1 И҆ бы́сть во́пль люді́й и҆ же́нъ и҆́хъ вели́къ на бра́тїю свою̀ ї҆ѹдє́и.
2 И҆ бы́ша нѣ́цыи глаго́люще: сы́нове на́ши и҆ дщє́ри на́шѧ мно́зи сѹ́ть на́мъ, и҆ да во́змемъ (за цѣ́нѹ) пшени́цѹ и҆ ѩ҆ди́мъ и҆ жи́ви бѹ́демъ.
3 И҆ бы́ша нѣ́цыи глаго́люще: се́ла на҄ша и҆ вїногра́ды на́шѧ и҆ до́мы на́шѧ мы̀ да дади́мъ въ зало́гъ, и҆ во́змемъ пшени́цѹ, и҆ ѩ҆́сти бѹ́демъ.
4 И҆ бы́ша нѣ́цыи глаго́люще: взаи́мъ взѧ́хомъ сребро̀ на да҄ни царє́вы, дади́мъ се́ла на҄ша и҆ вїногра́ды на́шѧ и҆ до́мы на́шѧ:
5 и҆ нн҃ѣ ѩ҆́коже пло́ть бра́тїй на́шихъ, пло́ть на́ша, ѩ҆́коже сы́нове и҆́хъ, сы́нове на́ши: и҆ сѐ, мы̀ порабоща́емъ сы́ны на́шѧ и҆ дщє́ри на́шѧ въ рабы҄, и҆ сѹ́ть ѿ дще́рей на́шихъ порабощє́ны, и҆ нѣ́сть си́лы въ рѹка́хъ на́шихъ (ѿкѹпи́ти) и҆ се́ла на҄ша и҆ вїногра́ды на́шѧ ѹ҆ вельмо́жъ.
6 И҆ ѡ҆скорбѣ́хъ ѕѣлѡ̀, є҆гда̀ ѹ҆слы́шахъ во́пль и҆́хъ и҆ словеса̀ сїѧ҄.
7 И҆ ѹ҆совѣ́това се́рдце моѐ во мнѣ̀, и҆ воспрети́хъ держа҄внымъ и҆ нача҄лнымъ и҆ реко́хъ и҆̀мъ: ли́хвы ли кі́йждо ѿ бра́та своегѡ̀ и҆стѧ́жетъ, ю҆́же вы̀ и҆стѧзѹ́ете; и҆ собра́хъ проти́вѹ и҆̀мъ собра́нїе вели́ко
8 и҆ реко́хъ и҆̀мъ: мы̀ и҆скѹпи́хомъ бра́тїю на́шѹ ї҆ѹдеѡ́въ, про́даныхъ ѩ҆зы́кѡмъ, по си́лѣ на́шей: вы́ же прода́сте бра́тїю ва́шѹ, и҆ ѿдадѹ́тсѧ на́мъ; И҆ ѹ҆молча́ша, и҆ не ѡ҆брѣто́ша что̀ ѿвѣща́ти.
9 И҆ реко́хъ: не добро̀ дѣ́ло, є҆́же вы̀ творитѐ: та́кѡ не во стра́сѣ бг҃а на́шегѡ (ходѧ́ще) ѹ҆бѣжите́ ли ѿ поноше́нїѧ ѩ҆зы́кѡвъ врагѡ́въ на́шихъ;
10 и҆ а҆́зъ и҆ бра́тїѧ моѧ҄ и҆ зна́емїи моѝ взаи́мъ да́хомъ и҆̀мъ пѣ҄нѧзи и҆ пшени́цѹ: ѡ҆ста́вимъ ѹ҆̀бо лихои́мство сїѐ:
11 возврати́те же и҆̀мъ дне́сь се́ла и҆́хъ и҆ вїногра́ды и҆́хъ и҆ ма҄слины и҆́хъ и҆ до́мы и҆́хъ, и҆ ѿ сребра̀ пшени́цѹ и҆ вїно̀ и҆ є҆ле́й ѿдади́те и҆̀мъ.
12 И҆ реко́ша: ѿдади́мъ и҆ ѿ ни́хъ не взы́щемъ, та́кѡ сотвори́мъ, ѩ҆́коже ты̀ глаго́леши. И҆ призва́хъ свѧще́нникѡвъ и҆ заклѧ́хъ и҆̀хъ сотвори́ти по словесѝ семѹ̀.
13 И҆ ѡ҆трѧсо́хъ ѻ҆де́ждѹ мою̀ и҆ реко́хъ: та́кѡ да и҆стрѧсе́тъ бг҃ъ всѧ́каго мѹ́жа, и҆́же не и҆спо́лнитъ сло́ва сегѡ̀, ѿ до́мѹ є҆гѡ̀ и҆ ѿ трѹдѡ́въ є҆гѡ̀, и҆ да бѹ́детъ та́кѡ ѿтрѧсе́нъ и҆ то́щь. И҆ речѐ всѐ мно́жество: а҆ми́нь. И҆ восхвали́ша бг҃а. И҆ сотвори́ша лю́дїе по глаго́лѹ семѹ̀.
14 Ѿ днѐ тогѡ̀, въ ѻ҆́ньже повелѣ̀ (ца́рь) мнѣ̀ бы́ти вожде́мъ и҆́хъ въ землѝ ї҆ѹ́динѣ, ѿ лѣ́та двадесѧ́тагѡ и҆ да́же до лѣ́та три́десѧть втора́гѡ а҆ртаѯе́рѯа царѧ̀, лѣ́тъ двана́десѧть, а҆́зъ и҆ бра́тїѧ моѧ҄ ѡ҆бро́кѹ и҆́хъ не ѩ҆до́хомъ.
15 И҆ ѡ҆бро́кѡвъ пе́рвыхъ, и҆́миже пре́жде менє̀ ѡ҆тѧгчи́ша и҆̀хъ, и҆ прїѧ́ша ѿ ни́хъ въ хлѣ́бѣ и҆ въ вїнѣ̀, по си́хъ сребра̀ (на всѧ́къ де́нь) дїдра́хмъ четы́редесѧть: и҆ слѹжє́бницы и҆́хъ ѡ҆блада́ша людьмѝ. А҆́зъ же не сотвори́хъ та́кѡ ра́ди стра́ха бж҃їѧ.
16 И҆ въ дѣ́лѣ стѣ́ны сїѧ҄ созида́хъ: и҆ села̀ не стѧжа́хъ, и҆ всѝ ѻ҆́троцы моѝ со́брани бѧ́хѹ та́мѡ на дѣ́ло.
17 Ї҆ѹдє́й же и҆ нача́лникѡвъ сто̀ пѧтьдесѧ́тъ мѹже́й, и҆ приходѧ́щїи къ на́мъ ѿ ѩ҆зы҄къ, и҆̀же ѡ҆́крестъ на́съ, при трапе́зѣ мое́й.
18 И҆ бѣ̀ ѹ҆гото́вано мнѣ̀ на всѧ́къ де́нь: теле́цъ є҆ди́нъ и҆ ѻ҆ве́цъ ше́сть и҆збра́нныхъ и҆ козе́лъ бы́ша мнѣ̀ (и҆ пти҄цы), и҆ междѹ̀ десѧтѝ дні́й всѣ҄мъ вїна̀ мно́гѡ: и҆ съ си́ми хлѣ́ба госпо́дствѹ моемѹ̀ не взыска́хъ, занѐ тѧжка̀ рабо́та на лю́дехъ си́хъ.
19 Помѧни́ мѧ, бж҃е мо́й, во бла́го по всѣ҄мъ, є҆ли҄ка сотвори́хъ лю́демъ си҄мъ. |
