1 Благословѝ, дѹшѐ моѧ̀, гд҇а, и҆ всѧ҄ внѹ́трєннѧѧ моѧ҄, и҆́мѧ ст҃о́е є҆гѡ̀:
2 благословѝ, дѹшѐ моѧ̀, гд҇а, и҆ не забыва́й всѣ́хъ воздаѧ́нїй є҆гѡ̀:
3 ѡ҆чища́ющаго всѧ҄ беззакѡ́нїѧ твоѧ҄, и҆зцѣлѧ́ющаго всѧ҄ недѹ́ги твоѧ҄,
4 и҆збавлѧ́ющаго ѿ и҆стлѣ́нїѧ живо́тъ тво́й, вѣнча́ющаго тѧ̀ мл҇тїю и҆ щедро́тами,
5 и҆сполнѧ́ющаго во бл҃ги́хъ жела́нїе твоѐ: ѡ҆бнови́тсѧ ѩ҆́кѡ ѻ҆́рлѧ ю҆́ность твоѧ̀.
6 Творѧ́й мл҇тыни гд҇ь и҆ сѹдбѹ̀ всѣ҄мъ ѡ҆би҄димымъ.
7 Сказа̀ пѹти҄ своѧ҄ мѡѷсе́ови, сыновѡ́мъ ї҆и҃лєвымъ хотѣ҄нїѧ своѧ҄.
8 Ще́дръ и҆ мл҇тивъ гд҇ь, долготерпѣли́въ и҆ многомл҇тивъ.
9 Не до конца̀ прогнѣ́ваетсѧ, нижѐ во вѣ́къ враждѹ́етъ:
10 не по беззако́нїємъ на́шымъ сотвори́лъ є҆́сть на́мъ, нижѐ по грѣхѡ́мъ на́шымъ возда́лъ є҆́сть на́мъ.
11 ѩ҆́кѡ по высотѣ̀ небе́снѣй ѿ землѝ, ѹ҆тверди́лъ є҆́сть гд҇ь мл҇ть свою̀ на боѧ́щихсѧ є҆гѡ̀:
12 є҆ли́кѡ ѿстоѧ́тъ восто́цы ѿ за҄падъ, ѹ҆да́лилъ є҆́сть ѿ на́съ беззакѡ́нїѧ на҄ша.
13 ѩ҆́коже ще́дритъ ѻ҆те́цъ сы́ны, ѹ҆ще́дри гд҇ь боѧ́щихсѧ є҆гѡ̀.
14 ѩ҆́кѡ то́й позна̀ созда́нїе на́ше, помѧнѹ̀, ѩ҆́кѡ пе́рсть є҆смы̀.
15 Человѣ́къ, ѩ҆́кѡ трава̀ дні́е є҆гѡ̀, ѩ҆́кѡ цвѣ́тъ се́лный, та́кѡ ѡ҆цвѣте́тъ:
16 ѩ҆́кѡ дѹ́хъ про́йде въ не́мъ, и҆ не бѹ́детъ, и҆ не позна́етъ ктомѹ̀ мѣ́ста своегѡ̀.
17 Мл҇ть же гд҇нѧ ѿ вѣ́ка и҆ до вѣ́ка на боѧ́щихсѧ є҆гѡ̀,
18 и҆ пра́вда є҆гѡ̀ на сынѣ́хъ сынѡ́въ, хранѧ́щихъ завѣ́тъ є҆гѡ̀ и҆ по́мнѧщихъ за́пѡвѣди є҆гѡ̀ твори́ти ѧ҆̀.
19 Гд҇ь на нб҃сѝ ѹ҆гото́ва пр҇то́лъ сво́й, и҆ цр҇тво є҆гѡ̀ всѣ́ми ѡ҆блада́етъ.
20 Благослови́те гд҇а, всѝ а҆́гг҃ли є҆гѡ̀, си́льнїи крѣ́постїю, творѧ́щїи сло́во є҆гѡ̀, ѹ҆слы́шати гла́съ слове́съ є҆гѡ̀.
21 Благослови́те гд҇а, всѧ҄ си҄лы є҆гѡ̀, слѹги҄ є҆гѡ̀, творѧ́щїи во́лю є҆гѡ̀.
22 Благослови́те гд҇а, всѧ҄ дѣла̀ є҆гѡ̀ на всѧ́комъ мѣ́стѣ влдчества є҆гѡ̀: благословѝ, дѹшѐ моѧ̀, гд҇а. |
