1 Եւ Սաբայի թագուհին Սողոմոնի համբաւը Տիրոջ անունի մասին լսելով, եկաւ որ նորան խրթին հարցմունքներով փորձէ։
2 Եւ եկաւ Երուսաղէմ շատ մեծ փառքով՝ խունկեր եւ խիստ շատ ոսկի եւ պատուական քարեր բեռնած ուղտերով, եւ գնաց Սողոմոնի մօտ եւ խօսեց նորա հետ իր սրտումը եղած բոլոր բաները։
Queen of Sheba Visits Solomon 3 Եւ Սողոմոնը մեկնեց նորա համար նորա ամեն խօսքերը. Թագաւորի համար մէկ գաղտնի բան չկար, որ նա չմեկնէր նորան։
4 Եւ Սաբայի թագուհին տեսաւ Սողոմոնի բոլոր իմաստութիւնը եւ նորա շինած տունը.
5 Նորա սեղանի կերակուրը, եւ նորա ծառաների նստելը եւ նորա սպասաւորների վեր կենալը, եւ նորանց հագուստները եւ նորա մատռուակները եւ նորա այն սանդուխքը, որով վեր էր գնում Տիրոջ տունը. Եւ էլ ուշ չմնաց նորանում։
6 Եւ ասեց թագաւորին. Ճշմարիտ է եղել այն խօսքը, որ լսել եմ իմ երկրումը քո խօսքերի եւ քո իմաստութեան համար։
7 Եւ ես չէի հաւատում այն խօսքերին մինչեւ որ եկայ եւ իմ աչքերը տեսան, եւ ահա ինձ կէսը չեն պատմել. Դու իմ լսած համբաւիցը աւելի իմաստութիւն եւ բարիք ունես։
8 Երանի քո այս մարդկանցը, քո այս ծառաներին, որ միշտ քո առաջին կանգնած են, եւ լսում են քո իմաստութիւնը։
9 Քո Եհովայ Աստուածը օրհնեալ լինի, որ քեզ հաւանեց՝ քեզ Իսրայէլի աթոռի վերայ դնելու. Եհովան Իսրայէլին յաւիտեան սիրելով քեզ թագաւոր է դրել որ իրաւունք եւ արդարութիւն անես։
10 Եւ թագաւորին հարիւր քսան տաղանդ ոսկի եւ խիստ շատ խունկ եւ պատուական քարեր տուաւ. Այնչափ շատ խունկ՝ որչափ որ Սաբայի թագուհին տուաւ Սողոմոնին, այլ եւս չեկաւ։
11 Եւ Քիրամի նաւերը որ Ոփիրից ոսկի էին բերում, Ոփիրից խիստ շատ ալմուգ փայտեր էլ բերին, եւ պատուական քարեր էլ։
12 Եւ թագաւորը ալմուգ փայտերիցը յենարաններ շինեց Տիրոջ տան համար եւ թագաւորի տան համար, եւ քնարներ ու տաւիղներ երգեցողների համար. Այսպիսի ալմուգ փայտեր էլ չեկան եւ չտեսնուեցաւ մինչեւ այսօր։
13 Եւ Սողոմոն թագաւորը Սաբայի թագուհիին տուաւ բոլոր նորա փափաքածը որ ուզեց, բացի այն որ Սողոմոն թագաւորն ինքն իր ձեռքովը տուաւ. Եւ նա ետ դառաւ գնաց իր երկիրը ինքը եւ իր ծառաները։
14 Եւ մէկ տարուայ միջոցին Սողոմոնի համար եկած ոսկիի կշիռն էր վեց հարիւր վաթսունեւվեց տաղանդ ոսկի,
15 Բացի վաճառականներից եւ առուտուրականներից եւ Արաբիայի թագաւորներից եւ երկրի նախարարներից եկածիցը։
16 Եւ Սողոմոն թագաւորը երկու հարիւր վահան շինեց կռածոյ ոսկիից. Վեց հարիւր սիկղ ոսկի գնաց իւրաքանչիւր վահանի համար։
17 Եւ երեք հարիւր ասպար կռածոյ ոսկիից. իւրաքանչիւր ասպարին երեք ման ոսկի գնաց. Եւ թագաւորը դորանց դրաւ Լիբանանի անտառի տանը։
18 Եւ թագաւորը մի փղոսկրեայ մեծ աթոռ շինեց եւ մաքուր ոսկիով պատեց նորան։
19 Աթոռը վեց աստիճան ունէր, եւ աթոռի գլուխը բոլորակ էր ետեւիցը. Եւ նստելու տեղը այս կողմից եւ այն կողմից յենարաններ ունէր. Եւ երկու առիւծներ կային այդ յենարանների մօտը։
20 Եւ տասնեւերկու առիւծներ էին կանգնած այն վեց աստիճանների վերայ այս կողմից եւ այն կողմից. Այսպիսի բան չէր շինուած ոչ մի թագաւորութիւնում։
21 Եւ Սողոմոն թագաւորի բոլոր խմելիքի անօթները ոսկի էին, եւ Լիբանանի անտառի տան բոլոր անօթները մաքուր ոսկիից էին, արծաթից չէին. Սողոմոնի օրերումը նա մի բան չէր համարվում։
22 Որովհետեւ թագաւորը Թարսիսի նաւեր ունէր ծովումը Քիրամի նաւեր հետ. Երեք տարին մէկ անգամ գալիս էին Թարսիսի նաւերը բեռնած ոսկիով եւ արծաթով, փղոսկրով եւ կապիկներով ու սիրամարգներով։
23 Եւ մեծացաւ Սողոմոն թագաւորը երկրի բոլոր թագաւորներից հարստութիւնով եւ իմաստութիւնով։
24 Եւ բոլոր երկիրը փափաքում էր Սողոմոնի երեսին, որ լսէ նորա այն իմաստութիւնը, որ Աստուած տուել էր նորա սրտին։
25 Եւ նորանց ամեն մէկը բերում էր իր ընծան՝ արծաթի անօթներ եւ ոսկի անօթներ, հանդերձներ, զէնքեր, խնկեղէններ, ձիեր եւ ջորիներ տարուց տարի։
26 Եւ Սողոմոնը կառքեր եւ ձիաւորներ ժողովեց եւ ունէր հազար չորս հարիւր կառք եւ տասնեւերկու հազար ձիաւոր. Եւ նորանց տեղաւորեց կառքերի քաղաքներումը եւ Երուսաղէմ՝ թագաւորի մօտ։
27 Եւ թագաւորը արծաթը Երուսաղէմում քարի նման հասարակ բան շինեց, եւ եղեւնափայտը դաշտի մոլաթզենիների պէս շատ արաւ։
28 Եւ Սողոմոնի համար ձիերը բերում էին Եգիպտոսից, եւ թագաւորի վաճառականների կարաւանը ձիերը երամակով էին ծախու առնում։
29 Եւ Եգիպտոսից մի կառքը վեր էր գալիս եւ դուրս ելնում վեց հարիւր արծաթով, իսկ ձին՝ հարիւր յիսունով. Եւ այսպէս հանում էին բոլոր Քետացիների թագաւորների եւ Ասորիների թագաւորների համար նորանց ձեռքովը։ |
;)