1 Въ коне́цъ, ра́зѹма дв҃дѹ,
2 внегда̀ прїитѝ дѡи́кѹ ї҆дѹме́йскѹ, и҆ возвѣсти́ти саѹ́лѹ, и҆ рещѝ є҆мѹ̀: прїи́де дв҃дъ въ до́мъ а҆вїмеле́ховъ,
3 Что̀ хва́лишисѧ во ѕло́бѣ, си́льне; беззако́нїе ве́сь де́нь,
4 непра́вдѹ ѹ҆мы́сли ѧ҆зы́къ тво́й: ѩ҆́кѡ бри́твѹ и҆з̾ѡщре́нѹ сотвори́лъ є҆сѝ ле́сть.
5 Возлюби́лъ є҆сѝ ѕло́бѹ па́че бл҃госты́ни, непра́вдѹ не́же глаго́лати пра́вдѹ:
6 возлюби́лъ є҆сѝ всѧ҄ глаго́лы потѡ́пныѧ, ѧ҆зы́къ льсти́въ.
7 Сегѡ̀ ра́ди бг҃ъ разрѹши́тъ тѧ̀ до конца̀: восто́ргнетъ тѧ̀, и҆ пресели́тъ тѧ̀ ѿ селе́нїѧ твоегѡ̀ и҆ ко́рень тво́й ѿ землѝ живы́хъ.
8 Ѹ҆́зрѧтъ првднїи и҆ ѹ҆боѧ́тсѧ, и҆ ѡ҆ не́мъ возсмѣю́тсѧ и҆ рекѹ́тъ:
9 сѐ, человѣ́къ, и҆́же не положѝ бг҃а помо́щника себѣ̀, но ѹ҆пова̀ на мно́жество бога́тства своегѡ̀, и҆ возмо́же сѹето́ю свое́ю.
10 А҆́зъ же ѩ҆́кѡ ма́слина плодови́та въ домѹ̀ бж҃їи: ѹ҆пова́хъ на мл҇ть бж҃їю во вѣ́къ и҆ въ вѣ́къ вѣ́ка.
11 И҆сповѣ́мсѧ тебѣ̀ въ вѣ́къ, ѩ҆́кѡ сотвори́лъ є҆сѝ: и҆ терплю̀ и҆́мѧ твоѐ, ѩ҆́кѡ бл҃го пред̾ прпдбными твои́ми. |
