1 И҆ бы́сть въ находѧ́щее лѣ́то во вре́мѧ и҆схожде́нїѧ царе́й (ко бра́ни), и҆ собра̀ ї҆ѡа́въ всю̀ си́лѹ во́инства, и҆ ѡ҆пѹстошѝ зе́млю сынѡ́въ а҆ммѡ́нихъ: прїидо́ша же и҆ ѡ҆бсѣдо́ша равва́ѳъ. Даві́дъ же пребыва́ше во ї҆ер҇ли́мѣ: ї҆ѡа́въ же поразѝ равва́ѳъ и҆ разорѝ є҆го̀.
2 Взѧ́ же даві́дъ вѣне́цъ молхо́ма царѧ̀ и҆́хъ ѿ главы̀ є҆гѡ̀, и҆ ѡ҆брѣ́тесѧ вѣ́съ въ не́мъ тала́нтъ зла́та, и҆ въ не́мъ ка́мень драгі́й, и҆ бѣ̀ на главѣ̀ даві́довѣ: плѣ́ны же гра҄дски взѧ̀ мнѡ́ги ѕѣлѡ̀,
3 и҆ люді́й сѹ́щихъ въ не́мъ и҆зведѐ и҆ претрѐ пила́ми и҆ ѻ҆рѹ҄дїи желѣ́зными и҆ разсѣца́ющими: та́кѡ сотворѝ даві́дъ всѣ҄мъ градѡ́мъ сынѡ́въ а҆ммѡ́нихъ, и҆ возврати́сѧ даві́дъ и҆ всѝ лю́дїе є҆гѡ̀ во ї҆ер҇ли́мъ.
4 И҆ бы́сть по се́мъ, и҆ нача́сѧ є҆щѐ бра́нь въ газе́рѣ со и҆ноплемє́нники: тогда̀ поразѝ совоха́й ѹ҆саѳі́тѧнинъ сафѹ́та ѿ сынѡ́въ и҆споли́новыхъ и҆ смирѝ є҆го̀.
5 И҆ бы́сть є҆щѐ бра́нь проти́вѹ и҆ноплемє́нникъ, и҆ поразѝ є҆леана́нъ сы́нъ ї҆аі́ровъ лаѡмі́а, бра́та голїа́ѳа геѳе́йскагѡ, є҆мѹ́же дре́во копїѧ̀ є҆гѡ̀ ѩ҆́кѡ наво́й ткѹ́щихъ.
6 И҆ бы́сть є҆щѐ бра́нь въ ге́ѳѣ, и҆ бѣ̀ мѹ́жъ ѕѣлѡ̀ вели́къ, по шестѝ и҆мѣ́ющь пе́рстѡвъ, всѣ́хъ два́десѧть четы́ре, и҆ се́й бѣ̀ ѿ колѣ́на и҆споли́нѡвъ,
7 и҆ поносѝ ї҆и҃лѧ: и҆ поразѝ є҆го̀ ї҆ѡнаѳа́нъ сы́нъ самма́а бра́та даві́дова.
8 Сі́и роди́шасѧ рафа́ю въ ге́ѳѣ, всѣ́хъ и҆́хъ бѣ̀ четы́ри и҆споли́ны, и҆ падо́ша рѹко́ю даві́довою и҆ рѹко́ю рабѡ́въ є҆гѡ̀. |
