1 И҆ и҆́мѹтсѧ се́дмь же́нъ за мѹ́жа є҆ди́наго, глаго́лющѧ: хлѣ́бъ на́шъ ѩ҆́сти бѹ́демъ и҆ въ ри҄зы на́шѧ ѡ҆дѣва́тисѧ, то́чїю и҆́мѧ твоѐ да нарече́тсѧ на на́съ, ѿимѝ ѹ҆кори́знѹ на́шѹ.
2 Въ де́нь ѻ҆́ный возсїѧ́етъ бг҃ъ въ совѣ́тѣ со сла́вою на землѝ, є҆́же вознестѝ и҆ просла́вити ѡ҆ста́нокъ ї҆и҃лѧ.
3 И҆ бѹ́детъ ѡ҆ста́нокъ въ сїѡ́нѣ и҆ ѡ҆ста́нокъ во ї҆ер҇ли́мѣ, ст҃и нарекѹ́тсѧ всѝ напи́саннїи въ жи́знь во ї҆ер҇ли́мѣ:
4 ѩ҆́кѡ ѿмы́етъ гд҇ь скве́рнѹ сынѡ́въ и҆ дще́рей сїѡ́нскихъ и҆ кро́вь ї҆ер҇ли́мскѹ ѡ҆ч҇титъ ѿ среды̀ и҆́хъ дѹ́хомъ сѹда̀ и҆ дѹ́хомъ зно́ѧ.
5 И҆ прїи́детъ гд҇ь, и҆ бѹ́детъ всѐ мѣ́сто горы̀ сїѡ́ни, и҆ всѧ҄ ѩ҆̀же ѡ҆́крестъ є҆ѧ̀ ѡ҆сѣни́тъ ѡ҆́блакъ во дни҄, и҆ ѩ҆́кѡ ды́ма и҆ свѣ́та ѻ҆́гненна горѧ́ща въ нощѝ, все́ю сла́вою покры́етсѧ:
6 и҆ бѹ́детъ въ сѣ́нь ѿ зно́ѧ и҆ въ покро́въ и҆ въ сокрове́нїе ѿ же́стости и҆ дождѧ̀. |
