1 Пѣ́снь ѱалма̀ а҆са́фѹ,
2 Бж҃е, кто̀ ѹ҆подо́битсѧ тебѣ̀; не премолчѝ, нижѐ ѹ҆кротѝ {нижѐ ѹ҆кроти́сѧ}, бж҃е:
3 ѩ҆́кѡ сѐ, вразѝ твоѝ возшѹмѣ́ша, и҆ ненави́дѧщїи тѧ̀ воздвиго́ша главѹ̀.
4 На лю́ди твоѧ҄ лѹка́вноваша во́лею, и҆ совѣща́ша на ст҃ы҄ѧ твоѧ҄.
5 Рѣ́ша: прїиди́те и҆ потреби́мъ ѧ҆̀ ѿ ѩ҆зы҄къ, и҆ не помѧне́тсѧ и҆́мѧ ї҆и҃лево ктомѹ̀.
6 ѩ҆́кѡ совѣща́ша є҆диномышле́нїемъ вкѹ́пѣ, на тѧ̀ завѣ́тъ завѣща́ша:
7 селє́нїѧ ї҆дѹмє́йска и҆ ї҆сма́илїте, мѡа́въ и҆ а҆га́рѧне,
8 гева́лъ и҆ а҆ммѡ́нъ и҆ а҆мали́къ, и҆ноплемє́нницы съ живѹ́щими въ тѵ́рѣ:
9 и҆́бо и҆ а҆ссѹ́ръ прїи́де съ ни́ми, бы́ша въ застѹпле́нїе сыновѡ́мъ лѡ́тѡвымъ:
10 сотворѝ и҆̀мъ ѩ҆́кѡ мадїа́мѹ и҆ сїса́рѣ, ѩ҆́кѡ ї҆аві́мѹ въ пото́цѣ кі́ссовѣ:
11 потреби́шасѧ во а҆ендѡ́рѣ, бы́ша ѩ҆́кѡ гно́й земны́й.
12 Положѝ кнѧ́зи и҆́хъ ѩ҆́кѡ ѡ҆ри́ва и҆ зи́ва, и҆ зеве́а и҆ салма́на, всѧ҄ кнѧ҄зи и҆́хъ,
13 и҆́же рѣ́ша: да наслѣ́димъ себѣ̀ ст҃и́лище бж҃їе.
14 Бж҃е мо́й, положѝ ѧ҆̀ ѩ҆́кѡ ко́ло, ѩ҆́кѡ тро́сть пред̾ лице́мъ вѣ́тра.
15 ѩ҆́кѡ ѻ҆́гнь попалѧ́ѧй дѹбра҄вы, ѩ҆́кѡ пла́мень пожига́ѧй го́ры:
16 та́кѡ пожене́ши ѧ҆̀ бѹ́рею твое́ю, и҆ гнѣ́вомъ твои́мъ смѧте́ши ѧ҆̀.
17 И҆спо́лни ли́ца и҆́хъ безче́стїѧ, и҆ взы́щѹтъ и҆́мене твоегѡ̀, гд҇и.
18 Да постыдѧ́тсѧ и҆ смѧтѹ́тсѧ въ вѣ́къ вѣ́ка, и҆ посра́мѧтсѧ и҆ поги́бнѹтъ.
19 И҆ да позна́ютъ, ѩ҆́кѡ и҆́мѧ тебѣ̀ гд҇ь, ты̀ є҆ди́нъ вы́шнїй по все́й землѝ. |
