1 И҆ бы́сть въ лѣ́то, въ не́же ѹ҆́мре ѻ҆зі́а ца́рь, ви́дѣхъ гд҇а сѣдѧ́ща на пр҇то́лѣ высо́цѣ и҆ превознесе́ннѣ, и҆ и҆спо́лнь до́мъ сла́вы є҆гѡ̀.
2 И҆ серафі́ми стоѧ́хѹ ѡ҆́крестъ є҆гѡ̀, ше́сть кри́лъ є҆ди́номѹ и҆ ше́сть кри́лъ дрѹго́мѹ: и҆ двѣма̀ ѹ҆́бѡ покрыва́хѹ ли́ца своѧ҄, двѣма́ же покрыва́хѹ но́ги своѧ҄ и҆ двѣма̀ лета́хѹ.
3 И҆ взыва́хѹ дрѹ́гъ ко дрѹ́гѹ и҆ глаго́лахѹ: ст҃ъ, ст҃ъ, ст҃ъ гд҇ь саваѡ́ѳъ: и҆спо́лнь всѧ̀ землѧ̀ сла́вы є҆гѡ̀.
4 И҆ взѧ́сѧ наддве́рїе ѿ гла́са, и҆́мже вопїѧ́хѹ, и҆ до́мъ напо́лнисѧ ды́ма.
5 И҆ реко́хъ: ѽ, ѡ҆каѧ́нный а҆́зъ, ѩ҆́кѡ ѹ҆мили́хсѧ, ѩ҆́кѡ человѣ́къ сы́й и҆ нечи҄сты ѹ҆стнѣ̀ и҆мы́й, посредѣ̀ люді́й нечи҄стыѧ ѹ҆стнѣ̀ и҆мѹ́щихъ а҆́зъ живѹ̀: и҆ цр҃ѧ̀ гд҇а саваѡ́ѳа ви́дѣхъ ѻ҆чи́ма мои́ма.
6 И҆ по́сланъ бы́сть ко мнѣ̀ є҆ди́нъ ѿ серафі́мѡвъ, и҆ въ рѹцѣ̀ свое́й и҆мѧ́ше ѹ҆́гль горѧ́щь, є҆го́же клеща́ми взѧ́тъ ѿ ѻ҆лтарѧ̀,
7 и҆ прикоснѹ́сѧ ѹ҆стна́мъ мои҄мъ и҆ речѐ: сѐ, прикоснѹ́сѧ сїѐ ѹ҆стна́мъ твои҄мъ, и҆ ѿи́метъ беззакѡ́нїѧ твоѧ҄ и҆ грѣхѝ твоѧ҄ ѡ҆ч҇титъ.
8 И҆ слы́шахъ гла́съ гд҇а гл҃юща: кого̀ послю̀, и҆ кто̀ по́йдетъ къ лю́демъ си҄мъ; И҆ реко́хъ: сѐ, а҆́зъ є҆́смь, послѝ мѧ̀.
9 И҆ речѐ: и҆дѝ и҆ рцы̀ лю́демъ си҄мъ: слѹ́хомъ ѹ҆слы́шите, и҆ не ѹ҆разѹмѣ́ете: и҆ ви́дѧще ѹ҆́зрите, и҆ не ѹ҆ви́дите:
10 ѡ҆дебелѣ́ бо се́рдце люді́й си́хъ, и҆ ѹ҆ши́ма свои́ма тѧ́жкѡ слы́шаша, и҆ ѻ҆́чи своѝ смежи́ша, да не когда̀ ѹ҆́зрѧтъ ѻ҆чи́ма и҆ ѹ҆ши́ма ѹ҆слы́шатъ, и҆ се́рдцемъ ѹ҆разѹмѣ́ютъ и҆ ѡ҆братѧ́тсѧ, и҆ и҆сцѣлю̀ ѧ҆̀.
11 И҆ реко́хъ: доко́лѣ, гд҇и; И҆ речѐ: до́ндеже ѡ҆пѹстѣ́ютъ гра́ди, ѿ є҆́же ненаселє́нымъ бы́ти, и҆ до́мы, ѿ є҆́же не бы́ти человѣ́кѡмъ, и҆ землѧ̀ ѡ҆ста́нетсѧ пѹста̀.
12 И҆ посе́мъ продолжи́тъ бг҃ъ человѣ́ки, и҆ ѹ҆мно́жатсѧ ѡ҆ста́вльшїисѧ на землѝ.
13 И҆ є҆щѐ на не́й є҆́сть десѧти́на, и҆ па́ки бѹ́детъ въ расхище́нїе ѩ҆́коже тереві́нѳъ и҆ ѩ҆́кѡ же́лѹдь, є҆гда̀ и҆спаде́тъ и҆з̾ плю́ски своеѧ̀: сѣ́мѧ ст҃о стоѧ́нїе є҆гѡ̀. |
