1 א ויען אליהו ויאמר
2 ב הזאת חשבת למשפט אמרת צדקי מאל
3 ג כי-תאמר מה-יסכן-לך מה-אעיל מחטאתי
4 ד אני אשיבך מלין-- ואת-רעיך עמך
5 ה הבט שמים וראה ושור שחקים גבהו ממך
6 ו אם-חטאת מה-תפעל-בו ורבו פשעיך מה-תעשה-לו
7 ז אם-צדקת מה-תתן-לו או מה-מידך יקח
8 ח לאיש-כמוך רשעך ולבן-אדם צדקתך
9 ט מרב עשוקים יזעיקו ישועו מזרוע רבים
10 י ולא-אמר--איה אלוה עשי נתן זמרות בלילה
11 יא מלפנו מבהמות ארץ ומעוף השמים יחכמנו
12 יב שם יצעקו ולא יענה-- מפני גאון רעים
13 יג אך-שוא לא-ישמע אל ושדי לא ישורנה
14 יד אף כי-תאמר לא תשורנו דין לפניו ותחולל לו
15 טו ועתה--כי-אין פקד אפו ולא-ידע בפש מאד
16 טז ואיוב הבל יפצה-פיהו בבלי-דעת מלין יכבר |
