1 И҆ сі́и сы́нове ї҆ссаха́рѡвы: ѳѡла̀ и҆ фѹа̀, и҆ ѩ҆сѹ́въ и҆ сомвра́мъ, четы́ре.
2 Сы́нове же ѳѡлы̀: ѻ҆зі́й и҆ рафеа̀, и҆ ї҆ерїи́лъ и҆ а҆ми́нъ, и҆ ї҆афѳа́мъ и҆ самѹи́лъ, кнѧ҄зи по домѡ́мъ ѻ҆те́чествъ и҆́хъ, и҆̀же ѿ колѣ́на ѳѡли́на, крѣ́пцы си́лою по родѡ́мъ и҆́хъ, и҆́хже число̀ во дни҄ даві́дѡвы два́десѧть и҆ двѣ̀ ты́сѧщы и҆ ше́сть сѡ́тъ.
3 Сы́нове же ѻ҆зї҄ины ї҆езрі́й, и҆ сы́нове ї҆езрї҄ины мїхаи́лъ и҆ а҆вді́а, и҆ ї҆ѡи́ль и҆ ї҆есі́а, пѧ́ть всѣ́хъ кнѧзе́й.
4 И҆ съ ни́ми по родѡ́мъ и҆́хъ, по домѡ́мъ ѻ҆те́чествъ и҆́хъ, препоѧ́сани и҆ си́льни ко ѡ҆полче́нїю на бра́нь, три́десѧть и҆ ше́сть ты́сѧщъ: мно́гѡ бо и҆мѣ́ша же́нъ и҆ сынѡ́въ.
5 Бра́тїѧ же и҆́хъ во всѣ́хъ племенѣ́хъ ї҆ссаха́ровыхъ крѣ́пцы си́лою, ѻ҆́смьдесѧтъ и҆ се́дмь ты́сѧщъ сочте́нїе всѣ́хъ и҆́хъ.
6 Сы́нове же венїамі́нѡвы: вала́й и҆ ховѡ́ръ и҆ ї҆едїи́лъ, трѝ.
7 Сы́нове же влла́євы: є҆севѡ́нъ и҆ ѻ҆зі́а, и҆ ѻ҆зїи́лъ и҆ ї҆ерїмѹ́ѳъ и҆ ѹ҆рі́а, пѧ́ть кнѧзе́й домѡ́въ ѻ҆те́чествъ и҆́хъ, крѣ́пцы си́лою, и҆ число̀ и҆́хъ два́десѧть и҆ двѣ̀ ты́сѧщы и҆ три́десѧть четы́ре.
8 Сы́нове же ховѡ́рѡвы: замїрі́а и҆ ї҆ѡа́въ, и҆ є҆лїе́зеръ и҆ є҆лїа́на, и҆ а҆марі́а и҆ ї҆ерїмѹ́ѳъ и҆ а҆ві́а и҆ а҆наѳѡ́ѳъ и҆ є҆лмеѳе́мъ: всѝ сі́и сы́нове ховѡ́рѡвы.
9 Сочте́нїе же и҆́хъ по родѡ́мъ и҆́хъ, кнѧ҄зи домѡ́въ ѻ҆те́чествъ и҆́хъ, крѣ́пцы си́лою, два́десѧть ты́сѧщъ и҆ двѣ́сти.
10 Сы́нове же ї҆едїи́лєвы валаа́мъ, и҆ сы́нове валаа́мѡвы ї҆еѡ́съ и҆ венїамі́нъ, и҆ а҆ѡ́ѳъ и҆ а҆ханаа́нъ, и҆ зиѳа́нъ и҆ ѳарсі́съ и҆ а҆саи́ръ:
11 всѝ сі́и сы́нове ї҆едїи́лєвы, кнѧ҄зи племе́нъ крѣпча́йшїи си́лою, седмьна́десѧть ты́сѧщъ и҆ двѣ́сти ко ѡ҆полче́нїю съ си́лою и҆сходѧ́щїи.
12 И҆ сафа́нъ и҆ и҆фа́нъ, сы́нове ї҆ерїмѹ́ѳовы, є҆сѹ́дъ сы́нъ є҆гѡ̀,
13 нефѳалі́мъ сы́нъ є҆гѡ̀, и҆ є҆сїи́лъ и҆ гѡѵ́нї, и҆ ї҆есе́ръ и҆ селлі́мъ, сы́нове є҆гѡ̀, валаа́мъ сы́нъ є҆гѡ̀.
14 Сы́нове манассі́и: є҆зрїи́лъ, є҆го́же родѝ нало́жница є҆гѡ̀ сѵ́ра, роди́ же є҆мѹ̀ и҆ махі́ра ѻ҆тца̀ галаа́дова.
15 Махі́ръ же поѧ́тъ женѹ̀ ѻ҆фі́рови и҆ сафі́нови, и҆ и҆́мѧ сестрѣ̀ є҆гѡ̀ моѡха̀, и҆́мѧ же второ́мѹ салпаа́дъ. Роди́шажесѧ салпаа́дѹ дщє́ри.
16 И҆ родѝ моѡха̀ жена̀ махі́рова сы́на и҆ наречѐ и҆́мѧ є҆гѡ̀ фаре́съ: и҆ и҆́мѧ бра́тѹ є҆гѡ̀ сороѡ́ръ: и҆ сы́нове є҆гѡ̀ ѹ҆ла́мъ и҆ рака́мъ.
17 Сы́нове же ѹ҆ла́мѡвы валаа́мъ: сі́и сы́нове галаа́да сы́на махі́рова сы́на манассі́ева.
18 Сестра́ же є҆гѡ̀ малехе́ѳъ родѝ ї҆есѹ́да и҆ а҆вїезе́ра и҆ маа́лѹ.
19 Бѣ́хѹ же сы́нове семі́ра: а҆і́мъ и҆ сѷхе́мъ, и҆ докїи́мъ и҆ є҆нїа́мъ.
20 Сы́нове же є҆фрє́мли ѳѹсала́мъ, и҆ раа́мъ сы́нъ є҆гѡ̀, и҆ ѳаа́мъ сы́нъ є҆гѡ̀, и҆ є҆лаа́дъ сы́нъ є҆гѡ̀, и҆ ѳаа̀ сы́нъ є҆гѡ̀,
21 и҆ зава́дъ сы́нъ є҆гѡ̀, и҆ сѡѳе́ла сы́нъ є҆гѡ̀, и҆ є҆зе́ръ и҆ є҆зла́да. Ѹ҆би́ша же и҆̀хъ мѹ́жїе ге́ѳстїи, и҆̀же роди́шасѧ въ землѝ то́й: занѐ и҆зыдо́ша взѧ́ти скоты̀ и҆́хъ.
22 И҆ пла́касѧ є҆фре́мъ ѻ҆те́цъ и҆́хъ мнѡ́ги дни҄: и҆ прїидо́ша бра́тїѧ є҆гѡ̀, да ѹ҆тѣ́шатъ є҆го̀.
23 И҆ вни́де къ женѣ̀ свое́й: и҆ зача̀ во чре́вѣ, и҆ родѝ сы́на, и҆ наречѐ и҆́мѧ є҆гѡ̀ варїа̀, ѩ҆́кѡ въ ѕлы́хъ до́мѹ є҆гѡ̀ рожде́нъ є҆́сть.
24 Дщи́ же є҆гѡ̀ сараа̀, и҆ бо ѻ҆́ныхъ ѡ҆ста́вшихсѧ: и҆ созда̀ веѳѡрѡ́нъ ни́жнїй и҆ вы́шнїй и҆ са́дрѹ.
25 Рафа́й же сы́нъ є҆гѡ̀, и҆ расе́фъ и҆ ѳала́й сы́нове є҆гѡ̀, и҆ ѳаа́нъ сы́нъ є҆гѡ̀,
26 и҆ лада́нъ сы́нъ є҆гѡ̀, и҆ а҆мїѹ́дъ сы́нъ є҆гѡ̀, є҆лїсама̀ сы́нъ є҆гѡ̀,
27 рѹ́нъ сы́нъ є҆гѡ̀, ї҆ѡсі́й сы́нъ є҆гѡ̀.
28 И҆ ѡ҆держа́нїе и҆́хъ и҆ ѡ҆бита́нїе и҆́хъ веѳи́ль и҆ вє́си є҆гѡ̀ проти́вѹ восто́ка наара́нѧ, и҆ къ за́паднѣй странѣ̀ газе́ра и҆ вє́си є҆гѡ̀, и҆ сѷхе́мъ и҆ вє́си є҆гѡ̀ да́же до га́зы и҆ вє́си є҆ѧ̀,
29 и҆ да́же до предѣ҄лъ сынѡ́въ манассі́иныхъ, веѳса́нъ и҆ вє́си є҆гѡ̀, ѳанаа́хъ и҆ вє́си є҆гѡ̀, и҆ магеддѡ́нъ и҆ вє́си є҆гѡ̀, дѡ́ръ и҆ вє́си є҆гѡ̀: въ тѣ́хъ всели́шасѧ сы́нове ї҆ѡ́сифа сы́на ї҆и҃лева.
30 Сы́нове а҆си́рѡвы: ї҆амна̀ и҆ є҆сѹ́дъ, и҆ ї҆есѹ́е и҆ варїа̀, и҆ сарре́а сестра̀ и҆́хъ.
31 Сы́нове же варі́євы хове́ръ и҆ мелхїи́лъ: се́й ѻ҆те́цъ заве́ѳовъ.
32 И҆ хове́ръ родѝ ї҆афле́та и҆ сѡми́ра, и҆ хѡѳа́на и҆ сѹлѹ̀ сестрѹ̀ и҆́хъ.
33 И҆ сы́нове ї҆афле́тѡвы: фасе́хъ и҆ а҆мамаа́ѳъ и҆ а҆соа́ѳъ: сі́и сы́нове ї҆афле́тѡвы.
34 Сы́нове же сѡми́рѡвы: ї҆хїѹ́ръ, раѵго́а и҆ ї҆ава̀ и҆ а҆ра́мъ.
35 Сы́нове же а҆сѹ́да бра́та є҆гѡ̀: сѡфа̀ и҆ ї҆амна̀, и҆ є҆ли́мъ и҆ а҆ла́мъ.
36 Сы́нове сѡ́фѡвы: сѹѐ, а҆рїафе́ръ и҆ сѹа́нъ, и҆ ворі́нъ и҆ ї҆мра́мъ,
37 и҆ васа́ръ и҆ ї҆ѹ́дъ, и҆ са́мма и҆ селимва́нъ, и҆ ї҆еѳра́нъ и҆ веера̀.
38 Сы́нове же ї҆еѳе́рѡвы: ї҆еѳѡ́нъ и҆ фасфа̀ и҆ а҆ре́й.
39 Сы́нове же ѡ҆ла҄ни: ѻ҆ре́хъ и҆ а҆нїи́лъ и҆ расі́а.
40 Всѝ сі́и сы́нове а҆си́рѡвы, всѝ кнѧ҄зи домѡ́въ ѻ҆те́чества и҆збра́ннїи и҆ крѣ́пцы си́лою, кнѧ҄зи, воевѡ́ды: сочте́нїе и҆́хъ во вре́мѧ бра́ни на ѡ҆полче́нїе два́десѧть ше́сть ты́сѧщъ мѹже́й. |
