1 א ויען איוב ויאמר
2 ב מה-עזרת ללא-כח הושעת זרוע לא-עז
3 ג מה-יעצת ללא חכמה ותשיה לרב הודעת
4 ד את-מי הגדת מלין ונשמת-מי יצאה ממך
5 ה הרפאים יחוללו-- מתחת מים ושכניהם
6 ו ערום שאול נגדו ואין כסות לאבדון
7 ז נטה צפון על-תהו תלה ארץ על-בלימה
8 ח צרר-מים בעביו ולא-נבקע ענן תחתם
9 ט מאחז פני-כסה פרשז עליו עננו
10 י חק-חג על-פני-מים-- עד-תכלית אור עם-חשך
11 יא עמודי שמים ירופפו ויתמהו מגערתו
12 יב בכחו רגע הים ובתובנתו (ובתבונתו) מחץ רהב
13 יג ברוחו שמים שפרה חללה ידו נחש ברח
14 יד הן-אלה קצות דרכו-- ומה-שמץ דבר נשמע-בו ורעם גבורתו מי יתבונן |
