѩ҆́кѡ ѩ҆́звѹ мадїа́млю на мѣ́стѣ ско́рби, и҆ ѩ҆́рость є҆гѡ̀ на пѹ́ть и҆́же къ мо́рю, на пѹ́ть и҆́же во є҆гѵ́петъ:
27 и҆ бѹ́детъ въ то́й де́нь, ѿи́метсѧ и҆́го є҆гѡ̀ ѿ ра́мене твоегѡ̀ и҆ стра́хъ є҆гѡ̀ ѿ тебє̀, и҆ согнїе́тъ и҆́го ѿ ра́менъ ва́шихъ.
28 Прїи́детъ бо во гра́дъ а҆гга́й, и҆ пре́йдетъ въ магеддѡ̀, и҆ въ махма́сѣ положи́тъ сосѹ́ды своѧ҄.
29 И҆ мине́тъ де́брь, и҆ прїи́детъ во а҆гга́й: стра́хъ прїи́метъ рамѹ̀ гра́дъ саѹ́ловъ,
30 побѣ́гнетъ дще́рь галі́млѧ, ѹ҆слы́шитсѧ въ лаїсѣ̀, ѹ҆слы́шитсѧ во а҆наѳѡ́ѳѣ.
31 И҆ ѹ҆жасе́сѧ мадеми́на и҆ живѹ́щїи во гїви́мѣ.
32 Ѹ҆тѣша́йте дне́сь є҆́же на пѹтѝ пребы́ти: ѹ҆тѣша́йте рѹко́ю го́рѹ дще́рь сїѡ́ню, и҆ хо́лми, и҆̀же во ї҆ер҇ли́мѣ:
33 сѐ, влдка гд҇ь саваѡ́ѳъ смѧте́тъ сла҄вныѧ со крѣ́постїю, и҆ высо́цїи ѹ҆кори́зною сокрѹша́тсѧ, и҆ высо́цыи смирѧ́тсѧ,
34 и҆ падѹ́тъ высо́цыи мече́мъ, лїва́нъ же съ высо́кими паде́тсѧ. |
