1 Приложи́въ же є҆щѐ є҆лїѹ́съ, речѐ:
2 пожди́ ми ма́лѡ є҆щѐ, да тѧ̀ наѹчѹ̀: є҆ще́ бо ѹ҆ менє̀ є҆́сть сло́во.
3 Прїи́мъ хи́трость мою̀ ѿдале́ча, дѣ́лы же мои́ми пра́вєднаѧ рекѹ̀ вои́стиннѹ:
4 и҆ не непра́вєдны глаго́лы без̾ пра́вды ѹ҆разѹмѣ́еши.
5 Ви́ждь же, ѩ҆́кѡ гд҇ь не ѿри́нетъ неѕло́бивагѡ:
6 си́ленъ крѣ́постїю сердца̀ нечести́выхъ не ѡ҆живи́тъ и҆ сѹ́дъ ни́щымъ да́стъ,
7 не ѿи́метъ ѿ правди́вагѡ ѻ҆че́съ свои́хъ, и҆ со цари҄ на престо́лѣ посади́тъ и҆̀хъ на побѣ́дѹ, и҆ вознесѹ́тсѧ.
8 Свѧ́заннїи въ рѹчны́хъ ѹ҆́захъ ѩ҆́ти бѹ́дѹтъ ѹ҆́жами нищеты̀,
9 и҆ возвѣсти́тъ и҆̀мъ дѣла̀ и҆́хъ и҆ прегрѣше́нїе и҆́хъ, ѩ҆́кѡ ѹ҆крѣпѧ́тсѧ:
10 но правди́ваго ѹ҆слы́шитъ, и҆ речѐ, ѩ҆́кѡ ѡ҆братѧ́тсѧ ѿ непра́вды.
11 А҆́ще ѹ҆слы́шатъ и҆ порабо́таютъ, сконча́ютъ дни҄ своѧ҄ во благи́хъ и҆ лѣ҄та своѧ҄ въ благолѣ́потѣ:
12 нечести́выхъ же не спасе́тъ, занѐ не хотѣ́ша позна́ти гд҇а и҆ зане́же ѹ҆чи́ми не послѹшли́ви бѣ́ша.
13 И҆ лицемѣ́ри се́рдцемъ возмѹтѧ́тъ ѩ҆́рость: не возопїю́тъ, ѩ҆́кѡ свѧза̀ и҆̀хъ:
14 да ѹ҆́мретъ ѹ҆̀бо въ ю҆́ности дѹша̀ и҆́хъ, житїе́ же и҆́хъ ѹ҆ѧзвлѧ́емо а҆́гг҃лы,
15 зане́же ѡ҆скорби́ша недѹ́жна и҆ не́мощна, сѹ́дъ же кро́ткихъ и҆зложи́тъ.
16 Е҆ще́ же и҆сто́ргнѹ тѧ̀ ѿ ѹ҆́стъ вра́жїихъ: бе́здна, проли́тїе под̾ не́ю, и҆ сни́де трапе́за твоѧ̀ и҆спо́лнена тѹ́ка.
17 Не ѡ҆скѹдѣ́етъ же ѿ пра́ведныхъ сѹ́дъ:
18 ѩ҆́рость же на нечести҄выѧ бѹ́детъ, нече́стїѧ ра́ди дарѡ́въ и҆́хъ, и҆̀хже прїима́хѹ на непра́вдѣ.
19 Да не ѹ҆клони́тъ тѧ̀ во́лею ѹ҆́мъ ѿ мольбы̀ въ бѣдѣ̀ сѹ́щихъ немощны́хъ и҆ всѣ́хъ содержа́щихъ крѣ́пость.
20 Не привлецы̀ но́щи, є҆́же взы́ти лю́демъ вмѣ́стѡ и҆́хъ:
21 но сохрани́сѧ, да не содѣ́еши ѕла̀: си́хъ бо ра́ди и҆з̾ѧ́тъ є҆сѝ ѿ нищеты̀.
22 Сѐ, крѣ́пкїй ѹ҆держи́тъ крѣ́постїю свое́ю: кто́ бо є҆́сть, ѩ҆́коже то́й, си́ленъ;
23 и҆ кто̀ є҆́сть и҆спытѹ́ѧй дѣ́лъ є҆гѡ̀; и҆лѝ кто̀ рекі́й: содѣ́ѧ непра́вдѹ;
24 Помѧнѝ, ѩ҆́кѡ вє́лїѧ дѣла̀ є҆гѡ̀ сѹ́ть, и҆́миже владѣ́ша мѹ́жїе.
25 Всѧ́къ человѣ́къ ви́дитъ въ себѣ̀, є҆ли́цы ѹ҆ѧзвлѧ́еми сѹ́ть человѣ́цы.
26 Сѐ, крѣ́пкїй вели́кїй, и҆ не ѹ҆вѣ́мы: число̀ лѣ́тъ є҆гѡ̀ безконе́чное:
27 и҆зочтє́нны же є҆мѹ̀ сѹ́ть ка҄пли дождє́вныѧ, и҆ и҆злїю́тсѧ дожде́мъ во ѡ҆́блакъ:
28 потекѹ́тъ ѡ҆бетша҄нїѧ, ѡ҆сѣни́ша же ѡ҆́блацы над̾ премно́гими людьмѝ: вре́мѧ поста́ви скотѹ̀, вѣ́дѧтъ же ло́жа чи́нъ. Ѡ҆ всѣ́хъ си́хъ не диви́тлитисѧ ѹ҆́мъ, и҆ не и҆змѣнѧ́етлисѧ тѝ се́рдце ѿ тѣ́ла;
29 И҆ а҆́ще ѹ҆разѹмѣ́етъ просте́ртїе ѡ҆́блака, ра́венство ски́нїи є҆гѡ̀:
30 сѐ, простира́етъ на ню̀ свѣ́тъ и҆ корє́нїѧ морска҄ѧ покры̀:
31 тѣ́ми бо сѹ́дитъ лю́демъ, да́стъ пи́щѹ могѹ́щемѹ.
32 На рѹкѹ̀ покры̀ свѣ́тъ и҆ заповѣ́да ѡ҆ не́мъ срѣта́ющемѹ:
33 возвѣсти́тъ ѡ҆ не́мъ дрѹ́гѹ своемѹ̀ гд҇ь, стѧжа́нїе, и҆ ѡ҆ непра́вдѣ. |
