1 Цари́ца же са́вска ѹ҆слы́ша и҆́мѧ соломѡ́ново и҆ прїи́де и҆скѹси́ти є҆го̀ гада́ньми во ї҆ер҇ли́мѣ съ си́лою тѧ́жкою ѕѣлѡ̀: и҆ велблю́ды носѧ́щїи а҆рѡма́ты и҆ зла́та мно́жество и҆ ка́менїѧ драга́гѡ: и҆ прїи́де къ соломѡ́нѹ и҆ глаго́ла є҆мѹ̀ всѧ҄, є҆ли҄ка бѣ́ша въ се́рдцы є҆ѧ̀.
2 И҆ возвѣстѝ є҆́й соломѡ́нъ всѧ҄ словеса̀ є҆ѧ̀, и҆ не пре́йде сло́во, є҆гѡ́же бы не возвѣсти́лъ є҆́й.
3 И҆ ви́дѣ цари́ца са́вска премѹ́дрость соломѡ́ню, и҆ до́мъ є҆го́же созда̀,
4 И҆ ѩ҆́ди столѡ́въ є҆гѡ̀, и҆ сѣда҄лища рабѡ́въ є҆гѡ̀, и҆ состоѧ́нїе слѹже́бникѡвъ є҆гѡ̀ и҆ ри҄зы и҆́хъ, и҆ вїночє́рпчїѧ є҆гѡ̀ и҆ ѹ҆краше́нїе и҆́хъ, и҆ всесожжє́нїѧ, ѩ҆̀же жрѧ́ше въ домѹ̀ гд҇ни, и҆ внѣ̀ себє̀ бы́сть.
5 Рече́ же ко царю̀: и҆́стинно є҆́сть сло́во, є҆́же слы́шахъ въ землѝ мое́й ѡ҆ словесѣ́хъ твои́хъ и҆ ѡ҆ премѹ́дрости твое́й:
6 и҆ не вѣ́ровахъ словесе́мъ и҆́хъ, до́ндеже прїидо́хъ, и҆ ви́дѣста ѻ҆́чи моѝ, и҆ сѐ, не возвѣсти́ша мнѣ̀ полови́ны мно́жества премѹ́дрости твоеѧ̀: приложи́лъ є҆сѝ ко слы́шанїю ѩ҆̀же слы́шахъ:
7 блаже́ни мѹ́жїе твоѝ и҆ блаже́ни рабѝ твоѝ сі́и, и҆̀же предстоѧ́тъ пред̾ тобо́ю на всѧ́ко вре́мѧ и҆ слы́шатъ премѹ́дрость твою̀:
8 да бѹ́детъ гд҇ь бг҃ъ тво́й блг҇ве́нъ, и҆̀же бл҃говолѝ въ тебѣ̀, є҆́же да́ти тѧ̀ на престо́лъ сво́й царѧ̀ гд҇ѹ бг҃ѹ твоемѹ̀: занѐ возлюбѝ гд҇ь бг҃ъ тво́й ї҆и҃лѧ, є҆́же ѹ҆тверди́ти є҆го̀ во вѣ́къ, и҆ поста́ви тѧ̀ над̾ ни́ми царѧ̀, да сотвори́ши сѹ́дъ и҆ пра́вдѹ.
9 Даде́ же царю̀ сто̀ два́десѧть тала҄нтъ зла҄та и҆ а҆рѡма́ты мнѡ́ги ѕѣлѡ̀ и҆ ка́менїе драго́е, и҆ не бы́ша а҆рѡма́ты такѡвы́ ѩ҆́кѡ сїѧ҄, ѩ҆́же дадѐ цари́ца са́вска царю̀ соломѡ́нѹ.
10 Но и҆ рабѝ хїра́мѡвы съ рабы҄ соломѡ́ними приноша́хѹ зла́то соломѡ́нѹ драго́е.
11 И҆ сотворѝ соломѡ́нъ ца́рь ѿ дре́въ пе́ѵговыхъ степє́ни въ до́мъ гд҇ень и҆ въ до́мъ царе́въ, и҆ гѹ́сли и҆ ѱалти҄ри пѣ́сней, и҆ никогда́же ви҄дѣна бы́ша въ землѝ ї҆ѹ́динѣ пре́жде такѡа́ѧ.
12 Ца́рь же соломѡ́нъ дадѐ ца́рицѣ са́встѣй всѧ҄ по жела́нїю є҆ѧ̀, и҆́хже проси́ла, кромѣ̀ всѣ́хъ ѩ҆̀же принесѐ царю̀ соломѡ́нѹ, и҆ возврати́сѧ въ зе́млю свою̀.
13 Бѣ́ же вѣ́съ зла́та приноси́магѡ къ соломѡ́нѹ на всѧ́ко лѣ́то ше́сть сѡ́тъ шестьдесѧ́тъ ше́сть тала҄нтъ зла́та,
14 кромѣ̀ мѹже́й по́дданныхъ и҆ кѹпцѡ́въ, и҆̀же приноша́хѹ, и҆ всѣ́хъ царе́й а҆ра́вскихъ и҆ вла́стелей землѝ, и҆̀же всѝ приноша́хѹ зла́то и҆ сребро̀ царю̀ соломѡ́нѹ.
15 Сотворѝ ѹ҆́бѡ ца́рь соломѡ́нъ двѣ́сти щитѡ́въ златы́хъ тѧ́гненыхъ, ше́сть сѡ́тъ златни҄къ чи́стыхъ бѧ́хѹ во є҆ди́нѣмъ щитѣ̀:
16 и҆ три́ста щитѡ́въ златы́хъ тѧ́гненыхъ, по три́ста златни҄къ бѧ́ше во є҆ди́нѣмъ ко́емждо щитѣ̀, и҆ положѝ ѧ҆̀ ца́рь въ домѹ̀ дре́ва лїва́нова.
17 Сотвори́ же ца́рь престо́лъ ѿ слоно́выхъ зѹбѡ́въ вели́къ, и҆ позлатѝ є҆го̀ зла́томъ чи́стымъ,
18 и҆ ше́сть степе́нїй ѹ҆ престо́ла позлаще́ни зла́томъ, и҆ мы҄шчицы двѣ̀ тѹ́дѹ и҆ сю́дѹ над̾ престо́ломъ сѣда́лища, и҆ два̀ льва҄ стѡѧ́ща бли́з̾ мы́шчцей,
19 и҆ двана́десѧть львѡ́въ стоѧ́щихъ та́мѡ на шестѝ степе́нехъ ѿ ѻ҆бои́хъ стра́нъ: и҆ не бы́сть тако́въ престо́лъ во всѧ́цѣмъ ца́рствѣ.
20 Вси́ же сосѹ́ди царѧ̀ соломѡ́на бѧ́хѹ зла҄ты, и҆ всѝ сосѹ́ди до́мѹ дѹбра́вы лїва́нскїѧ зла́томъ ѡ҆крѹжє́ны, сребро́ бо во дне́хъ соломѡ́нихъ ни во что̀ вмѣнѧ́шесѧ:
21 занѐ кора́бль царе́въ хожда́ше въ ѳарсі́съ съ рабы҄ хїра́мовыми, є҆ди́ницею въ лѣ҄та трѝ прихожда́ше кора́бль ѿ ѳарсі́са ко царю̀, по́лнъ зла́та и҆ сребра̀ и҆ зѹбѡ́въ слоно́выхъ и҆ ѻ҆без̾ѧнъ.
22 И҆ возвели́чисѧ соломѡ́нъ па́че всѣ́хъ царе́й земны́хъ бога́тствомъ и҆ мѹ́дростїю.
23 Вси́ же ца́рїе зе́мстїи жела́хѹ ви́дѣти лицѐ соломѡ́не и҆ слы́шати премѹ́дрость є҆гѡ̀, ю҆́же дадѐ бг҃ъ въ се́рдце є҆гѡ̀:
24 и҆ приноша́хѹ є҆мѹ̀ кі́йждо да́ры своѧ҄, сосѹ́ды срє́брѧны и҆ зла҄ты, и҆ ѡ҆дѣѧ́нїѧ и҆ ста́ктѹ, и҆ сла́дѡсти, ко́ни и҆ мскѝ, на всѧ́кое лѣ́то.
25 И҆ бѧ́хѹ царю̀ соломѡ́нѹ четы́редесѧть ты́сѧщъ кобыли́цъ къ колєсни́цы и҆ двана́десѧть ты́сѧщъ кѡ́нникъ, и҆ поста́ви и҆̀хъ во градѣ́хъ колесни́чныхъ и҆ со царе́мъ во ї҆ер҇ли́мѣ.
26 И҆ бы́ть во́ждь всѣ́хъ царе́й ѿ рѣкѝ (є҆ѵфра́та) да́же до землѝ и҆ноплемє́нникъ и҆ да́же до предѣ҄лъ є҆гѵ́петскихъ.
27 И҆ дадѐ ца́рь зла́то и҆ сребро̀ во ї҆ер҇ли́мѣ ѩ҆́кѡ ка́менїе, и҆ ке́дры ѩ҆́кѡ черни́чїе, є҆́же (ражда́етсѧ) въ полѧ́хъ мно́жество.
28 И҆ приводѧ́хѹ ко́ни соломѡ́нѹ ѿ є҆гѵ́пта и҆ ѿ всеѧ̀ землѝ.
29 И҆ прѡ́чаѧ словеса̀ соломѡ҄нѧ пє́рваѧ и҆ послѣ҄днѧѧ, сѐ, сїѧ҄ пи҄сана сѹ́ть въ словесѣ́хъ наѳа́на про҇ро́ка и҆ въ словесѣ́хъ а҆хі́и силѡні́ты и҆ въ видѣ́нїихъ ї҆ѡи́лѧ ви́дѧщагѡ, проти́вѹ ї҆еровоа́ма сы́на нава́това.
30 И҆ ца́рствова соломѡ́нъ во ї҆ер҇ли́мѣ над̾ всѣ́мъ ї҆и҃лемъ четы́редесѧть лѣ́тъ.
31 И҆ ѹ҆́спе соломѡ́нъ со ѻ҆тцы҄ свои́ми, и҆ погребо́ша є҆го̀ во гра́дѣ даві́да ѻ҆тца̀ є҆гѡ̀. И҆ воцари́сѧ ровоа́мъ сы́нъ є҆гѡ̀ вмѣ́стѡ є҆гѡ̀. |
