1 И҆ собра́шасѧ мѹ́жїе є҆фрє́мли и҆ прїидо́ша въ сефі́нѹ, и҆ рѣ́ша ї҆ефѳа́ю: почто̀ ходи́лъ є҆сѝ ѡ҆полчи́тисѧ на сы́ны а҆ммѡ҄ни, и҆ на́съ не позва́лъ є҆сѝ и҆тѝ съ тобо́ю; до́мъ тво́й съ тобо́ю сожже́мъ ѻ҆гне́мъ.
2 И҆ речѐ къ ни҄мъ ї҆ефѳа́й: и҆мѣ́хъ прю̀ а҆́зъ и҆ лю́дїе моѝ, и҆ сы́нове а҆ммѡ҄ни ѡ҆скорби́ша менѐ ѕѣлѡ̀: и҆ воззва́хъ ва́съ, и҆ не и҆зба́висте менѐ ѿ рѹкѝ и҆́хъ:
3 и҆ ви́дѣхъ, ѩ҆́кѡ не бѧ́ше спаса́ющагѡ, и҆ положи́хъ дѹ́шѹ мою̀ въ рѹ́кѹ мою̀, и҆ прїидо́хъ къ сынѡ́мъ а҆ммѡ҄нимъ, и҆ предадѐ ѧ҆̀ гд҇ь въ рѹ́кѹ мою̀: и҆ вскѹ́ю прїидо́сте ко мнѣ̀ дне́сь, ѡ҆полчи́ти ли сѧ на мѧ̀;
4 И҆ собра̀ ї҆ефѳа́й всѧ҄ мѹ́жы галаа҄дски и҆ ѡ҆полчи́сѧ на є҆фре́ма: и҆ и҆зби́ша мѹ́жїе галаа́дстїи є҆фре́ма, поне́же глаго́лахѹ: ѹ҆цѣлѣ́вшїи ѿ є҆фре́ма, вы̀ галаа́дъ средѣ̀ є҆фре́ма и҆ средѣ̀ манассі́и.
5 И҆ засѧ́де галаа́дъ прохо́ды ѹ҆ ї҆ѻрда́на є҆фре́мѡвы. И҆ бы́сть є҆гда̀ рѣ́ша ѹ҆цѣлѣ́вшїи ѿ є҆фре́ма: пре́йдемъ: и҆ реко́ша и҆̀мъ мѹ́жїе галаа́дстїи: є҆да́ ли ѿ є҆фре́ма вы̀; И҆ рѣ́ша: нѣ́смы.
6 И҆ рѣ́ша и҆̀мъ: рцы́те, кла́съ. И҆ не ѹ҆пра́виша рещѝ та́кѡ: и҆ и҆ма́хѹ и҆̀хъ, и҆ закала́хѹ ѹ҆ прехо́дѡвъ ї҆ѻрда́нихъ: и҆ падо́ша въ то̀ вре́мѧ ѿ є҆фре́ма четы́редесѧть и҆ двѣ̀ ты́сѧщы.
7 И҆ сѹдѝ ї҆ефѳа́й ї҆и҃леви лѣ́тъ ше́сть: и҆ ѹ҆́мре ї҆ефѳа́й галааді́тинъ, и҆ погребе́нъ бы́сть во гра́дѣ свое́мъ въ галаа́дѣ.
8 И҆ сѹдѝ по не́мъ ї҆и҃леви є҆севѡ́нъ ѿ виѳлее́ма:
9 и҆ бы́ша є҆мѹ̀ три́десѧть сы́ны и҆ три́десѧть дщє́ри, ѩ҆̀же ѿдадѐ во́нъ (мѹжє́мъ), и҆ три́десѧть же́нъ приведѐ сынѡ́мъ свои҄мъ ѿвнѣ̀: и҆ сѹдѝ ї҆и҃леви се́дмь лѣ́тъ:
10 и҆ ѹ҆́мре є҆севѡ́нъ, и҆ погребе́нъ бы́сть въ виѳлее́мѣ.
11 И҆ сѹдѝ по не́мъ ї҆и҃леви є҆лѡ́нъ завѹлѡ́нѧнинъ де́сѧть лѣ́тъ:
12 и҆ ѹ҆́мре є҆лѡ́нъ завѹлѡ́нѧнинъ, и҆ погребе́нъ бы́сть во є҆лі́мѣ въ землѝ завѹлѡ́ни.
13 И҆ сѹдѝ по не́мъ ї҆и҃леви а҆вдѡ́нъ сы́нъ є҆лли́ховъ фараѳѡні́тинъ:
14 и҆ бы́ша є҆мѹ̀ четы́редесѧть сы́нове и҆ три́десѧть внѹ́цы, ѣ҆́здѧщїи на седми́десѧти ѻ҆слѣ́хъ: и҆ сѹдѝ ї҆и҃леви ѻ҆́смь лѣ́тъ:
15 и҆ ѹ҆́мре а҆вдѡ́нъ сы́нъ є҆лли́ховъ фараѳѡні́тинъ, и҆ погребе́нъ бы́сть въ фараѳѡ́нѣ, въ землѝ є҆фре́мли, въ горѣ̀ а҆мали́ковѣ. |
