1 И҆ въ лѣ́то три́десѧть ѻ҆смо́е ца́рства а҆́сина, взы́де ваа́са ца́рь ї҆и҃левъ на ї҆ѹ́дѹ и҆ стѣна́ми ѹ҆крѣпѝ ра́мѹ, да не да́стъ вхо́да и҆ и҆схо́да а҆́сѣ царю̀ ї҆ѹ́динѹ.
2 И҆ взѧ̀ а҆́са сребро̀ и҆ зла́то ѿ сокро́вищъ до́мѹ гд҇нѧ и҆ до́мѹ царе́ва, и҆ посла̀ ко (венада́дѹ) сы́нѹ а҆де́ра царѧ̀ сѵ́рска, живѹ́щемѹ въ дама́сцѣ, глаго́лѧ:
3 положѝ завѣ́тъ междѹ̀ мно́ю и҆ тобо́ю и҆ междѹ̀ ѻ҆тце́мъ мои́мъ и҆ ѻ҆тце́мъ твои́мъ: сѐ посла́хъ тебѣ̀ сребро̀ и҆ зла́то: прїидѝ и҆ ѿженѝ ѿ менє̀ ваа́сѹ царѧ̀ ї҆и҃лева, и҆ да ѿи́детъ ѿ менє̀.
4 И҆ послѹ́ша сы́нъ а҆де́ровъ царѧ̀ а҆́сы и҆ посла̀ нача́лники во́євъ свои́хъ на гра́ды ї҆и҃лєвы, и҆ поразѝ а҆їнѡ́на и҆ да́на, и҆ а҆велмаі́на и҆ всѧ҄ ѡ҆крє́стнаѧ нефѳалї҄млѧ.
5 И҆ бы́сть є҆гда̀ ѹ҆слы́ша ваа́са ца́рь ї҆и҃левъ, ѡ҆ста́ви ктомѹ̀ созида́ти ра́мѹ и҆ ѡ҆ста́ви дѣ́ло своѐ.
6 А҆́са же ца́рь взѧ̀ всего̀ ї҆ѹ́дѹ и҆ взѧ̀ ка́менїе ѿ ра́мы и҆ лѣ́съ є҆ѧ̀, ѩ҆̀же на созда́нїе ѹ҆гото́ва ваа́са, и҆ созда̀ и҆з̾ ни́хъ гаваю̀ и҆ масфѹ̀.
7 И҆ во вре́мѧ ѻ҆́но прїи́де а҆на́нїй про҇ро́къ ко а҆́сѣ царю̀ ї҆ѹ́динѹ и҆ речѐ є҆мѹ̀: поне́же и҆мѣ́лъ є҆сѝ ѹ҆пова́нїе на царѧ̀ сѵ́рска, а҆ не ѹ҆пова́лъ є҆сѝ на гд҇а бг҃а твоего̀, тогѡ̀ ра́ди спасе́сѧ си́ла царѧ̀ сѵ́рскагѡ ѿ рѹкѹ̀ твоє́ю:
8 не є҆ѳїо́пи ли и҆ лївѵ́ане бѧ́хѹ на тѧ̀ въ си́лѣ мно́зѣ, въ де́рзости колесни́цъ и҆ кѡ́нникъ во мно́жество ѕѣлѡ̀; и҆ є҆гда̀ ѹ҆пова́лъ є҆сѝ на гд҇а, предадѐ и҆̀хъ въ рѹ́кѹ твою̀:
9 ѻ҆́чи бо гд҇ни назира́ютъ всю̀ зе́млю, є҆́же ѹ҆крѣпи́ти сѹ́щихъ се́рдцемъ соверше́ннымъ къ немѹ̀: бѹ́е сотвори́лъ є҆сѝ сїѐ, (сегѡ̀ ра́ди) ѿнн҃ѣ бѹ́детъ на тѧ̀ бра́нь.
10 Разгнѣ́васѧ же а҆́са на про҇ро́ка и҆ всадѝ є҆го̀ въ темни́цѹ, поне́же прогнѣ́васѧ ѡ҆ се́мъ: и҆ ѹ҆бѝ а҆́са ѿ люді́й во вре́мѧ то̀ (мно́гихъ).
11 И҆ сѐ, словеса̀ а҆́сы, пє́рваѧ и҆ послѣ҄днѧѧ, пи҄сана сѹ́ть въ кни́зѣ царе́й ї҆ѹ́диныхъ и҆ ї҆и҃лѧ.
12 И҆ разболѣ́сѧ а҆́са въ лѣ́то три́десѧть девѧ́тое ца́рства своегѡ̀ нога́ма, болѣ́знїю ѕѣ́лнѣйшею: и҆ нижѐ въ не́мощи свое́й взыска̀ гд҇а, но врачє́въ.
13 ѹ҆́спе же а҆́са со ѻ҆тцы҄ свои́ми, и҆ ѹ҆́мре въ лѣ́то четы́редесѧть пе́рвое ца́рства своегѡ̀:
14 и҆ погребо́ша є҆го̀ во гро́бѣ, є҆го́же и҆скопа̀ себѣ̀ во гра́дѣ даві́довѣ, и҆ положи́ша є҆го̀ на ѻ҆дрѣ̀, и҆ напо́лниша а҆рѡма́тами и҆ ро́дами мѵ́рѡвъ благоѹха́нныхъ, и҆ сотвори́ша є҆мѹ̀ погребе́нїе вели́ко ѕѣлѡ̀. |
