1 Да сни́детъ бра́тъ моѝ въ вертогра́дъ сво́й и҆ да ѩ҆́стъ пло́дъ ѻ҆во́щїй свои́хъ. Внидо́хъ въ вертогра́дъ мо́й, сестро̀ моѧ̀ невѣ́сто: ѡ҆б̾има́хъ смѵ́рнѹ мою̀ со а҆рѡма́тами мои́ми, ѩ҆до́хъ хлѣ́бъ мо́й съ ме́домъ мои́мъ, пи́хъ вїно̀ моѐ съ млеко́мъ мои́мъ. ѩ҆ди́те, бли́жнїи, и҆ пі́йте и҆ ѹ҆пі́йтесѧ, бра́тїѧ.
2 А҆́зъ сплю̀, а҆ се́рдце моѐ бди́тъ: гла́съ бра́та моегѡ̀ ѹ҆дарѧ́етъ въ двє́ри: ѿве́рзи мѝ, сестро̀ моѧ̀, бли́жнѧѧ моѧ̀, голѹби́це моѧ̀, соверше́ннаѧ моѧ̀: ѩ҆́кѡ глава̀ моѧ̀ напо́лнисѧ росы̀, и҆ вла́си моѝ ка́пель нощны́хъ.
3 Совлеко́хсѧ ри́зы моеѧ̀, ка́кѡ ѡ҆блекѹ́сѧ въ ню̀; ѹ҆мы́хъ но́зѣ моѝ, ка́кѡ ѡ҆скверню̀ и҆̀хъ;
4 Бра́тъ мо́й посла̀ рѹ́кѹ свою̀ сквозѣ̀ сква́жню, и҆ чре́во моѐ вострепета̀ ѿ негѡ̀.
5 Воста́хъ а҆́зъ ѿве́рсти бра́тѹ моемѹ̀: рѹ́цѣ моѝ и҆ска́паша смѵ́рнѹ, пе́рсты моѝ смѵ́рны пѡ́лны на рѹка́хъ заключе́нїѧ.
6 Ѿверзо́хъ а҆́зъ бра́тѹ моемѹ̀: бра́тъ мо́й пре́йде. Дѹша̀ моѧ̀ и҆зы́де въ сло́во є҆гѡ̀: взыска́хъ є҆го̀, и҆ не ѡ҆брѣто́хъ є҆гѡ̀: зва́хъ є҆го̀, и҆ не послѹ́ша менѐ.
7 Ѡ҆брѣто́ша мѧ̀ стра́жїе ѡ҆бходѧ́щїи во гра́дѣ: би́ша мѧ̀, ѩ҆зви́ша мѧ̀, взѧ́ша ве́рхнюю ри́зѹ ѿ менє̀ стра́жїе стѣ́ннїи.
8 Заклѧ́хъ вы̀, дщє́ри ї҆ер҇ли́мскїѧ, въ си́лахъ и҆ въ крѣ́постехъ се́лныхъ: а҆́ще ѡ҆брѧ́щете бра́та моего̀, возвѣсти́те є҆мѹ̀, ѩ҆́кѡ ѹ҆ѧ́звлена любо́вїю а҆́зъ є҆́смь.
9 Что̀ бра́тъ тво́й па́че бра́та, до́браѧ въ жена́хъ; что̀ бра́тъ тво́й ѿ бра́та, ѩ҆́кѡ та́кѡ заклѧ́ла є҆сѝ на́съ;
10 Бра́тъ мо́й бѣ́лъ и҆ че́рменъ, и҆збра́нъ ѿ те́мъ:
11 глава̀ є҆гѡ̀ зла́то и҆збра́нно, власы̀ є҆гѡ̀ кѹдрѧ҄вы, чє́рны ѩ҆́кѡ вра́нъ:
12 ѻ҆́чи є҆гѡ̀ ѩ҆́кѡ голѹби҄цы на и҆сполне́нїихъ во́дъ, и҆змове́ни во млецѣ̀, сѣдѧ́щыѧ въ наполне́нїихъ (во́дъ):
13 лани҄ты є҆гѡ̀ а҆́ки фїа́лы а҆рѡма҄тъ, прозѧба́ющыѧ благово́нїе: ѹ҆стнѣ̀ є҆гѡ̀ крі́ны, ка́плющїи смѵ́рнѹ по́лнѹ:
14 рѹ́цѣ є҆гѡ̀ ѡ҆бто́чєны зла҄ты, напо́лнєны ѳарсі́са: чре́во є҆гѡ̀ сосѹ́дъ слоно́вый на ка́мени сапфі́ровѣ:
15 лы҄ста є҆гѡ̀ столпѝ ма́рморѡвы, ѡ҆снова́ни на степе́нехъ златы́хъ: ви́дъ є҆гѡ̀ ѩ҆́кѡ лїва́нъ, и҆збра́нъ ѩ҆́кѡ ке́дрове:
16 горта́нь є҆гѡ̀ сла́дость, и҆ ве́сь жела́нїе: се́й бра́тъ мо́й и҆ се́й бли́жнїй мо́й, дщє́ри ї҆ер҇ли҄мли.
17 Ка́мѡ ѿи́де бра́тъ тво́й, до́браѧ въ жена́хъ; ка́мѡ ѹ҆клони́сѧ бра́тъ тво́й; и҆ взы́щемъ є҆гѡ̀ съ тобо́ю. |