1 Сїѐ пре́жде и҆спі́й, ско́рѡ творѝ, страно̀ завѹлѡ́нѧ и҆ землѐ нефѳалі́млѧ, и҆ про́чїи при мо́ри живѹ́щїи, и҆ ѡ҆б̾ ѻ҆нѹ̀ странѹ̀ ї҆ѻрда́на, галїле́а ѩ҆зы́кѡвъ.
2 Лю́дїе ходѧ́щїи во тмѣ̀ ви́дѣша свѣ́тъ ве́лїй: живѹ́щїи во странѣ̀ и҆ сѣ́ни сме́ртнѣй, свѣ́тъ возсїѧ́етъ на вы̀.
3 Мно́жайшїи лю́дїе, ѩ҆̀же и҆зве́лъ є҆сѝ, въ весе́лїи твое́мъ: и҆ возвеселѧ́тсѧ пред̾ тобо́ю, ѩ҆́коже веселѧ́щїисѧ въ жа́твѹ, и҆ ѩ҆́коже веселѧ́тсѧ дѣлѧ́щїи коры҄сти.
4 Занѐ ѿѧ́тсѧ ѩ҆ре́мъ лежа́й на ни́хъ, и҆ же́злъ, и҆́же на вы́и и҆́хъ: же́злъ бо и҆стѧзѹ́ющихъ разсы́па гд҇ь, ѩ҆́коже въ де́нь, и҆́же на мадїа́ма.
5 ѩ҆́кѡ всѧ́кѹю ѻ҆де́ждѹ со́браннѹ ле́стїю и҆ ри́зѹ съ примире́нїемъ ѿдадѹ́тъ, и҆ восхотѧ́тъ, да бы́ша ѻ҆гне́мъ сожже́ны бы́ли.
6 ѩ҆́кѡ ѻ҆троча̀ роди́сѧ на́мъ, сн҃ъ, и҆ даде́сѧ на́мъ, є҆гѡ́же нача́лство бы́сть на ра́мѣ є҆гѡ̀: и҆ нарица́етсѧ и҆́мѧ є҆гѡ̀: вели́ка совѣ́та а҆́гг҃лъ, чѹ́денъ, совѣ́тникъ, бг҃ъ крѣ́пкїй, властели́нъ, кн҃зь ми́ра, ѻ҆ц҃ъ бѹ́дѹщагѡ вѣ́ка: приведѹ́ бо ми́ръ на кнѧ҄зи, ми́ръ и҆ здра́вїе є҆мѹ̀.
7 И҆ ве́лїе нача́лство є҆гѡ̀, и҆ ми́ра є҆гѡ̀ нѣ́сть предѣ́ла на пр҇то́лѣ дв҃довѣ и҆ на цр҇твѣ є҆гѡ̀, и҆спра́вити є҆̀ и҆ застѹпи́ти є҆го̀ въ сѹдѣ̀ и҆ пра́вдѣ, ѿнн҃ѣ и҆ до вѣ́ка: ре́вность гд҇а саваѡ́ѳа сотвори́тъ сїѧ҄.
8 Сме́рть {Є҆вр.: сло́во.} посла̀ гд҇ь на ї҆а́кѡва, и҆ прїи́де на ї҆и҃лѧ:
9 и҆ ѹ҆разѹмѣ́ютъ всѝ лю́дїе є҆фре́мѡвы и҆ живѹ́щїи въ самарі́и, въ досажде́нїи и҆ высо́цѣмъ се́рдцы глаго́люще:
10 плї҄нѳы падо́ша, но прїиди́те, и҆зсѣче́мъ ка́менїе и҆ посѣче́мъ черни́чїе и҆ ке́дры, и҆ сози́ждемъ себѣ̀ сто́лпъ.
11 И҆ разрѹши́тъ бг҃ъ востаю́щыѧ на го́рѹ сїѡ́ню, и҆ врагѝ є҆гѡ̀ разсы́плетъ:
12 сѷрі́ю ѿ востѡ́къ со́лнца и҆ є҆́ллины ѿ за́пада со́лнца, поѧда́ющыѧ ї҆и҃лѧ всѣ́ми ѹ҆сты҄. Во всѣ́хъ си́хъ не ѿврати́сѧ ѩ҆́рость є҆гѡ̀, но є҆щѐ рѹка̀ є҆гѡ̀ высока̀.
13 И҆ лю́дїе не ѡ҆брати́шасѧ, до́ндеже ѩ҆́звени бы́ша, и҆ гд҇а не взыска́ша.
14 И҆ ѿѧ́тъ гд҇ь ѿ ї҆и҃лѧ главѹ̀ и҆ ѡ҆́шибъ, вели́ка и҆ ма́ла, во є҆ди́нъ де́нь:
15 ста́рца и҆ чѹдѧ́щихсѧ ли́цамъ, сїѐ нача́ло: и҆ проро́ка ѹ҆ча́ща беззакѡ́ннаѧ, се́й ѡ҆́шибъ.
16 И҆ бѹ́дѹтъ блажа́щїи люді́й си́хъ льстѧ́ше, и҆ льстѧ́тъ, ѩ҆́кѡ да поглотѧ́тъ ѧ҆̀.
17 Сегѡ̀ ра́ди ѡ҆ ю҆́ношахъ и҆́хъ не возвесели́тсѧ гд҇ь, и҆ сиро́тъ и҆́хъ и҆ вдови́цъ и҆́хъ не поми́лѹетъ: ѩ҆́кѡ всѝ беззако́ннїи и҆ лѹка́вїи, и҆ всѧ҄каѧ ѹ҆ста̀ глаго́лютъ непра́вдѹ. Во всѣ́хъ си́хъ не ѿврати́сѧ ѩ҆́рость є҆гѡ̀, но є҆щѐ рѹка̀ є҆гѡ̀ высока̀.
18 И҆ разгори́тсѧ ѩ҆́кѡ ѻ҆́гнь беззако́нїе, и҆ ѩ҆́кѡ тро́скотъ сѹхі́й поѧде́нъ бѹ́детъ ѻ҆гне́мъ, и҆ разгори́тсѧ въ ча́щахъ дѹбра́вныхъ и҆ поѧ́стъ, ѩ҆̀же ѡ҆́крестъ холмѡ́въ всѧ҄.
19 За ѩ҆́рость гнѣ́ва гд҇нѧ сгорѣ̀ всѧ̀ землѧ̀, и҆ бѹ́дѹтъ лю́дїе ѩ҆́кѡ ѻ҆гне́мъ пожже́ни: человѣ́къ бра́та своегѡ̀ не поми́лѹетъ,
20 но ѹ҆клони́тсѧ на де́сно, ѩ҆́кѡ вза́лчетъ, и҆ снѣ́сть ѿ шѹ́їихъ, и҆ не насы́титсѧ человѣ́къ ѩ҆ды́й плѡ́ти мы́шцы своеѧ̀: снѣ́сть бо манассі́й є҆фре́мово, и҆ є҆фре́мъ манассі́ино, ѩ҆́кѡ вкѹ́пѣ повою́ютъ ї҆ѹ́дѹ.
21 Во всѣ́хъ си́хъ не ѿврати́сѧ ѩ҆́рость (є҆гѡ̀), но є҆щѐ рѹка̀ є҆гѡ̀ высока̀. |
