1 Въ коне́цъ, ѡ҆ и҆змѣни́тисѧ хотѧ́щихъ, въ столпописа́нїе дв҃дѹ, въ наѹче́нїе:
2 внегда̀ сожжѐ средорѣ́чїе сѷрі́йское и҆ сѷрі́ю сова́лскѹю, и҆ возврати́сѧ ї҆ѡа́въ и҆ поразѝ є҆дѡ́ма въ де́бри соле́й двана́десѧть ты́сѧщъ,
3 Бж҃е, ѿри́нѹлъ ны̀ є҆сѝ и҆ низложи́лъ є҆сѝ на́съ, разгнѣ́валсѧ є҆сѝ и҆ ѹ҆ще́дрилъ є҆сѝ на́съ.
4 Стрѧ́слъ є҆сѝ зе́млю и҆ смѹти́лъ є҆сѝ ю҆̀: и҆зцѣлѝ сокрѹше́нїе є҆ѧ̀, ѩ҆́кѡ подви́жесѧ.
5 Показа́лъ є҆сѝ лю́демъ твои҄мъ жестѡ́каѧ: напои́лъ є҆сѝ на́съ вїно́мъ ѹ҆миле́нїѧ.
6 Да́лъ є҆сѝ боѧ́щымсѧ тебє̀ зна́менїе, є҆́же ѹ҆бѣжа́ти ѿ лица̀ лѹ́ка.
7 ѩ҆́кѡ да и҆зба́вѧтсѧ возлю́бленнїи твоѝ, сп҃сѝ десни́цею твое́ю и҆ ѹ҆слы́ши мѧ̀.
8 Бг҃ъ возгл҃а во ст҃ѣ́мъ свое́мъ: возра́дѹюсѧ, и҆ раздѣлю̀ сїки́мѹ, и҆ ю҆до́ль жили́щъ размѣ́рю.
9 Мо́й є҆́сть галаа́дъ, и҆ мо́й є҆́сть манассі́й, є҆фре́мъ крѣ́пость главы̀ моеѧ̀, ї҆ѹ́да ца́рь мо́й.
10 Мѡа́въ коно́бъ ѹ҆пова́нїѧ моегѡ̀: на ї҆дѹме́ю прострѹ̀ сапо́гъ мо́й: мнѣ̀ и҆ноплемє́нницы покори́шасѧ.
11 Кто̀ введе́тъ мѧ̀ во гра́дъ ѡ҆гражде́нїѧ; и҆лѝ кто̀ наста́витъ мѧ̀ до ї҆дѹме́и;
12 Не ты́ ли, бж҃е, ѿри́нѹвый на́съ; и҆ не и҆зы́деши, бж҃е, въ си́лахъ на́шихъ;
13 Да́ждь на́мъ по́мощь ѿ ско́рби: и҆ сѹ́етно спасе́нїе человѣ́ческо.
14 Ѡ҆ бз҃ѣ сотвори́мъ си́лѹ: и҆ то́й ѹ҆ничижи́тъ стѹжа́ющыѧ на́мъ. |
