1 Къ тебѣ̀, гд҇и, воззовѹ̀, бж҃е мо́й: да не премолчи́ши ѿ менє̀ {ѡ҆ мнѣ̀}: да не когда̀ премолчи́ши ѿ менє̀ {ѡ҆ мнѣ̀}, и҆ ѹ҆подо́блюсѧ низходѧ́щымъ въ ро́въ.
2 Ѹ҆слы́ши, гд҇и, гла́съ моле́нїѧ моегѡ̀, внегда̀ моли́тимисѧ къ тебѣ̀, внегда̀ воздѣ́ти мѝ рѹ́цѣ моѝ ко хра́мѹ ст҃о́мѹ твоемѹ̀.
3 Не привлецы̀ менѐ со грѣ҄шники, и҆ съ дѣ́лающими непра́вдѹ не погѹбѝ менѐ, глаго́лющими ми́ръ съ бли́жними свои́ми, ѕла҄ѧ же въ сердца́хъ свои́хъ.
4 Да́ждь и҆̀мъ, гд҇и, по дѣлѡ́мъ и҆́хъ и҆ по лѹка́вствѹ начина́нїй и҆́хъ, по дѣлѡ́мъ рѹкѹ̀ и҆́хъ да́ждь и҆̀мъ, возда́ждь воздаѧ́нїе и҆́хъ и҆̀мъ.
5 ѩ҆́кѡ не разѹмѣ́ша въ дѣла̀ гд҇нѧ и҆ въ дѣла̀ рѹкѹ̀ є҆гѡ̀: разори́ши ѧ҆̀ и҆ не сози́ждеши ѧ҆̀.
6 Блг҇ве́нъ гд҇ь, ѩ҆́кѡ ѹ҆слы́ша гла́съ моле́нїѧ моегѡ̀.
7 Гд҇ь помо́щникъ мо́й и҆ защи́титель мо́й: на него̀ ѹ҆пова̀ се́рдце моѐ, и҆ помо́же мѝ, и҆ процвѣтѐ пло́ть моѧ̀: и҆ во́лею мое́ю и҆сповѣ́мсѧ є҆мѹ̀.
8 Гд҇ь ѹ҆твержде́нїе люді́й свои́хъ и҆ защи́титель спасе́нїй хрїста̀ своегѡ̀ є҆́сть.
9 Сп҃сѝ лю́ди твоѧ҄, и҆ блг҇вѝ достоѧ́нїе твоѐ, и҆ ѹ҆пасѝ ѧ҆̀, и҆ возмѝ {и҆ вознесѝ} ѧ҆̀ до вѣ́ка. |
