1 И҆ сі́и кнѧ́зїе ѻ҆те́чествъ и҆́хъ вожде́ве, и҆̀же взыдо́ша со мно́ю въ ца́рство а҆ртаѯе́рѯа царѧ̀ вавѷлѡ́нска:
2 ѿ сынѡ́въ фїнее́совыхъ гирсѡ́нъ, ѿ сынѡ́въ ї҆ѳама́рихъ данїи́лъ, ѿ сынѡ́въ даві́довыхъ а҆ттѹ́съ,
3 ѿ сынѡ́въ сахані́иныхъ, ѿ сынѡ́въ форо́совыхъ заха́рїа, и҆ съ ни́мъ мѹже́й сто̀ пѧтьдесѧ́тъ,
4 ѿ сынѡ́въ фаа́ѳъ-мѡа́ва є҆лїана̀ сы́нъ сараі́евъ, и҆ съ ни́мъ двѣ́сти мѹже́й,
5 и҆ ѿ сынѡ́въ заѳои́совыхъ є҆хені́а сы́нъ а҆зїи́левъ, и҆ съ ни́мъ три́ста мѹже́й,
6 и҆ ѿ сынѡ́въ а҆ді́ныхъ ѻ҆ви́нъ сы́нъ ї҆ѡнаѳа́новъ, и҆ съ ни́мъ пѧтьдесѧ́тъ мѹже́й,
7 и҆ ѿ сынѡ́въ є҆да́млихъ и҆са́їа сы́нъ а҆ѳелі́инъ, и҆ съ ни́мъ се́дмьдесѧтъ мѹже́й,
8 и҆ ѿ сынѡ́въ сафаті́евыхъ завді́а сы́нъ мїхаи́ловъ, и҆ съ ни́мъ ѻ҆́смьдесѧтъ мѹже́й,
9 и҆ ѿ сынѡ́въ ї҆ѡа́влихъ а҆вді́а сы́нъ ї҆еїи́левъ и҆ съ ни́мъ двѣ́сти ѻ҆смьна́десѧть мѹже́й,
10 и҆ ѿ сынѡ́въ ваані́евыхъ селїмѹ́ѳъ сы́нъ ї҆ѡсефі́евъ, и҆ съ ни́мъ сто̀ шестьдесѧ́тъ мѹже́й,
11 и҆ ѿ сынѡ́въ ваві́евыхъ заха́рїа сы́нъ ваві́евъ, и҆ съ ни́мъ два́десѧть ѻ҆́смь мѹже́й,
12 и҆ ѿ сынѡ́въ а҆зга́довыхъ ї҆ѡна́нъ сы́нъ ї҆ката́новъ, и҆ съ ни́мъ сто̀ де́сѧть мѹже́й,
13 и҆ ѿ сынѡ́въ а҆дѡнїка́млихъ послѣ́днїи, и҆ сїѧ҄ и҆мена̀ и҆́хъ: є҆дїфала́ѳъ, ї҆еїи́лъ и҆ самаі́а, и҆ съ ни́мъ шестьдесѧ́тъ мѹже́й,
14 и҆ ѿ сынѡ́въ вагѹа́евыхъ ѹ҆ѳа́й и҆ завѹ́дъ, и҆ съ ни́ми се́дмьдесѧтъ мѹже́й.
15 Собра́хъ же и҆̀хъ къ рѣцѣ̀ текѹ́щей ко є҆ѵі́и, и҆ пребы́хомъ тѹ̀ трѝ дни҄: и҆ска́хъ же въ лю́дехъ и҆ во свѧще́нницѣхъ, и҆ ѿ сынѡ́въ леѵі́иныхъ не ѡ҆брѣто́хъ та́мѡ.
16 И҆ посла́хъ ко є҆леаза́рѹ, а҆рїи́лѹ, семеі́ю и҆ къ маѡна́нѹ, и҆ ї҆ері́вѹ и҆ є҆лнаѳа́мѹ, и҆ наѳа́нѹ и҆ заха́рїи и҆ месолла́мѹ, и҆ ко ї҆ѡарі́мѹ и҆ є҆лнаѳа́нѹ, премѹ́дрыхъ,
17 и҆ и҆зведо́хъ и҆̀хъ ко а҆да́ю нача́лникѹ на мѣ́стѣ ка́сфїа и҆ вложи́хъ во ѹ҆ста̀ и҆́хъ словеса̀ глаго́лати ко а҆да́ю и҆ бра́тїи є҆гѡ̀ а҆ѳїні́мѡмъ на мѣ́стѣ ка́сфїи, привестѝ на́мъ пою́щихъ въ до́мъ бг҃а на́шегѡ.
18 И҆ прїидо́ша къ на́мъ, поне́же рѹка̀ бг҃а на́шегѡ бѣ̀ бл҃га̀ на на́съ, мѹ́жъ сахѡ́нъ ѿ сынѡ́въ моолі́евыхъ сы́на леѵі́ина, сы́на ї҆и҃лева, и҆ сараві́а, и҆ сы́нове є҆гѡ̀ и҆ бра́тїѧ є҆гѡ̀ ѻ҆смьна́десѧть:
19 и҆ а҆севі́а, и҆ и҆са́їа ѿ сынѡ́въ мера́рїныхъ и҆ бра́тїѧ є҆гѡ̀ и҆ сы́нове є҆гѡ̀ два́десѧть:
20 и҆ ѿ наѳїні́мѡвъ, и҆̀хже дадѐ даві́дъ и҆ кнѧ́зїе ко слѹ́жбѣ леѵі́тѡмъ, наѳїні́мѡвъ двѣ́сти два́десѧть, всѝ собра́шасѧ по и҆менѡ́мъ.
21 И҆ проповѣ́дахъ та́мѡ по́стъ бли́з̾ рѣ́ки а҆ѹѝ, є҆́же смири́тисѧ пред̾ гд҇емъ бг҃омъ на́шимъ, проси́ти ѿ негѡ̀ пѹтѝ пра́вагѡ на́мъ и҆ ча́дѡмъ на́шымъ и҆ всемѹ̀ стѧжа́нїю на́шемѹ:
22 ѹ҆стыдѣ́хсѧ бо и҆спроси́ти ѿ царѧ̀ си́лы и҆ кѡ́нникъ защи́тити на́съ ѿ врага̀ на пѹтѝ, поне́же рѣ́хомъ царю̀ глаго́люще: рѹка̀ бг҃а на́шегѡ є҆́сть на всѣ́хъ и҆́щѹщихъ є҆го̀ во благо́е и҆ крѣ́пость є҆гѡ̀, ѩ҆́рость же є҆гѡ̀ на всѣ́хъ ѡ҆ставлѧ́ющихъ є҆го̀.
23 Пости́хомсѧ же и҆ моли́хомсѧ бг҃ѹ на́шемѹ ѡ҆ се́мъ, и҆ ѹ҆слы́ша на́съ.
24 И҆ ѿлѹчи́хъ ѿ кнѧзе́й свѧще́нническихъ двана́десѧть, сараі́ю, а҆саві́ю и҆ съ ни́ми ѿ бра́тїи и҆́хъ де́сѧть:
25 возвѣ́снхъ же и҆̀мъ сребро̀ и҆ зла́то и҆ сосѹ́ды нача́ткѡвъ до́мѹ бг҃а на́шегѡ, ѩ҆̀же вознесѐ ца́рь и҆ совѣ҄тницы є҆гѡ̀ и҆ кнѧ́зїе є҆гѡ̀, и҆ ве́сь ї҆и҃ль ѡ҆брѣта́ѧйсѧ,
26 и҆ да́хъ вѣ́сомъ въ рѹ́ки и҆́хъ сребра̀ тала́нтѡвъ ше́сть сѡ́тъ пѧтьдесѧ́тъ, и҆ сосѹ́дѡвъ сре́брѧныхъ сто̀, и҆ зла́та сто̀ тала҄нтъ,
27 и҆ ча́шъ златы́хъ два́десѧть, дра́хмъ ты́сѧщѹ, и҆ сосѹ́ды мѣ́ди свѣ́тлыѧ до́брыѧ разли҄чныѧ, драгоцѣ҄нныѧ ѩ҆́кѡ зла́то,
28 и҆ реко́хъ и҆̀мъ: вы̀ свѧ́ти гд҇ѹ бг҃ѹ, и҆ сосѹ́ди свѧ́ти и҆ сребро̀ и҆ зла́то, є҆́же во́лею вдано̀ є҆́сть гд҇ѹ бг҃ѹ ѻ҆тє́цъ на́шихъ:
29 бди́те и҆ стреги́те, до́ндеже вѣ́сомъ ѿдадитѐ пред̾ кнѧ҄зи свѧще́нникѡвъ и҆ леѵі́тѡвъ и҆ пред̾ кнѧ҄зи ѻ҆те́чествъ ї҆и҃левыхъ во ї҆ер҇ли́мѣ, во ски́нїихъ до́мѹ гд҇нѧ.
30 И҆ прїѧ́ша свѧще́нницы и҆ леѵі́ти вѣ́съ сребра̀ и҆ зла́та и҆ сосѹ́дѡвъ, да вознесѹ́тъ во ї҆ер҇ли́мъ въ до́мъ бг҃а на́шегѡ.
31 И҆ воздвиго́хомсѧ ѿ рѣ́ки а҆ѹѝ во вторыйна́десѧть де́нь мц҇а пе́рвагѡ, да и҆́демъ во ї҆ер҇ли́мъ: и҆ рѹка̀ бг҃а на́шегѡ бѣ̀ на на́съ и҆ и҆зба́ви на́съ ѿ рѹ́къ вра́жїихъ и҆ ра́тникѡвъ на пѹтѝ,
32 и҆ прїидо́хомъ во ї҆ер҇ли́мъ и҆ пребы́хомъ тѹ̀ трѝ дни҄.
33 И҆ бы́сть въ де́нь четве́ртый, ѿда́хомъ вѣ́сомъ сребро̀ и҆ зла́то и҆ сосѹ́ды въ домѹ̀ бг҃а на́шегѡ под̾ рѹ́кѹ марїмѡ́ѳа сы́на ѹ҆рі́и свѧще́нника, и҆ съ ни́мъ є҆леаза́ръ сы́нъ фїнее́совъ, и҆ съ ни́ми ї҆ѡзава́дъ сы́нъ ї҆исѹ́совъ и҆ нѡаді́а сы́нъ ванаі́евъ леѵі́ти,
34 по числѹ̀ и҆ вѣ́сѹ всѧ҄: и҆ напи́санъ бы́сть ве́сь вѣ́съ.
35 Во вре́мѧ то̀, и҆̀же прїидо́ша ѿ плѣне́нїѧ сы́нове преселе́нїѧ, принесо́ша всесожжє́нїѧ бг҃ѹ ї҆и҃левѹ, телцє́въ двана́десѧть за всего̀ ї҆и҃лѧ, ѻ҆внѡ́въ де́вѧтьдесѧтъ ше́сть, а҆́гнцєвъ се́дмьдесѧтъ се́дмь, козлѡ́въ за грѣхѝ двана́десѧть, всѧ҄ во всесожже́нїе гд҇ѹ.
36 И҆ да́ша повелѣ́нїе царе́во прави́телємъ ца҄рскимъ и҆ кнѧзє́мъ, и҆̀же за рѣко́ю: и҆ просла́виша люді́й и҆ до́мъ бж҃їй. |
