1 Եւ Եղիսէն խօսեց այն կնկայ հետ որի որդիին ողջացրել էր, թէ Վեր կաց եւ գնա եւ քո տունը եւ պանդուխտ եղիր ուր որ կարող ես. Որովհետեւ Տէրը կանչել է սովը, եւ նա էլ գալու է այս երկիրը եօթը տարի։
2 Եւ վեր կացաւ այն կինը եւ արաւ Աստուծոյ մարդի խօսքին պէս, եւ գնաց նա եւ իր տունը եւ պանդուխտ եղաւ Փղշտացիների երկրումը եօթը տարի։
3 Եւ եօթը տարի անցնելուց յետոյ այն կինը ետ դառաւ Փղշտացիների երկրիցը եւ գնաց իր տան եւ իր արտի համար թագաւորին բողոքելու։
4 Եւ թագաւորը խօսում էր Աստուծոյ մարդի ծառայ Գէեզիի հետ ասելով. Ինձ պատմիր այն ամեն մեծամեծ բաները որ Եղիսէն արել է.
5 Եւ երբոր նա թագաւորին պատմում էր, թէ ինչպէս ողջացրեց մեռելին, ահա այն կինը որի որդիին ողջացրել էր, բողոքում էր թագաւորին իր տան եւ իր արտի համար. Եւ Գէեզին ասեց. Ով իմ տէր թագաւոր, սա այն կինն է եւ սա նորա որդին է, որին ողջացրեց Եղիսէն։
6 Եւ թագաւորը հարցրեց այն կնկան, նա էլ պատմեց նորան. Եւ թագաւորը նորան մի ներքինի տուաւ ասելով. Ետ դարձրու դորա բոլոր ստացուածքը եւ արտի բոլոր արդիւնքը նորա այս երկիրը թողած օրիցը մինչեւ հիմա։
7 Եւ Եղիսէն գնաց Դամասկոս. Եւ Ասորիների Բենադադ թագաւորը հիւանդ էր եւ նորան իմացրին, թէ Աստուծոյ մարդը եկել է մինչեւ այստեղ։
8 Եւ թագաւորն ասեց Ազայէլին. Ձեռքդ ընծայ առ եւ գնա Աստուծոյ մարդին դիմաւորելու, եւ նորանով հարցրու Եհովային ասելով թէ Արդեօք պիտի առողջանա՞մ այս հիւանդութիւնից։
9 Եւ Ազայէլը գնաց, նորան դիմաւորեց, եւ իր ձեռքը ընծայ առաւ, եւ Դամասկոսի բոլոր բարիքներիցը քառասուն ուղտի բեռ, եւ եկաւ ու կանգնեց նորա առաջին եւ ասեց. Քո որդին Ասորիների Բենադադ թագաւորը՝ ինձ քեզ մօտ ուղարկեց ասելով թէ Արդեօք պիտի առողջանա՞մ այս հիւանդութիւնից։
10 Եւ Եղիսէն ասեց նորան. Գնա ասիր նորան թէ առողջանալու ես. Բայց Տէրը ինձ ցոյց տուաւ որ նա պիտի մեռնէ։
11 Եւ նա երեսը դարձրեց նորան ու կանգնեց շատ երկար, եւ Աստուծոյ մարդը լաց եղաւ։
12 Եւ Ազայէլն ասեց. Ի՞նչու համար է իմ տէրը լաց լինում. Նա էլ ասեց. Որովհետեւ գիտեմ թէ դու ինչ չարիք պիտի անես Իսրայէլի որդկանցը, նորանց բերդերը կրակով պիտի այրես, եւ նորանց տղամարդներին սրով պիտի սպանես, եւ նորանց մանուկներին քարովը պիտի տաս, եւ նորանց յղիներին պիտի ճղես։
13 Եւ Ազայէլն ասեց. Ի՞նչ է քո ծառան՝ այս շունը, որ այս մեծ բանն անէ. Բայց Եղիսէն ասեց նորան. Տէրը քեզ ցոյց տուաւ ինձ իբրեւ Ասորիների վերայ թագաւոր։
14 Եւ նա գնաց Եղիսէի մօտիցը եւ եկաւ իր տիրոջ մօտ, եւ նա ասեց նորան. Եղիսէն քեզ ի՞նչ է ասել. Եւ նա ասեց. Ասել է թէ առողջանալու ես։
15 Եւ հետեւեալ օրը առաւ վերմակը եւ կոխեց ջուրը, եւ ձգեց նորա երեսի վերայ եւ նա մեռաւ. Եւ Ազայէլը թագաւոր եղաւ նորա տեղը։
16 Եւ Իսրայէլի թագաւոր Աքաաբեան Յովրամի հինգերորդ տարիումը - դեռ որ Յովսափատ Յուդայի վերայ թագաւորում էր - Յուդայի թագաւոր Յովսափատի որդի Յովրամը թագաւորեց։
17 Երեսունեւերկու տարեկան էր երբոր թագաւոր եղաւ, եւ ութ տարի թագաւորեց Երուսաղէմում։
18 Եւ գնաց Իսրայէլի թագաւորների ճանապարհովը, ինչպէս որ արել էր Աքաաբի տունը. Որովհետեւ Աքաաբի աղջիկը նորա կինն էր, եւ նա աչրութիւն արաւ Տիրոջ աչքի առաջին։
19 Եւ Տէրը չուզեց ջնջել Յուդային իր Դաւիթ ծառայի համար, ինչպէս որ ասել էր նորան թէ մի ճրագ պիտի տայ նորան նորա որդկանցում ամեն ժամանակ։
20 Նորա օրերում ապստամբուեց Եդովմը Յուդայից, եւ իրանց վերայ մի թագաւոր դրին։
21 Եւ Յովրամն անցաւ Սայիր եւ բոլոր կառքերն իր հետը։ Եւ եղաւ որ նա գիշերը վեր կացաւ եւ ջարդեց Եդովմացիներին, որ իրան պաշարել էին, եւ կառքերի իշխաններին, եւ ժողովուրդը փախաւ իր վրանները։
22 Բայց Եդովմն ապստամբ մնաց Յուդային մինչեւ այսօր։ Այն ժամանակ Լեբնան էլ ապստամբուեց։
23 Եւ Յովրամի գործերի մնացորդը եւ նորա բոլոր արածը, ահա նորանք գրուած են Յուդայի թագաւորների յիշատակաց գրքումը։
24 Եւ Յովրամը ննջեց իր հայրերի հետ եւ թաղուեցաւ իր հայրերի հետ Դաւիթի քաղաքումը, եւ նորա որդի Ոքոզիան թագաւոր եղաւ նորա տեղը։
25 Իսրայէլի թագաւոր Աքաաբեան Յովրամի տասնեւերկուերորդ տարիումը թագաւոր եղաւ Յուդայի վերայ Յովրամի որդի Ոքոզիան։
26 Քսանեւերկու տարեկան էր Ոքոզիան երբոր թագաւոր եղաւ եւ մէկ տարի թագաւորեց Երուսաղէմումը, եւ նորա մօր անունն էր Գոթողիա՝ Իսրայէլի Ամրի թագաւորի դուստրը։
27 Եւ նա գնաց Աքաաբի տան ճանապարհովը եւ չարութիւն արաւ Տիրոջ աչքի առաջին Աքաաբի տան պէս. Որովհետեւ Աքաաբի տան փեսան էր։
28 Եւ Աքաաբեան Յովրամի հետ գնաց Ռմովթ-գաղաադ Ասորիների թագաւոր Ազայէլի հետ պատերազմելու. Բայց Ասորիները վիրաւորեցին Յովրամին։
29 Եւ Յովրամ թագաւորը ետ դառաւ որ Յեզրայէլումը բժշկուի այն վէրքերիցը, որ Ասորիները տուել էին նորան Ռամովթի մէջ Ասորիների Ազայէլ թագաւորի հետ պատերազմ անելու ժամանակ։ Եւ Յուդայի թագաւոր Յովրամեան Ոքոզիան իջաւ Յեզրայէլ Աքաաբեան Յովրամին տեսնելու, որովհետեւ հիւանդ էր։ |
