1 Бл҃же́нъ мѹ́жъ боѧ́йсѧ гд҇а, въ за́повѣдехъ є҆гѡ̀ восхо́щетъ ѕѣлѡ̀.
2 Си́льно на землѝ бѹ́детъ сѣ́мѧ є҆гѡ̀, ро́дъ пра́выхъ благослови́тсѧ:
3 сла́ва и҆ бога́тство въ домѹ̀ є҆гѡ̀, и҆ пра́вда є҆гѡ̀ пребыва́етъ въ вѣ́къ вѣ́ка.
4 Возсїѧ̀ во тмѣ̀ свѣ́тъ пра҄вымъ: мл҇тивъ и҆ ще́дръ и҆ првднъ.
5 Бл҃гъ мѹ́жъ ще́дрѧ и҆ даѧ̀: ѹ҆стро́итъ словеса̀ своѧ҄ на сѹдѣ̀, ѩ҆́кѡ въ вѣ́къ не подви́житсѧ.
6 Въ па́мѧть вѣ́чнѹю бѹ́детъ првдникъ.
7 Ѿ слѹ́ха ѕла̀ не ѹ҆бои́тсѧ:
8 гото́во се́рдце є҆гѡ̀ ѹ҆пова́ти на гд҇а: ѹ҆тверди́сѧ се́рдце є҆гѡ̀, не ѹ҆бои́тсѧ, до́ндеже воззри́тъ на врагѝ своѧ҄.
9 Расточѝ, дадѐ ѹ҆бѡ́гимъ: пра́вда є҆гѡ̀ пребыва́етъ во вѣ́къ вѣ́ка: ро́гъ є҆гѡ̀ вознесе́тсѧ въ сла́вѣ.
10 Грѣ́шникъ ѹ҆́зритъ и҆ прогнѣ́ваетсѧ зѹбы̀ свои́ми поскреже́щетъ и҆ раста́етъ: жела́нїе грѣ́шника поги́бнетъ. |
