1 И҆сповѣ́мсѧ тебѣ̀, гд҇и, всѣ́мъ се́рдцемъ мои́мъ въ совѣ́тѣ пра́выхъ и҆ со́нмѣ.
2 Вє́лїѧ дѣла̀ гд҇нѧ, и҆зы҄скана во всѣ́хъ во́лѧхъ є҆гѡ̀:
3 и҆сповѣ́данїе и҆ великолѣ́пїе дѣ́ло є҆гѡ̀, и҆ пра́вда є҆гѡ̀ пребыва́етъ въ вѣ́къ вѣ́ка.
4 Па́мѧть сотвори́лъ є҆́сть чѹде́съ свои́хъ: мл҇тивъ и҆ ще́дръ гд҇ь.
5 Пи́щѹ дадѐ боѧ́щымсѧ є҆гѡ̀: помѧне́тъ въ вѣ́къ завѣ́тъ сво́й.
6 Крѣ́пость дѣ́лъ свои́хъ возвѣстѝ лю́демъ свои҄мъ, да́ти и҆̀мъ достоѧ́нїе ѩ҆зы҄къ.
7 Дѣла̀ рѹ́къ є҆гѡ̀ и҆́стина и҆ сѹ́дъ, вѣ҄рны всѧ҄ за́пѡвѣди є҆гѡ̀,
8 ѹ҆твержє́ны въ вѣ́къ вѣ́ка, сотворє́ны во и҆́стинѣ и҆ правотѣ̀.
9 И҆збавле́нїе посла̀ лю́демъ свои҄мъ: заповѣ́да въ вѣ́къ завѣ́тъ сво́й: ст҃о и҆ стра́шно и҆́мѧ є҆гѡ̀.
10 Нача́ло премдрости стра́хъ гд҇ень, ра́зѹмъ же бл҃гъ всѣ҄мъ творѧ́щымъ и҆̀: хвала̀ є҆гѡ̀ пребыва́етъ въ вѣ́къ вѣ́ка. |
